ଶହ ଶହ ବର୍ଷ ପରେ ବି ମିଳୁନି ସ୍ଥାୟୀ ଜମିପଟ୍ଟା, ଉଚ୍ଚଶିକ୍ଷାରୁ ବଞ୍ଚିତ ଆଦିବାସୀ ଛାତ୍ରଛାତ୍ରୀ

ଜମିପଟ୍ଟା ନଥିବାରୁ ପାଠପଢ଼ାରୁ ବଞ୍ଚିତ ଆଦିବାସୀ ଛାତ୍ରଛାତ୍ରୀ । ଶହ ଶହ ବର୍ଷ ପରେ ବି ମିଳୁନି ସ୍ଥାୟୀ ଜମିପଟ୍ଟା । ଯାଜପୁର କୋରେଇ ବ୍ଲକ ଭାଲୁକାହୁଡ଼ି ଆଦିବାସୀ ସାହିରୁ ଆସିଛି ଏପରି ଅଭିଯୋଗ । ଦେଖନ୍ତୁ ଏହି ରିପୋର୍ଟ

ଯାଜପୁର:ଜମିପଟ୍ଟା ନଥିବାରୁ ପାଠପଢ଼ାରୁ ବଞ୍ଚିତ ହେଉଛନ୍ତି ଆଦିବାସୀ ଛାତ୍ରଛାତ୍ରୀ । ଏଭଳି ଅଭିଯୋଗ ହେଇଛି ଯାଜପୁର ଜିଲ୍ଲା କୋରେଇ ବ୍ଲକ ପାଟରଙ୍ଗା ପଞ୍ଚାୟତର ଭାଲୁକାହୁଡ଼ି ଆଦିବାସୀ ସାହିରେ l ଏହି ସାହିରେ ଶହଶହ ବର୍ଷ ହେବ ବାସ କରୁଥିବା ଆଦିବାସୀ ପରିବାରକୁ ମିଳୁନି ଜମିପଟ୍ଟା । ବାରମ୍ବାର ବିଭିନ୍ନ ମହଲରେ ଅଭିଯୋଗ ପରେ ବି ଶୁଣୁନାହାନ୍ତି ସରକାର କି ଜିଲ୍ଲା ପ୍ରଶାସନ । ଯାହାଫଳରେ ଏହି ଆଦିବାସୀ ସାହିରେ ପାଠ ପଢ଼ୁଥିବା ଛାତ୍ରଛାତ୍ରୀ ସମସ୍ତ ସରକାରୀ ସୁବିଧା ପାଇବାରୁ ବଞ୍ଚିତ ହେଉଛନ୍ତି l ଜମିପଟ୍ଟା ମିଳିନଥିିବା କାରଣରୁ ସରକାରୀ ସୁବିଧା ମିଳିବା ତ ଦୂରର କଥା ଜାତିଗତ ପ୍ରମାଣ ନପାଇ ଉଚ୍ଚଶିକ୍ଷିତ ହୋଇ ମଧ୍ୟ ନିଯୁକ୍ତି ସୁଯୋଗରୁ ବଞ୍ଚିତ ହେଉଥିବା ମେଧାବୀ ଛାତ୍ରଛାତ୍ରୀ ଅଭିଯୋଗ କରିଛନ୍ତି । ସେପଟେ ଉପ-ଜିଲ୍ଲାପାଳ କହିଛନ୍ତି ତଦନ୍ତ ପାଇଁ ବ୍ୟାସନଗର ତହସିଲଦାରଙ୍କୁ ନିର୍ଦ୍ଦେଶ ଦେଇଛି । ରିପୋର୍ଟ ଆସିଲେ ଏହି 66ଟି ଆଦିବାସୀ ପରିବାରକୁ ଜମିପଟ୍ଟା ପ୍ରଦାନ କରାଯିବ l

ଯାଜପୁର ବ୍ୟାସନଗର ତହସିଲଠାରୁ ମାତ୍ର ୮ କିଲୋମିଟର ଦୂରରେ କେନ୍ଦୁଝର ଓ ଯାଜପୁର ସୀମାନ୍ତରେ ଅବସ୍ଥିତ ଗୋହିରାଗାଡିଆ ଓ ଭାଲୁକାହୁଡ଼ି ଅଞ୍ଚଳ । ହେଲେ ଏଠାର ସରକାରୀ ଯୋଜନା ଅପହଞ୍ଚ । ଆଦିବାସୀମାନଙ୍କର ବିକାଶ ପାଇଁ ରାଜ୍ୟ ସରକାର ଅନେକ ଯୋଜନା କରିଥିବା ଡିଣ୍ଡିମ ପିଟୁଛନ୍ତି l ମାତ୍ର ବ୍ୟାସନଗର ତହସିଲ ଅନ୍ତର୍ଗତ ଭାଲୁକାହୁଡ଼ି ଓ ଗୋହିରାଗଡି ଅଞ୍ଚଳରେ ରହୁଥିବା ୬୬ଟି ଆଦିବାସୀ ପରିବାର ଖଣ୍ଡେ ଜମିପଟ୍ଟା ପାଇବା ପାଇଁ ଏ ଅଫିସରୁ ସେ ଅଫିସ ଧାଇଁ ଧାଇଁ ନୟାନ୍ତ ହୋଇ ପଡ଼ିଲେଣି l ଏହି ଆଦିବାସୀ ପରିବାରକୁ କେବେ ଦେବେ ସରକାର ଜମିପଟ୍ଟା ସେ ନେଇ ପ୍ରଶ୍ନ ଉଠିଛି l ଆଦିବାସୀମାନଙ୍କୁ ନିଜ ହକ ମିଳିବାକୁ ଲାଗିଲାଣି ଶହ ଶହ ବର୍ଷ ।

ମାତ୍ର ଏହି ଆଦିବାସୀ ପରିବାରକୁ ସରକାରଙ୍କ ଜଙ୍ଗଲ ଜମି ଆଇନ ହେଉ କି ଜାଗା ମିଶନ ଘରଢିହ ଯୋଜନା କି ବସୁନ୍ଧରା କେଉଁଥିରେ ବି ଜିଲ୍ଲାପ୍ରଶାସନ ସାମିଲ କରୁନଥିବା ଅଭିଯୋଗ କରିଛନ୍ତି ଆଦିବାସୀ ନେତା । ଏଭଳି ଅଭିଯୋଗ ଆଣିଛନ୍ତି ଯାଜପୁର ବ୍ୟାସନଗର ତହସିଲ ଅର୍ନ୍ତଗତ ଗୋହିରାଗାଡିଆ ଓ ଭାଲୁକାହୁଡି ଅଞ୍ଚଳର ୬୬ ଟି ଆଦିବାସୀ ପରିବାର । ଶହ ଶହ ବର୍ଷ ହେବ ଯାଜପୁର କେନ୍ଦୁଝର ସୀମାନ୍ତ ଜଙ୍ଗଲ ଅଞ୍ଚଳରେ ଏମାନେ ବସବାସ କରୁଥିବା ବେଳେ ସ୍ଥାୟୀ ପଟ୍ଟା ନଥିବାରୁ ଏମାନେ ଅନେକ ସରକାରୀ ଯୋଜନାରୁ ବଞ୍ଚିତ । ଖାଲି ସେତିକି ନୁହେଁ ଜମିପଟ୍ଟା ମିଳୁନଥିବାରୁ ଜାତିଗତ ପ୍ରମାଣ ଅଭାବରୁ ଏଠାରେ ରହୁଥିବା ଉଚଶିକ୍ଷିତ ଛାତ୍ରଛାତ୍ରୀ ନିଯୁକ୍ତି ସୁଯୋଗ ପାଇବାରୁ ବଞ୍ଚିତ ହେଉଥିବା ଅଭିଯୋଗ କରିଛନ୍ତି ଏହି ଆଦିବାସୀ ସାହିରେ ରହୁଥିବା ଉଚ୍ଚଶିକ୍ଷିତ ଛାତ୍ରଛାତ୍ରୀ ।

ଏନେଇ ଏହି ଅଞ୍ଚଳର ବିଟେକ ଛାତ୍ରୀ ରାମ ବେଶ୍ରା କହିଛନ୍ତି, "ଅତି ଦୁଃଖର କଥା ସରକାର ଆମକୁ ଜମିପଟ୍ଟା ଖଣ୍ଡେ ଏଯାଏଁ ପ୍ରଦାନ କଲେ ନାହିଁ । ଆଦିବାସୀଙ୍କ ପାଇଁ ବିଭିନ୍ନ ଯୋଜନା କରୁଥିବା କହୁଥିବା ବେଳେ ଆମେ ଜମିପଟ୍ଟା ପାଇଁ ଉଚ୍ଚଶିକ୍ଷାରୁ ବଞ୍ଚିତ ହେଉଛୁ । ଜମିପଟ୍ଟା ନଥିବାରୁ ଜାତିଗତ ପ୍ରମାଣପତ୍ରଠୁ ଆରମ୍ଭ କରି ବିଭିନ୍ନ ପ୍ରକାର ପ୍ରମାଣପତ୍ର ବାହାର କରିବାରେ ସମସ୍ୟା ଉପୁଜୁଛି । ଏପରିକି ମେଧାବୃତ୍ତିରୁ ମଧ୍ୟ ବଞ୍ଚିତ ହେବାକୁ ପଡ଼ୁଛି । ଆମେ ସରକାରଙ୍କୁ କିଛି ମାଗୁ ନାହିଁ । ଆମକୁ ଜମିପଟ୍ଟା ପ୍ରଦାନ କରନ୍ତୁ ।"

ବିଭିନ୍ନ ସଂଗଠନ ପକ୍ଷରୁ ବାରମ୍ବାର ଆନ୍ଦୋଳନ କରାଉଥିଲେ ବି କୌଣସି ସୁଫଳ ମିଳୁନାହିଁ l ଯାହାଫଳରେ ଖଣ୍ଡେ ଜମିପଟ୍ଟା ପାଇଁ ଆଜି ବିଭିନ୍ନ ଗଣ ସଂଗଠନ ପକ୍ଷରୁ ଶୋଭାଯାତ୍ରାରେ ଆସି ଯାଜପୁର ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ଧାରଣା ଦେଇଛନ୍ତି ଏହି ୬୬ ଆଦିବାସୀ ପରିବାର l ପୂର୍ବରୁ ପ୍ରଶାସନ ପକ୍ଷରୁ କମିଟି ଗଠନ କରି ସମସ୍ୟାର ସମଧାନ ଲାଗି ପ୍ରତିଶୃତି ଦେଇଥିଲେ ବି ବର୍ଷ ପରେ ବର୍ଷ ବିତୁଛି ହେଲେ ପଟ୍ଟା ମିଳିବା ନାଁ ଧରୁନି । ଏଠାକାର ନିର୍ବାଚିତ ଜନ ପ୍ରତିନିଧି ନିର୍ବାଚନ ବେଳେ ଭୋଟ ନେଉଛନ୍ତି । ତାପରେ ଏହି ନିରୀହ ଆଦିବାସୀଙ୍କ ଦାବିକୁ ପାଶୋରି ଦେଉଥିବା ସିଭିଲ ସୋସାଇଟି ଫୋରମ ଅଭିଯୋଗ କରଛି l

ପ୍ରକାଶ ଯୋଗ୍ୟ ଭାଲୁକାହୁଡ଼ି ଆଦିବାସୀ ସାହିରେ ଅନେକ ଛାତ୍ର ପିଜି, ବିଟେକ୍‌, ଡିପ୍ଲୋମା, +3 ପଢି ଉଚ୍ଚଶିକ୍ଷା ପାଇଁ ପାଠ ପଢ଼ୁଥିବା ବେଳେ ଖଣ୍ଡେ ଜମିପଟା ନଥିବାରୁ ବିଭିନ୍ନ ସମୟରେ ଶିକ୍ଷା ପାଇଁ ଆସୁଥିବା ଅନେକ ଯୋଜନାରୁ ବଞ୍ଚିତ ହେଉଥିବା ଦେଖିବାକୁ ମିଳୁଛି । ସେପଟେ ଏହି ଆଦିବାସୀ ପରିବାରକୁ ଜମିପଟ୍ଟା ଦେବା ପାଇଁ ବ୍ୟାସନଗର ତହସିଲଦାରଙ୍କୁ ତଦନ୍ତ ପାଇଁ ନିର୍ଦ୍ଦେଶ ଦେଇଛି l ରିପୋର୍ଟ ଆସିଲା ପରେ ଯୋଗ୍ୟତା ଅନୁଯାୟୀ ପଟା ଦିଆଯିବ ବୋଲି ଉପ ଜିଲ୍ଲାପାଳ କହିଛନ୍ତି l ରାଜ୍ୟ ସରକାର ଆଦିବାସୀମାନଙ୍କ ବିକାଶ ପାଇଁ ଅନେକ ଯୋଜନା କରୁଥିବା କହି ଡିଣ୍ଡିମ ପିଟୁଛନ୍ତି । ମାତ୍ର ଭାଲୁକାହୁଡ଼ିରେ ଶହେ ବର୍ଷ ଧରି ଏହି ଆଦିବାସୀ ପରିବାର ରହୁଥିଲେ ବି ଜମିପଟ୍ଟା ନମିଳିବାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି l

ଇଟିଭି ଭାରତ, ଯାଜପୁର