ଯାଜପୁର: ଘରୁ ଚାଲିଗଲା ରୋଜଗାରିଆ ପୁଅ । ମନେକ ପକାଇ ବାହୁନି ବାହୁନି କାନ୍ଦୁଛି ମାଆ, ସ୍ବାମୀକୁ ହରାଇ ସ୍ତ୍ରୀ ବି ମର୍ମାହତ । ସେପଟେ ବାପା ଛେଉଣ୍ଡ ହୋଇଗଲେ ୨ ଛୋଟଛୋଟ ପିଲା । ଆଉ ଏବେ ଦୁଃଖରେ ଦିନ କଟୁଛି ଏହି ଦୁଃଖି ପରିବାର । ଆମେ କହୁଛୁ ଯାଜପୁର ଜିଲ୍ଲା ସୁକିନ୍ଦା ବ୍ଲକ କାଇଥା ଗାଁରେ ମୃତ ବିପିନି ବିହାରୀ ଚକ୍ରଙ୍କ ପରିବାର କଥା । କିଛି ମାସ ତଳେ ଲିଭର ଓ କିଡିନୀ ନଷ୍ଟ ହୋଇଯିବାରୁ ମୃତ୍ୟୁବରଣ କରିଥିଲେ ବିପିନ । ଆଉ ଏହାପରେ ପରିବାରର ଅବସ୍ଥା ଏବେ ନକହିବା ଭଲ । ଏହି ଦୁଃଖଦ ଘଟଣା ପରେ ପରିବାରରେ ଯେମିତି ଦୁଃଖର କଳାବାଦଲ ମାଡ଼ି ଆସିଲା । ଫଳରେ ଦିନକୁ ଦୁଇ ଓଳି ଦୁଇ ମୁଠା ଖାଇବା ମଧ୍ୟ ଅସମ୍ଭବ ହୋଇପଡିଛି । ପରିବାର କେମିତି ଚଳିବ ସେନେଇ ଚିନ୍ତାରେ ରହିଛନ୍ତି ବର୍ଷାଙ୍କ ପରିବାର । ପରିବାରରେ ବର୍ଷା ତାଙ୍କ ୨ ସନ୍ତାନ ଓ ଶାଶୁ ରହିଛନ୍ତି । କିନ୍ତୁ ଏମାନଙ୍କୁ ଏବେ କିଭଳି ଦାନା ଯୋଗାଇବେ ସେହି ଚିନ୍ତାରେ ବର୍ଷା । ଏବେ ସାହାଯ୍ୟ ପାଇଁ ସମସ୍ତଙ୍କୁ ଆକୁଳ ନିବେଦନ କରିଛନ୍ତି ବର୍ଷା ।
ସ୍ବର୍ଗତ ବିପିନି ବିହାରୀ ଚକ୍ର ଦୀର୍ଘଦିନ ହେବ କଟକର ଏକ ଆଳୁ ଗୋଦାମରେ କାମ କରୁଥିଲେ । ଆଳୁ ଗୋଦାମରୁ ଯାହା କିଛି ରୋଜଗାର ହୁଏ ସେଥିରେ ତାଙ୍କ ପରିବାର ଚଳିଯାଏ । ଦୀପାବଳିରେ ବିପିନ ଗାଁକୁ ଆସିଥିଲେ । ଆଉ ଦୀପାବଳି ଦିନ ହିଁ ବିପିନିଙ୍କୁ ହୋଇଥିଲା ଭୀଷଣ ଜ୍ୱର । ତାଙ୍କୁ ସ୍ଥାନୀୟ ସୁକିନ୍ଦା ମେଡ଼ିକାଲରେ ଭର୍ତ୍ତି କରାଯାଇଥିଲା । ଦୁଇଦିନ ଧରି ସୁକିନ୍ଦା ଚିକିତ୍ସାଳୟରେ ଚିକିତ୍ସିତ ହେଵା ପରେ ଜ୍ୱର ନକମିବାରୁ ୨ ଦିନ ପରେ ଡାକ୍ତର ବିପିନିଙ୍କୁ କଟକ ବଡ଼ ମେଡ଼ିକାଲକୁ ସ୍ଥାନାନ୍ତର କରିଥିଲେ । ସେଠାରେ ଯାଞ୍ଚ ପରେ ଜଣାପଡିଲା ବିପିନିଙ୍କର ଲିଭର ଓ କିଡିନୀ ୨ଟି ଯାକ ନଷ୍ଟ ହୋଇ ଯାଇଛି । ଶେଷରେ ଚିକିତ୍ସାଧୀନ ଅବସ୍ଥାରେ ବିପିନଙ୍କର କଟକ ବଡ଼ ମେଡିକାଲରେ ମୃତ୍ୟୁ ବରଣ କରିଥିଲେ ।
ଏହାପରେ ସ୍ତ୍ରୀ ବର୍ଷା ସାହି ପଡ଼ିଶା, ବନ୍ଧୁ ବାନ୍ଧବ ଓ ଗୋଦାମ ମାଲିକଙ୍କ ସହାୟତାରେ ଶୁଦ୍ଧିକ୍ରିୟା ସମ୍ପର୍ଣ୍ଣ କରିଥିଲେ । ଶୁଦ୍ଧିକାର୍ଯ୍ୟରେ ଯାହା କିଛି ରାସନ ସାମଗ୍ରୀ ବଳି ଯାଇଥିଲା ସେତିକିରେ ଏବେ ପରିବାର ଚଳୁଛନ୍ତି । ସେତକ ସରିଲେ ଆମକୁ ଉପାସ ରହିବାକୁ ପଡିବ ବୋଲି କୋହ ଭରା କଣ୍ଠରେ କହିଛନ୍ତି ବିପିନିଙ୍କ ପତ୍ନୀ ବର୍ଷା । ସେପଟେ ପୁଅ ଚାଲିଯିବା ପରେ ବୋହୂ ଓ ନାତି ନାତୁଣୀଙ୍କୁ ନେଇ କିପରି ଚଳିବେ ବୋଲି ଚିନ୍ତା କରି ଭାଙ୍ଗି ପଡିଛନ୍ତି ବୃଦ୍ଧା ମାଆ ଶଶିକଳା ଚକ୍ର।