ଯାଜପୁର: ଧର୍ମଶାଳା ବିଧାନସଭା ଆସନରେ ପୁଣି ବିଧାୟକ ପ୍ରଣବ ବଳବନ୍ତରାୟଙ୍କ ଉପରେ ଆସ୍ଥା ପ୍ରକଟ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପ୍ରଣବଙ୍କୁ ପ୍ରାର୍ଥୀ କରାଯାଇ ଦଳୀୟ ଟିକେଟ ପ୍ରଦାନ କରିଛନ୍ତି ବିଜେଡି ସୁପ୍ରିମୋ । ପୁଣିଥରେ ବିଜେଡି ଟିକେଟ ମିଳିବା ପରେ ଧର୍ମଶାଳା ବିଧାୟକ ପ୍ରଣବ ବଳବନ୍ତରାୟଙ୍କ ଦେଇଛନ୍ତି ପ୍ରତିକ୍ରିୟା । ଏହାସହ ସେ ମୁଖ୍ୟମନ୍ତ୍ରୀଙ୍କୁ ତାଙ୍କ ପ୍ରତି ବିଶ୍ବାସ ଓ ଭରସା ପାଇଁ କୃତଜ୍ଞତା ଦେଇଛନ୍ତି । ଧର୍ମଶାଳାବାସୀଙ୍କ ଇଚ୍ଛାଶକ୍ତା, ଉତ୍ସାହକୁ ପାଥେୟ କରି ନିର୍ବାଚନୀ ବୈତରଣୀ ପାର ହେବା କଥା ସେ କହିଛନ୍ତି ।
ଖବର ଅନୁଯାୟୀ 2014 ମସିହାରେ ପ୍ରଥମ ଥର ପାଇଁ ପ୍ରଣବଙ୍କୁ ଟିକେଟ ଦେଇ ବିଧାୟକ ହେବାର ସୁଯୋଗ ଦେଇଥିଲେ ବିଜେଡି ସୁପ୍ରିମୋ । ବିଧାୟକ ହେବା ପରେ ଧର୍ମଶାଳା ନିର୍ବାଚନ ମଣ୍ଡଳୀରେ ସରକାରଙ୍କ ଲୋକାଭିମୁଖୀ ଯୋଜନାର ସଫଳ କାର୍ଯ୍ୟକାରୀ କରି ମୁଖ୍ୟମନ୍ତ୍ରୀଙ୍କ ଆସ୍ଥାଭାଜନ ହୋଇଥିଲେ ପ୍ରଣବ । ତାଙ୍କୁ ଦଳୀୟ ଟିକେଟ ମିଳିବା ପରେ ତାଙ୍କର ଅଗଣିତ କର୍ମୀ ଓ ପ୍ରଶଂସକ ବିଧାୟକଙ୍କୁ ଭେଟି ଶୁଭକାମନା ଜଣାଇଛନ୍ତି । ରାଜ୍ୟ ସରକାରଙ୍କର ବିକାଶ ଧାରା ଓ ସବୁବର୍ଗର ଲୋକଙ୍କୁ ସାଥିରେ ନେଇ ବିପୁଳ ସଂଖ୍ୟାରେ ଜିତିବା ନେଇ ସେ ଆଶାବ୍ୟକ୍ତ କରିଛନ୍ତି । ଏହାସହ ଜଣେ ରାଜନେତା କେତେ ବ୍ୟବଧାନରେ ବିଜୟ ହେବ ତାହା ଭୋଟରଙ୍କ ଭଲ ପାଇବା ଉପରେ ନିର୍ଭର କରେ ବୋଲି ସେ କହିଛନ୍ତି । 2014ରେ ନିକଟତମ ପ୍ରତିଦ୍ୱନ୍ଦ୍ୱୀଙ୍କ ଠାରୁ ବହୁଳ ଭୋଟ ବ୍ୟବଧାନରେ ଜିତିବା ଶ୍ରେୟ ଧର୍ମଶାଳାବାସୀଙ୍କୁ ଦେଇଛନ୍ତି ବିଧାୟକ ପ୍ରଣବ ବଳବନ୍ତରାୟ ।