ଯାଜପୁର: 5T ସଚିବଙ୍କ ଯାଜପୁର ଗସ୍ତ ସମୟରେ ବିରୋଧ କରୁଥିବା କଂଗ୍ରେସ କର୍ମୀଙ୍କୁ ବିଜେଡି କର୍ମୀ ଆକ୍ରମଣ କରିବା ଘଟଣାକୁ କଠୋର ନିନ୍ଦା କଲା ବିଜେପି । ଯାଜପୁର ଜିଲ୍ଲା ବିଜେପି ସଭାପତି ଗୌତମ ରାୟ କହିଛନ୍ତି, "5T ସଚିବଙ୍କ ଗୁଣ୍ଡାଗିରି ଆଜି ସାରା ରାଜ୍ୟ ଦେଖିଲା । ଏଇଟା କଣ 5Tର ଏକ ଅଂଶ ?"ବୋଲି ପ୍ରଶ୍ନ କରିବା ସହିତ 5T ସଚିବଙ୍କ ଯାଜପୁର ଗସ୍ତ ସମୟରେ ବିରୋଧ କରୁଥିବା କଂଗ୍ରେସ କର୍ମୀଙ୍କୁ ଆକ୍ରମଣ ଘଟଣାକୁ କଠୋର ଭାବେ ନିନ୍ଦା କରିଛି ବିଜେପି ।
ଏହାସହ ସେ ଆହୁରି ମଧ୍ୟ କହିଛନ୍ତି "ସମସ୍ତ ପ୍ରତିବାଦକୁ ଚାପି ଦେବା ପାଇଁ ଭୟ ସୃଷ୍ଟି କରାଯାଉଛି । ପୋଲିସ ଉପସ୍ଥିତିରେ 5Tଟି ସାର୍ଟ ପିନ୍ଧା ଗୁଣ୍ଡାମାନେ ଠେଙ୍ଗା ଧରି ଗୁଣ୍ଡାଗର୍ଦ୍ଦି କଲେ । ସମ୍ବିଧାନରେ ଅହିଂସା ଶବ୍ଦକୁ ସ୍ଥାନିତ କରାଯାଉ ବୋଲି ଦାବି କରୁଥିବା ଦଳର ଚରିତ୍ର ସାରା ଓଡ଼ିଶା ଦେଖୁଛି । ଲୁଟିଲେ, ଚୋରି କଲେ, ସରକାରୀ ଯୋଜନାକୁ ବାଟମାରଣା କଲେ। ଖାଲି ସେତିକି ନୁହେଁ, ଜନମତକୁ ଜବରଦସ୍ତ ନିଜ ସପକ୍ଷରେ ନେବା ପାଇଁ ବାଡି, ଠେଙ୍ଗା ବ୍ୟବହାର କରିବା ଶାସକ ଦଳ ଓ ରାଜ୍ୟ ସରକାରଙ୍କ ଆଭିମୁଖ୍ୟ ।"
"ଗତ 8 ଦିନ ହେଲା ଯାଜପୁର ଜିଲ୍ଲାର ନେତାମାନେ ମୂଲିଆ ଭଳି ବାଉଁଶ ପୋତୁଛନ୍ତି । ଅଗଣତାନ୍ତ୍ରିକ ଭାବରେ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଜିଲ୍ଲା ଗସ୍ତ ଓ ପ୍ରକଳ୍ପ ଘୋଷଣା କରୁଛନ୍ତି । କଂଗ୍ରେସ କର୍ମୀମାନେ ଯାଜପୁରରେ ଏହାକୁ ପ୍ରତିବାଦ କରୁଥିଲେ । ଏହି ସମୟରେ ବିଜେଡିର ଗୁଣ୍ଡା ବାହିନୀ 5T ସାର୍ଟ ପିନ୍ଧି ଠେଙ୍ଗା ଧରି କଂଗ୍ରେସ କର୍ମୀଙ୍କୁ ଆକ୍ରମଣ କରିଛନ୍ତି । ଏହାକୁ ମୁଁ ନିନ୍ଦା କରୁଛି ।" ଏଭଳି କହି ବିଜେଡି ଉପରେ ବର୍ଷିଛନ୍ତି ଯାଜପୁର ଜିଲ୍ଲା ବିଜେପି ସଭାପତି ଗୌତମ ରାୟ।