ଗାଁ ଛାଡିଲେ ସ୍ମିତାରାଣୀଙ୍କ ପରିବାର

ହରିଦାସପୁର ପିଇଓ ସ୍ମିତାରାଣୀ ହତ୍ୟାକାଣ୍ଡ ଘଟଣା ପରେ ପୋଲିସ ତଦନ୍ତରେ ଅସନ୍ତୋଷ ପରିବାର ଗତରାତିରୁ ଗାଁ ଛାଡିଛନ୍ତି ।

ଯାଜପୁର: ବହୁଚର୍ଚ୍ଚିତ ଧର୍ମଶାଳା ହରିଦାସପୁର ପିଇଓ ସ୍ମିତାରାଣୀ ହତ୍ୟାକାଣ୍ଡ ଘଟଣାକୁ ପାଖାପାଖି 20ଦିନ ହୋଇଗଲାଣି । ରାଜ୍ୟ ପୋଲିସର ତଦନ୍ତ ଉପରେ ଆଉ ଭରସା କରିପାରୁନାହାଁନ୍ତି ପରିବାର । ଘଟଣାକୁ ନେଇ ରାଜନୀତି ବଢୁଥିବାବେଳେ ପୂର୍ବ ଘୋଷଣା ମୁତାବକ ସ୍ମିତାରାଣୀଙ୍କ ପରିବାର ଗତ ରାତିରୁ ଗାଁ ଛାଡି ପଳାଇଛନ୍ତି । ପରିବାର ପ୍ରତି ବିପଦ ଥିବା ଦର୍ଶାଇ ସ୍ମିତାରାଣୀଙ୍କ ବାପା କିଛି ଦିନ ପୂର୍ବରୁ କହିଥିଲେ ସେମାନେ ଏବେ ଅସୁରକ୍ଷିତ । ପରିବାର ପ୍ରତି ବିପଦ ଅଛି ।

ଆଉ ଗତରାତି ସ୍ମିତାରାଣୀଙ୍କ ବାପା ମା ନିଜ ଜ୍ବାଇଁଙ୍କ ପାଖକୁ ତାଳଚେର ପଳାଇଛନ୍ତି । ସେଠାରୁ ଦିନେ ଦୁଇଦିନ ମଧ୍ୟରେ ଦିଲ୍ଲୀ ପଳାଇବେ ବୋଲି ଜଣାପଡିଛି । ଧର୍ମଶାଳା ବ୍ଲକ ଚୋରମୁହାଁ ଗାଁରେ ଥିବା ସ୍ମିତାରାଣୀଙ୍କ ବାପା ସଦାନନ୍ଦ ବିଶ୍ବାଳଙ୍କ ଘରେ ଏବେ ତାଲା ଝୁଲୁଛି । ଘର ଆଗରେ ପୋଲିସ ପହରା । ତେବେ ଏହି ଘଟଣାକୁ ନେଇ ପୋଲିସ ଆଗକୁ କଣ ପଦକ୍ଷେପ ନେଉଛି ଓ ଦୋଷୀ ଦଣ୍ଡ ପାଉଛି କି ନାହିଁ ତାକୁ ଅପେକ୍ଷା ।

ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ