କମାରଶାଳରେ ଶୁଭୁନି ହାତୁଡି ଶଦ୍ଦ, ହାତବାନ୍ଧି ବସିଛି କାରିଗର

କୋରୋନା ଛଡାଇନେଇଛି ଜୀବିକା । ଦୁର୍ଦ୍ଦିନରେ 200 ରୁ ଊର୍ଦ୍ଧ କଂସାପିତଳ କାରିଗର ପରିବାର । କୋରୋନା ଜନିତ ନାନା କଟକଣା ଯୋଗୁଁ ରୋଜଗାର ହରାଇ ଏବେ ଦୁଃଖରେ ଦିନ କାଟୁଛନ୍ତି ଯାଜପୁର ଜିଲ୍ଲା ରସୁଲପୁର ବ୍ଲକ ଲକ୍ଷ୍ମୀନଗର ଅଂଚଳର କଂସାପିତଳ କାରିଗର । ବିକ୍ରି ହେଉନି ସେମାନଙ୍କ ସାମଗ୍ରୀ । ୫ ମାସ ହେବ ହାତାବନ୍ଧି ବସିଛନ୍ତି । ଫଳରେ ପରିବାର ପ୍ରତିପୋଷଣ କରିବା ଏବେ କଷ୍ଟକର ହୋଇପଡିଛି । ରୋଜଗାର ନଥିବାରୁ ଆଗକୁ ପରିବାର କେମିତି ଚଳିବ ତାକୁ ନେଇ ଚିନ୍ତା ବଢିଯାଇଛି ।

ଯାଜପୁର:ହାଡ ଭଙ୍ଗା ପରିଶ୍ରମକୁ, ହାତୁଡି ମାଡ । ନିଆଁ ଝାସ ପାଖରେ ଲୁହାରେ ଲହୁ ଢାଳି କାମ ଚାଲେ । ଦିନରାତି ଏକ କରି କଷ୍ଟକୁ ଭ୍ରୁକ୍ଷେପ କରି କଂସା ପିତଳ ଗଢାରେ ଲାଗି ପଡିଥାଏ କମାରଟିଏ । ହେଲେ ଏବେ ବଦଳି ଯାଇଛି ସମୟ। କୋରୋନା ମାଡ ଆଗରେ ଠପ୍ ହୋଇଯାଇଛି ହାତୁଡି ମାଡ । ଆଉ ଶୁଭୁନି ଲୁହା କି ପିତ୍ତଳର ଠକ୍ ଠକ୍ ଶଦ୍ଦ କି ଚଳଚଞ୍ଚଳ ହେଉନି କମାରଶାଳ।

ଏହା ହେଉଛି ଯାଜପୁର ଜିଲ୍ଲା ରସୁଲପୁର ଲକ୍ଷ୍ମୀନଗର ଅଞ୍ଚଳର 200 ରୁ ଊର୍ଦ୍ଧ କଂସାପିତଳ କାରିଗରଙ୍କ ଦୟନୀୟ ସ୍ଥିତି। ମହାମାରୀ ଆଗରେ ନିରୁପାୟ ହୋଇ ୫ ମାସ ହେବ ହାତବାନ୍ଧି ବସିଛି କୁଶଳୀ କାରିଗର । ବିକ୍ରି ହେଉନି ସେମାନଙ୍କ ସାମଗ୍ରୀ ଭାଙ୍ଗି ପଡିଛି ଆର୍ଥିକ ମେରୁଦଣ୍ଡ । ଯାହା ଫଳରେ ଜୀବନ ଜୀବିକାର ଦୋଛକିରେ ଛନ୍ଧି ହୋଇ କାରିଗରଟିର ସଂସାର ଗାଡି ଅଧାରେ ଅଟକି ଯାଇଛି। ଏବେ ନିଜ ଭବିଷ୍ୟତକୁ ନେଇ ଚିନ୍ତାରେ କୁଶଳୀ କାରିଗର ।

ଯେଉଁ ହସ୍ତକଳା ଜିଲ୍ଲା ତଥା ରାଜ୍ୟକୁ ବାହାର ରାଜ୍ୟରେ ପରିଚୟ ଦେଇଛି, ତାହାକୁ କୌଳିକ ବୃତ୍ତି କରିଥିବା କାରିଗରମାନେ ଆଜି ଦୁର୍ଦ୍ଦିନରେ । ଗାଁ ରେ ୧୪ ଟି କଂସାପିତଳ ଶାଳରେ ଶତାଧିକ କାରିଗର କାର୍ଯ୍ୟ କରି ଭଲ ଦୁଇ ପଇସା ରୋଜଗାର କରୁଥିଲେ । ହେଲେ ବର୍ତ୍ତମାନର ଏହି କଷ୍ଟଦାୟକ ସମୟରେ ସେମାନଙ୍କୁ ମଧ୍ୟ ଆବଶ୍ୟକ ସହାୟତା ।

କୋରୋନା ଜନିତ କଟକଣା ନଥିଲେ ହାଟ ବଜାର, ମେଳା ମହୋତ୍ସବ ବା ପୂଜା ପର୍ବାଣୀରେ ନିଜ ହାତ ତିଆରି କଂସାପିତଳ ସାମଗ୍ରୀ ବିକ୍ରି କରି ବେଶ ଦୁଇ ପଇସା ରୋଜଗାର କରିପାରିଥାନ୍ତେ । ହେଲେ କୋରୋନା ପକାଇଛି ରୋଜଗାରରେ ବେଡି । ଏଥିପାଇଁ ଦିନକୁ ଦିନ ବଢିବାରେ ଲାଗିଛି ସମସ୍ୟା । ଅନେକଙ୍କ ଘରେ ଏବେ ଚୁଲି ଜଳିବା ବି କଷ୍ଟକର ହୋଇପଡିଲାଣି ।

ସେପଟେ ବୋଝ ଉପରେ ନଳୀତା ବିଡା ପରି ଆଧୁନିକତାର ସ୍ପର୍ଶରେ କଂସାପିତଳ ସାମଗ୍ରୀର ଚାହିଦା କମିଥିବା ବେଳେ ଏବେ କରୋନା ମହାମାରୀ ଯୋଗୁଁ ବ୍ୟବସାୟ ସମ୍ପୂର୍ଣ୍ଣ ବନ୍ଦ । ତେଣୁ ଏହି କାରିଗରମାନଙ୍କୁ ସରକାରୀ ସହଯୋଗ ମିଳିଲେ ଦୂର ହୋଇପାରନ୍ତା ଏମାନଙ୍କ ଦୁଃଖ ।

ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ