ଯାଜପୁର: ମେଡିକାଲ ଯାଉଥିବା ବେଳେ ମାଡିଗଲା ଟ୍ରକ୍ । ଘଟଣାସ୍ଥଳରେ ସ୍ବାମୀର ମୃତ୍ୟୁ ହୋଇଥିବାବେଳେ, ସ୍ତ୍ରୀ ଗୁରୁତର ଥିବା ସୂଚନା । ଏଭଳି ଅଭାବନୀୟ ଘଟଣା ଘଟିଛି ଯାଜପୁର ଜିଲ୍ଲା କୋରେଇ ଥାନା ଅନ୍ତର୍ଗତ ଲକ୍ଷ୍ମୀନଗର ପଲିଟେକନିକ କଲେଜ ଛକରେ । ଦୁର୍ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଥିବାବେଳେ, ପୋଲିସର ତଦନ୍ତ ଜାରି । ମୃତକ ଜଣଙ୍କ ହେଉଛନ୍ତି କେନ୍ଦୁଝରର କାଳନ୍ଦୀ ସାହୁ ।
ଟ୍ରଲର ଧକ୍କାରେ ସ୍ୱାମୀ ମୃତ, ସ୍ତ୍ରୀ ଗୁରୁତର
ମିଳିଥିବା ସୂଚନା ଅନୁଯାୟୀ, ଆଜି ଭୋର ସମୟରେ କେନ୍ଦୁଝର ବସନ୍ତପୁରା ଗ୍ରାମର କାଳନ୍ଦୀ ସାହୁ ତାଙ୍କ ପତ୍ନୀଙ୍କ ସହିତ ବାଇକରେ କଟକ ବଡ ମେଡିକାଲ ଅଭିମୁଖେ ଯାଉଥିଲେ । ଏହି ସମୟରେ କୋରେଇ ଥାନା ଲକ୍ଷ୍ମୀନଗର ସରକାରୀ ପଲିଟେକନିକ କଲେଜ ଛକରେ ଏକ ଟ୍ରଲର କାଳନ୍ଦୀ ସାହୁଙ୍କ ବାଇକକୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ କାଳନ୍ଦୀଙ୍କ ମୃତ୍ୟୁ ଘଟିଥିବାବେଳେ ତାଙ୍କ ପତ୍ନୀ ଗୁରୁତର ଭାବେ ଆହତ ହୋଇଥିଲେ । ଏନେଇ ଖବର ପାଇ ଘଟଣାସ୍ଥଳରେ ଯାଜପୁର ରୋଡ ଅଗ୍ନିଶମ କର୍ମଚାରୀ ପହଞ୍ଚି ବାଇକକୁ ଟ୍ରଲର ଭିତରୁ ବାହାର କରିଥିଲା ।