ଯାଜପୁର: ‘ଇଟିଭି ଭାରତ’ର ମହାପ୍ରଭାବ । ବନ୍ଦ କୋଠରୀରୁ ମୁକୁଳିବେ ରମାକାନ୍ତ । ଦୀର୍ଘ 30 ବର୍ଷର ବନ୍ଦୀ ଜୀବନରୁ ପାଇବେ ମୁକ୍ତି । ଅନ୍ୟମାନଙ୍କ ପରି ସେ ମଧ୍ୟ ଜୀଇଁବେ ଜୀବନ । ସ୍ବାଧୀନ ଭାବେ କରିବେ ଜୀବନଯାପନ ।
ଭିଡିଓ ସୌଜନ୍ୟ: ସମ୍ବାଦଦାତା, ଯାଜପୁର ‘ଇଟିଭି ଭାରତ’ରେ ଖବର ପ୍ରସାରଣ ପରେ ରମାକାନ୍ତ ବେହେରାକୁ ସହଯୋଗର ହାତ ବଢାଇଛି ପ୍ରଶାସନ । ପ୍ରଶାସନର ଏହି ସହଯୋଗ ରମାକାନ୍ତଙ୍କ ପାଇଁ ନୂତନ ଭାବେ ଜୀବନ ଜୀଇଁବାର ଆଶା ସଞ୍ଚାର ହୋଇଛି ।
ରମାକାନ୍ତଙ୍କ ବନ୍ଦୀ ଜୀବନ ଖବର ପ୍ରସାରଣ ପରେ ଗୁରୁବାର ଯାଜପୁର ଜିଲ୍ଲାପାଳ ରଞ୍ଜନ ସ୍ବାଇଁ ରମାକାନ୍ତଙ୍କୁ ଭେଟିଛନ୍ତି । ଏହାସହ ତାଙ୍କର ସମସ୍ତ ଚିକିତ୍ସା ଭାର ବହନ କରିବାକୁ ପ୍ରତିଶୃତି ଦେଇଛନ୍ତି । ଏଥିସହିତ ବିଜୁ ପକ୍କା ଘର ଯୋଜନାରେ କାର୍ଯ୍ୟାଦେଶ ପ୍ରଦାନ କରିବା ସହିତ ରାସନ କାର୍ଡ ପ୍ରଦାନ କରିଛନ୍ତି । ଜିଲ୍ଲାପାଳଙ୍କ ଏଭଳି ପଦକ୍ଷେପ ଫଳରେ ଶିକୁଳିରେ ବନ୍ଧା ହୋଇଥିବା ରମାକାନ୍ତଙ୍କ ମୁକ୍ତି ପାଇବା ସହିତ ସୁସ୍ଥ ହେବା ନେଇ ଆଶା ସଞ୍ଚାର ହୋଇଛି ।
ଏହାମଧ୍ୟ ପଢନ୍ତୁ: ରମାକାନ୍ତଙ୍କ ଅଭିଶପ୍ତ ଜୀବନ: ଶିକୁଳିରେ ଗଲା ଯୌବନ
୩୦ ବର୍ଷ ଧରି ଗୋଟିଏ କୋଠରୀରେ ଦିନ କାଟୁଥିବା ଉଦୟପୁର ଗାଁର ରମାକାନ୍ତ ବେହେରାଙ୍କ ଜୀବନରେ ନୂତନ ସୂର୍ଯ୍ୟୋଦୟ ହେବ । ଏଭଳି ପ୍ରତିଶୃତି ଦେଇଛନ୍ତି ଜିଲାପାଳ । ଜିଲ୍ଲାପାଳଙ୍କ ଏହି ପ୍ରତିଶୃତି ପରେ ରମାକାନ୍ତଙ୍କ ପରିବାରରେ ଖୁସିର ଲହରି ଖେଳି ଯାଇଛି । ଏନେଇ ତାଙ୍କ ପରିବାର ଲୋକେ ଜିଲ୍ଲାପାଳଙ୍କୁ ଧନ୍ୟବାଦ ଦେଇଛନ୍ତି ।
ପ୍ରକାଶ ଯେ, ଦୀର୍ଘ 30 ବର୍ଷ ତଳେ ସାଧାରଣ ଜୀବନଯାପନ କରୁଥିବା ରମାକାନ୍ତ ହଠାତ୍ ଅସ୍ବାଭାବିକ ହୋଇପଡିଥିଲେ । ଯେଉଁଥି ପାଇଁ ପରିବାର ଲୋକେ ତାଙ୍କୁ ଗୋଟିଏ ଘରେ ବନ୍ଦୀ ଭାବରେ ରଖିଥିଲେ । ଏହି ଖବର ପ୍ରଥମେ ‘ଇଟିଭି ଭାରତ’ରେ ପ୍ରସାରଣ ହୋଇଥିଲା ।
ଖବର ପ୍ରସାରଣ ପରେ ପ୍ରଶାସନର ନିଦ ଭାଙ୍ଗିଛି । ରମାକାନ୍ତଙ୍କ ପରିବାର ସମ୍ପର୍କରେ ତଦନ୍ତ କରି ରିପୋର୍ଟ ଦେବାକୁ ଜିଲ୍ଲାପାଳ ଦଶରଥପୁର ବିଡିଓଙ୍କୁ ନିର୍ଦ୍ଦେଶ ଦେଇଥିଲେ । ରିପୋର୍ଟ ପାଇବା ପରେ ଗୁରୁବାର ଜିଲ୍ଲାପାଳ ଉଦୟପୁର ଗାଁକୁ ଯାଇଥିଲେ । ଜିଲ୍ଲାପାଳଙ୍କ ଏଭଳି ପଦକ୍ଷେପକୁ ବେଶ ପ୍ରଶଂସା କରିଛନ୍ତି ଗ୍ରାମବାସୀ ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
