ଯାଜପୁର: ବୟସ ୯୬ ଛୁଇଁଲାଣି । ତଥାପି ସେ ଚଳଚଞ୍ଚଳ । ଦେଶ ମାତୃକାର ସେବା କରିବା ପାଇଁ ଏବେ ବି ତାଙ୍କ ମନରେ ଭରି ରହିଛି ଅଦ୍ୟମ ସାହାସ । ପରିଣତ ବୟସରେ ନିଜର ଦୈନନ୍ଦିନ କାର୍ଯ୍ୟ କରିବା ସହିତ ଅନ୍ୟମାନଙ୍କ ସୁଖଦୁଃଖ କଥା ମଧ୍ୟ ବୁଝନ୍ତି । ଯାଜପୁର ଜିଲ୍ଲା ବଡଚଣା ବ୍ଲକ ବାଲିପଡ଼ିଆ ଗ୍ରାମର ବିଶିଷ୍ଟ ସ୍ବାଧୀନତା ସଂଗ୍ରାମୀ ନୀଳମଣି ସାମଲ । ମାତ୍ର ୧୬ବର୍ଷ ବୟସରେ ଜାତିର ପିତା ମହାତ୍ମା ଗାନ୍ଧୀଙ୍କ ଭାରତ ଛାଡ ଆନ୍ଦୋଳନରେ ଡ଼ାକରାରେ ସାମିଲ ହୋଇଥିଲେ ।
ତେବେ ତତ୍କାଳୀନ ସ୍ବାଧୀନତା ସଂଗ୍ରାମୀ କୃଷ୍ଣମୋହନ ରାଉତରାୟ ଏବଂ ବଡଚଣାର ଗାନ୍ଧୀ ବୃନ୍ଦାବନ ତ୍ରିପାଠୀଙ୍କ ଆଦର୍ଶରେ ଅନୁପ୍ରାଣିତ ହୋଇ ସ୍ଵାଧୀନତା ସଂଗ୍ରାମରେ ଝାସ ଦେଇଥିଲେ ନୀଳମଣି । ଏଥିପାଇଁ ତାଙ୍କୁ 3ବର୍ଷ କାରାଦଣ୍ଡ ଭୋଗିବାକୁ ପଡ଼ିଥିଲା । ଏହି ମହାନ ବ୍ୟକ୍ତିଙ୍କୁ ଆସନ୍ତା ଅଗଷ୍ଟ ୯ କ୍ରାନ୍ତି ଦିବସରେ ସମ୍ମାନିତ କରିବାକୁ ରାଷ୍ଟ୍ରପତି ଭବନରୁ ଆସିଛି ଡାକରା । ଏନେଇ ବାଲିପଡ଼ିଆ ଗ୍ରାମବାସୀ ନିଜକୁ ଗର୍ବ ଅନୁଭବ କରିଛନ୍ତି । ଏଥିସହିତ ଖବର ପ୍ରଚାର ହେବା ପରେ ନୀଳମଣିଙ୍କୁ ଚାରିଆଡୁ ଛୁଟିବାରେ ଲାଗିଛି ଶୁଭେଚ୍ଛାର ସୁଅ ।
ଭିଡିଓ ସୌଜନ୍ୟ: ସମ୍ବାଦଦାତା ଯାଜପୁର ଯାଜପୁର ଜିଲ୍ଲା ସ୍ବାଧୀନତା ସଂଗ୍ରାମୀ ମାଟି ହେଉଛି ବାଲିପଡ଼ିଆ । ଏହି ମାଟିରେ ଜନ୍ମ ନେଇ ଦେଶ ଜାତି ପାଇଁ ନିଜ ଜୀବନକୁ ଉତ୍ସର୍ଗ କରିଥିଲେ ବଡଚଣାର ଗାନ୍ଧୀ ସଂଗ୍ରାମୀ ବୃନ୍ଦାବନ ତ୍ରିପାଠୀଙ୍କ ସମେତ ୧୯ ଜଣ ସ୍ଵାଧୀନତା ସଂଗ୍ରାମୀ । ଏହାରି ଭିତରେ ବିତିଯାଇଛି ଅନେକ ବର୍ଷ । ଏହି ବାଲିପଡ଼ିଆ ମାଟିର ୧୯ଜଣ ସ୍ଵାଧୀନତା ସଂଗ୍ରାମୀଙ୍କ ମଧ୍ୟରୁ ଆଉ କେବଳ ବଞ୍ଚିଛନ୍ତି ନୀଳମଣି ସାମଲ । ଏହି ସଂଗ୍ରାମୀଙ୍କୁ ମନେ ରଖିବା ପାଇଁ ତାଙ୍କର ସ୍ମୃତିରେ ପ୍ରତିଷ୍ଠା ହୋଇଥିବା ଠକ୍କରବାପା ଆଶ୍ରମରେ ସାଇତା ହୋଇରହିଛି ଅନେକ ସ୍ମୃତି ।
ତେବେ ଜୀବିତ ରହିଥିବା ଏକମାତ୍ର ସଂଗ୍ରାମୀ ନୀଳମଣି ପୂର୍ବରୁ ଦୁଇ ଥର ରାଷ୍ଟ୍ରପତିଙ୍କ ଦ୍ଵାରା ସମ୍ମାନିତ ହୋଇଛନ୍ତି । କେବଳ ସେତିକି ନୁହେଁ ଜିଲ୍ଲା ତଥା ଜିଲ୍ଲା ବାହାରେ ତାଙ୍କୁ ମିଳିଛି ଅନେକ ସମ୍ମାନ। ଏବେବି ଗାଁରେ ସେ ପିଲାମାନଙ୍କୁ ଦେଶମାତୃକାର ସେବା କରିବାକୁ ଆହ୍ୱାନ ଦେଉଛନ୍ତି । ପରାଧୀନ ଭାରତ ସମୟରେ ସ୍ଵାଧୀନତା ସଂଗ୍ରାମ କଥା ମନେପଡିଲେ ଭାବବିହ୍ଵଳ ହୋଇପଡିଛନ୍ତି ନୀଳମଣି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
