ଯାଜପୁର: ଚଣ୍ଡିଖୋଲରୁ ଆସୁଥିବା ଘରୋଇ ବସରେ ନାବାଳିକା ଛାତ୍ରୀଙ୍କୁ ଅସଦାଚରଣ ଘଟଣାରେ ୪ ଅଭିଯୁକ୍ତ ଗିରଫ । ଯାଜପୁର ରୋଡ ପୋଲିସ ଦ୍ବାରା ୪ ଅଭିଯୁକ୍ତ କୋର୍ଟ ଚାଲାଣ ହେଇଥିବା ସୂଚନା ମିଳିଛି । ଗିରଫ ଅଭିଯୁକ୍ତମାନେ ହେଲେ କୋରେଇ ଥାନା ଚାନ୍ଦମା ଗ୍ରାମର ତ୍ରିଲୋଚନ ସାମଲ, ଯାଜପୁର ସଦର ଥାନାର ଅଶୋକ କୁମାର ନାୟକ, ଧର୍ମଶାଳା ଥାନା ଅଞ୍ଚଳର ଶମ୍ଭୁନାଥ ରାୟ ଓ ଯାଜପୁର ରୋଡ ଥାନା ରାଛିପୁର ଗ୍ରାମର ଅଶୋକ କୁମାର ନାୟକ ।
ସୂଚନା ଅନୁସାରେ, ବ୍ୟାସନଗରସ୍ଥିତ ସାପଗଡିଆ ଅଞ୍ଚଳର ଜଣେ ନାବାଳିକା ଚଣ୍ଡିଖୋଲର ଏକ କଲେଜରେ ପାଠ ପଢ଼ନ୍ତି । ତେବେ ଗତକାଲି(ଶନିବାର) କଲେଜରେ କ୍ଲାସ ସାରି ଘରକୁ ଫେରିବା ସମୟରେ ବସ ଭିତରେ ଅଜଣା ଯୁବକ ତାଙ୍କୁ ଅସଦାଚରଣ କରିଥିଲେ । ଏନେଇ ଛାତ୍ରୀ ଜଣକ ବସ କର୍ମଚାରୀଙ୍କୁ ଜଣାଇଥିଲେ । ତେବେ ସେମାନେ ଜାଣିଶୁଣି ଛାତ୍ରୀଙ୍କୁ ଅସଦାଚରଣ କରିଥିବା ଯୁବକକୁ ବିଦା କରିଦେଇଥିବା ଯାଜପୁର ରୋଡ ଥାନାରେ ଅଭିଯୋଗ ହେଇଥିଲା । ତେବେ ଆଜି(ରବିବାର) ଯାଜପୁର ରୋଡ ପୋଲିସ ଅଭିଯୁକ୍ତଙ୍କ ମେଡିକାଲ ଟେଷ୍ଟ ପରେ କେସ ନମ୍ବର ୩୫୭/୨୨ ଦଫା ୩୫୪(A), ୩୪୧, ୧୧୦ ଓ ୩୪ ଆଇପିସିରେ କୋର୍ଟ ଚାଲାଣ କରିଥିବା ତଦନ୍ତ ଅଧିକାରୀ ଜ୍ୟୋତିରଞ୍ଜନ ମହାପାତ୍ର ସୂଚନା ଦେଇଛନ୍ତି ।
ଇଟିଭି ଭାରତ, ଯାଜପୁର