ନିଟ୍‌ରେ ସଫଳ ସୋମଦତ୍ତ, ରୋଗୀ ସେବା କରିବାକୁ ରଖିଛନ୍ତି ଲକ୍ଷ୍ୟ

ନିଟ୍ ୟୁଜି ପରୀକ୍ଷାରେ ଯାଜପୁର ବିଞ୍ଝାରପୁର ବ୍ଲକ ବରୁଣା ଗ୍ରାମର ପ୍ରିୟ ସୋମଦତ୍ତ ନାୟକ ଓଡ଼ିଶାରୁ ଆଗରେ ରହିଥିବାବେଳେ, ସର୍ବ ଭାରତୀୟ ରାକିଂରେ ୩୯ରେ ରହିଛନ୍ତି । ଅଧିକ ପଢନ୍ତୁ

ଯାଜପୁର: ନିଟ୍(NEET) ୟୁଜି ପରୀକ୍ଷା ଫଳ ଗୁରୁବାର ପ୍ରକାଶ ପାଇଛି । ସର୍ବଭାରତୀୟ ଡାକ୍ତରୀ ପ୍ରବେଶିକା ପରୀକ୍ଷାରେ ପ୍ରିୟ ସୋମଦତ୍ତ ଓଡିଶାର ଟପ୍ପର ହୋଇଛନ୍ତି । ଯାଜପୁର ଜିଲ୍ଲାର ବିଞ୍ଝାରପୁର ବ୍ଲକ ବରୁଣା ଗ୍ରାମର ସଞ୍ଜୀବ କୁମାର ନାୟକଙ୍କ ପୁଅ ପ୍ରିୟ ସୋମଦତ୍ତ ଓଡିଶା ଟପ୍ପର ହୋଇଛନ୍ତି । ଏହି ଖବର ଜଣାପଡ଼ିବା ପରେ ପରିବାରରେ ଖୁସିର ମାହୋଲ । ସୋମଦତ୍ତ ନାୟକ ୯୯.୯୯ ସ୍କୋର ରଖି ଓଡ଼ିଶାରୁ ଆଗରେ ରହିଥିବାବେଳେ ସର୍ବ ଭାରତୀୟ ରାକିଂରେ ୩୯ତମ ସ୍ଥାନରେ ରହିଛନ୍ତି । ସୋମଦତ୍ତ ୭୦୫ ମାର୍କ ରଖିଛନ୍ତି । ଭବିଷ୍ୟତରେ ଜଣେ ସ୍ନାୟୁ ବିଶେଷଜ୍ଞ ହେବାକୁ ଲକ୍ଷ୍ୟ ରଖିଛନ୍ତି ସୋମଦତ୍ତ ।

ପ୍ରିୟ ସୋମଦତ୍ତ

ସୋମଦତ୍ତଙ୍କ ଏହି ସଫଳତାରେ ଗାଁଠୁ ନେଇ ପରିବାର ଲୋକ ଗର୍ବ ଅନୁଭବ କରିଛନ୍ତି । ପିଲାଟି ବେଳୁ ମେଧାବୀ ଛାତ୍ର ଥିଲେ ସୋମଦତ୍ତ । ନିଟ ପରୀକ୍ଷାରେ ସଫଳ ହୋଇଥିବା ନେଇ ତାଙ୍କ ଜେଜେ କହିଛନ୍ତି, ''ତାର ସଫଳତାରେ ବହୁତ ଖୁସି । ଏ ଖୁସି ଭାଷାରେ କହି ହେବ ନାହିଁ । ସେ ଦିଲ୍ଲୀ ଏମ୍ସରେ ପଢିବାକୁ ଇଚ୍ଛା ରଖିଛି । ୧୦ ଘଣ୍ଟା ପରିଶ୍ରମ କରନ୍ତି । ଡାକ୍ତର ହେବା ପରେ ଓଡିଶା ଲୋକଙ୍କ ସେବା କରିବ ସୋମଦତ୍ତ ।''

ପ୍ରିୟ ଭୁବନେଶ୍ୱରର ଘରୋଇ ସ୍କୁଲରେ ପାଠ ପଢି ମେଡ଼ିକାଲ ପାଇଁ ପ୍ରସ୍ତୁତ ହେଉଥିଲେ । ତାଙ୍କର ଏହି ସଫଳତା ନେଇ ବିଭିନ୍ନ ବ୍ୟକ୍ତି ବିଶେଷ ଓ ଅନୁଷ୍ଠାନ ପକ୍ଷରୁ ତାଙ୍କୁ ଶୁଭେଚ୍ଛା ଜଣାଇଛନ୍ତି । ରାଜ୍ୟ ରାଜସ୍ୱ ମନ୍ତ୍ରୀ ପ୍ରମିଳା ମଲ୍ଲିକ ପ୍ରିୟଙ୍କୁ ଭେଟି ଆଗାମୀ ଦିନ ପାଇଁ ଶୁଭେଚ୍ଛା ଓ ଶୁଭ କାମନା ଜଣାଇଛନ୍ତି । ତାଙ୍କର ଏହି ସଫଳତା ଖବର ପାଇ ଯାଜପୁର ଜିଲ୍ଲାରେ ଖୁସିର ଲହରୀ ଖେଳିଯାଇଛି ।

ସୋମଦତ୍ତଙ୍କ ପିତା ସଞ୍ଜୀବ କୁମାର ନାୟକ ଆଇଟିସିରେ ଜଣେ ସେଲସ ମ୍ୟାନେଜର ଓ ମାତା ଅନୁପମା ନାୟକ ଜଣେ ଗୃହିଣୀ । ଅଦ୍ୟମ ଇଚ୍ଛାଶକ୍ତି ଓ ପରିଶ୍ରମ ଫଳରେ ଏହି ସଫଳତା ହାସଲ କରିଛନ୍ତି ସୋମଦତ୍ତ । ସେ ଭବିଷ୍ୟତରେ ଜଣେ ସ୍ନାୟୁ ବିଶେଷଜ୍ଞ ହେବାକୁ ଲକ୍ଷ୍ୟ ରଖିଛନ୍ତି । ସ୍କୁଲ ଶିକ୍ଷକଙ୍କ ସହଯୋଗ ଓ ବାପାମାଆଙ୍କ ପ୍ରେରଣାକୁ ଶ୍ରେୟ ଦେଇଛନ୍ତି ସୋମଦତ୍ତ । ଚଳିତ ବର୍ଷ ଜୁଲାଇ ୧୭ରେ ଦେଶରେ ୪୯୭ଟି ସହର ଓ ବାହାରେ ୧୪ଟି ସହରରେ ୩,୫୭୦ ପରୀକ୍ଷା କେନ୍ଦ୍ରରେ ପରୀକ୍ଷା ହୋଇଥିଲା ।

ଇଟିଭି ଭାରତ, ଯାଜପୁର