ଯାଜପୁର :ବହୁ ଚର୍ଚ୍ଚିତ ରମାଦେବୀ ଛାତ୍ରୀ ଝରାଫୁଲର ହତ୍ୟା ରହସ୍ୟର ପର୍ଦ୍ଦାଫାଶ ହୋଇଛି । ଟଙ୍କା ନେଣଦେଣକୁ କେନ୍ଦ୍ର କରି ହୋଇଥିଲା ହତ୍ୟାକାଣ୍ଡ । ଝରାଫୁଲ ହତ୍ୟାକାଣ୍ଡରେ ସମ୍ପୃକ୍ତ ଅନ୍ୟତମ ଅଭିଯୁକ୍ତ ଶକ୍ତି ସ୍ବାଇଁଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିବା ସମୟରେ ରହସ୍ୟର ଉନ୍ମୋଚନ କରିଛି ପୋଲିସ । ଯାଜପୁର ଏସପି ରାହୁଲ ପି ଆର ସାମ୍ବାଦିକ ସମ୍ମିଳନୀରେ ଝରାଫୁଲ ହତ୍ୟାକାଣ୍ଡ ନେଇ ସବିଶେଷ ତଥ୍ୟ ଦେଇଛନ୍ତି ।
ସୂଚନା ମୁତାବକ ଝରାଫୁଲ ଠାରୁ ପ୍ରେମିକ ରାକେଶ ସ୍ବାଇଁ ବିଭିନ୍ନ ସମୟରେ ଟଙ୍କା ଧାର ଆକାରରେ ନେଇଥିଲା କିନ୍ତୁ, ଟଙ୍କା ଫେରାଉନଥିଲା । ଝରାଫୁଲ ଟଙ୍କା ଫେରାଇବାକୁ ଜିଦ ଧରିବାରୁ ରାକେଶ ତାକୁ ହତ୍ୟା କରିବାକୁ ଯୋଜନା କରିଥିଲା । ଗତ ଜାନୁଆରି ୨୬ ତାରିଖ ଦିନ ରାକେଶ ଭୁବନେଶ୍ବରର ଏକ ହୋଟେଲରେ ଝରାଫୁଲକୁ ରଖିଥିଲା । ସେଠାରେ ଝରାଫୁଲକୁ ଜବରଦସ୍ତ ମଦ ପିଇଆଇଥିଲା । ସେ ବେହୋସ ହେବା ପରେ ତାକୁ ଅଣନିଶ୍ବାସି କରି ଝରାଫୁଲକୁ ହତ୍ୟା କରିଥିଲା । ହତ୍ୟା ପରେ ତାର ଶବକୁ ଶକ୍ତି ସ୍ବାଇଁ ସହିତ ଏକ ସ୍କୁଟି ସାହାଯ୍ୟରେ ତା ପରଦିନ କୁଆଖିଆ ଥାନା ମୁଳାପାଳ ଛକ ନିକଟସ୍ଥ ରାସ୍ତା କଡରେ ଫିଙ୍ଗି ଉଭୟ ଫେରାର ହୋଇ ଯାଇଥିଲେ ।