ଯାଜପୁର: ସାରା ଦେଶକୁ ଘାରିଛି କୋରୋନା ଚିନ୍ତା । କ୍ରମାଗତ ଭାବରେ ଦେଶରେ କୋରୋନାଙ୍କ ସନ୍ଦିଗ୍ଧଙ୍କ ସଂଖ୍ୟା ବଢିବାରେ ଲାଗିଛି । କିନ୍ତୁ ଏହି ମହାମାରୀ କୋରୋନାର ମୁକାବିଲା ପାଇଁ ସେଲିବ୍ରିଟି, ନେତାଙ୍କ ଠାରୁ ଆରମ୍ଭ କରି ସାଧାରଣ ଲୋକ ପର୍ଯ୍ୟନ୍ତ ସମସ୍ତେ ସହଯୋଗର ହାତ ବଢାଇଛନ୍ତି । ତେବେ ଏନେଇ ବିଭିନ୍ନ ବ୍ୟକ୍ତିବିଶେଷ ଓ ସଂଗଠନ ପକ୍ଷରୁ ଜିଲ୍ଲା ପ୍ରଶାସନ ମାଧ୍ୟମରେ ଆର୍ଥିକ ସହଯୋଗ କରାଯାଇଛି ।
ରବିବାର ପଣସା ସରପଞ୍ଚ ମୋନାଲିସା ପତି ନିଜର ବର୍ଷକର ଦରମା ପ୍ରଦାନ କରିଥିବା ବେଳେ ଅବସରପ୍ରାପ୍ତ ହିନ୍ଦି ଶିକ୍ଷକ ରବି ଶତପଥି ନିଜର ପେନସନ ଅର୍ଥରୁ ୫ ହଜାର ଟଙ୍କା ଜିଲ୍ଲାପାଳଙ୍କୁ ପ୍ରଦାନ କରିଛନ୍ତି । ସେହିଭଳି ମାଳଆନନ୍ଦପୁର ପଞ୍ଚାୟତର ମୂଳାପାଳ ସ୍ଥିତ ଲିଙ୍ଗେଶ୍ୱର ଉନ୍ନୟନ କମିଟି ପକ୍ଷରୁ କୋରୋନା ମୁକାବିଲ ପାଇଁ ଜିଲ୍ଲାପାଳଙ୍କୁ ୫୦ ହଜାର ଟଙ୍କା ପ୍ରଦାନ କରାଯାଇଛି । ଏହି ଅର୍ଥ ଜିଲ୍ଲାର କୋରୋନା ମୁକାବିଲା ପାଇଁ ଖର୍ଚ୍ଚ ହେବ । ଏହି ବଦାନ୍ୟ ବ୍ୟକ୍ତିଙ୍କୁ ପ୍ରଶାସନ ପକ୍ଷରୁ ଧନ୍ୟବାଦ ପ୍ରଦାନ କରାଯିବା ସହିତ ଅନ୍ୟ ମାନଙ୍କୁ ସାହାଯ୍ୟ ପାଇଁ ନିବେଦନ କରାଯାଇଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ