ଯାଜପୁର: କୋରେଇ ଷ୍ଟେସନରେ ହୋଇଥିବା ଟ୍ରେନ ଦୁର୍ଘଟଣାରେ ମୃତକଙ୍କ ପରିବାରକୁ ୫୦ ଲକ୍ଷ ଟଙ୍କା କ୍ଷତିପୂରଣ ଓ ପରିବାରର ଜଣକୁ ଚାକିରୀ ଦାବିରେ ଷ୍ଟେସନରେ ଧାରଣା ଦିଆଯାଇଛି । ଏହି ଦୁର୍ଘଟଣାରେ ମୃତ ଅବଜୁନ୍ ବିବିଙ୍କ ପରିବାର ପକ୍ଷରୁ ଷ୍ଟେସନ ପରିସରେ ଧାରଣା ଦିଆଯିବା ସହ ବିକ୍ଷୋଭ ପ୍ରଦର୍ଶନ କରାଯାଇଛି ।
ସୂଚନା ଅନୁସାରେ ଆଜି ସକାଳେ ମୃତ ଅବଜୁନ୍ ବିବି ନିଜର ରୋଗୀଣା ସ୍ବାମୀଙ୍କ ଚିକିତ୍ସା ପାଇଁ କଟକ ଯିବାକୁ କୋରେଇ ଷ୍ଟେସନ ଆସିଥିଲେ । ଯାତ୍ରୀ ବିଶ୍ରାମାଗାରରେ ଟ୍ରେନକୁ ଅପେକ୍ଷା କରିଥିବାବେଳେ ମାଲବାହୀ ଟ୍ରେନ ଦୁର୍ଘଟଣା ହୋଇଥିଲା । ରେଳଷ୍ଟେସନର ଯାତ୍ରୀ ବିଶ୍ରାମାଗାର ଉପରେ ମାଲବାହୀ ଟ୍ରେନ ମାଡି ଯିବାରୁ ଅବଜୁନ୍ ବିବିଙ୍କ ସମେତ ୩ ଜଣଙ୍କର ମୃତ୍ୟୁ ହୋଇଛି । ତେବେ ଅବଜୁନ୍ ଅତି ଗରିବ ଶ୍ରେଣୀର ଲୋକ ହୋଇଥିବାରୁ ଏହି ପରିବାରକୁ ୫୦ ଲକ୍ଷ ଟଙ୍କା କ୍ଷତିପୂରଣ ଓ ପରିବାରର ଜଣକୁ ଏକ ଚାକିରୀ ଦାବିରେ ଅବଜୁନ୍ ବିବିଙ୍କ ପରିବାର ଓ ଗ୍ରାମବାସୀଙ୍କ ପକ୍ଷରୁ ଷ୍ଟେସନରେ ଧାରଣା ଦିଆଯାଇଥିବା ଦେଖିବାକୁ ମିଳିଛି । ସେପଟେ ଘଟଣାସ୍ଥଳରେ ଆରପିଏଫ ଅଧିକାରୀ ଓ ସ୍ଥାନୀୟ ପୋଲିସ ଅଧିକାରୀ ପହଞ୍ଚି ସ୍ଥାନୀୟ ଲୋକଙ୍କୁ ବୁଝାସୁଝା କରୁଥିବା ଜଣାପଡ଼ିଛି ।