ଯାଜପୁର: ବିଛଣାରେ ରୋଜଗାରିଆ ପୁଅ । ଅର୍ଥ ଅଭାବରୁ ହୋଇପାରୁନି ଚିକିତ୍ସା। ରୋଗ ଯନ୍ତ୍ରଣାରେ କଷ୍ଟ ପାଉଛନ୍ତି 31 ବର୍ଷିୟ ଯୁବକ । ଯେଉଁ ବୟସରେ ରୋଜଗାର କରି ବୃଦ୍ଧ ପିତାମାତାଙ୍କର ସେବା କରିବା କଥା, ସେହି ବୟସରେ ଏବେ ଶଯ୍ୟାଶୟୀ ହୋଇ ବୃଦ୍ଧ ପିତାମାତାଙ୍କ ଦ୍ବାରା ସେବା ପାଉଛନ୍ତି ରାଜୀବ । ଯାଜପୁର କୋରାଇ ବ୍ଲକ ପଥରପଦା ପଞ୍ଚାୟତର ପଥରପଦା ଗ୍ରାମର ରାଜୀବଙ୍କ ବୃଦ୍ଧ ମାଆବାପା, ପତ୍ନୀ ଓ ଦୁଇ କୁନି ପୁଅକୁ ନେଇ ସଂସାର । କିନ୍ତୁ ରାଜୀବଙ୍କ ଏବେ ଦୁଇଟି ଯାକ କିଡନୀ ଖରାପ । ଯାହା କିଛି ଟଙ୍କା ଥିଲା ତାକୁ ଚିକିତ୍ସାରେ ଖର୍ଚ୍ଚ କରିଦେଇଛନ୍ତି । ଆଉ ଏବେ ଔଷଧ ଟିକେ କିଣିବା ପାଇଁ ପାଖରେ ନାହିଁ ସମ୍ବଳ। ଏପଟେ ଏକମାତ୍ର ରୋଜଗାରିଆ ପୁଅର ଚିକିତ୍ସା ଲାଗି ସରକାରୀ ସହାୟତା ପାଇଁ ନିବେଦନ କରିଛନ୍ତି ପରିବାର ଲୋକେ ।
କୋରୋନା ମହାମାରୀ ସମୟରେ ତାଲାବନ୍ଦ ଯୋଗୁଁ ଭିଡ଼ିଓ ସୁଟିଂ କରି ନ ପାରି ଦୀର୍ଘ ଦିନ ଧରି ଘରେ ବସି ରହିବା ପରେ ମାତ୍ର ଅଳ୍ପ କିଛି ମାସ ହେବ ପାଣିକୋଇଲି ଟୋଲଗେଟରେ ସ୍ଵଳ୍ପ ବେତନରେ ଚାକିରୀ କରିଥିଲେ ରାଜୀବ। କିନ୍ତୁ ନିୟତିର ନିର୍ଦ୍ଦେଶ ଥିଲା ଅନ୍ୟ କିଛି। ବୃଦ୍ଧ ପିତାମାତା ପତ୍ନୀ ଓ ଦୁଇ ଛୋଟ ପୁଅଙ୍କୁ ଧରି ସ୍ଵଳ୍ପ ରୋଜଗାରରେ ପରିବାର ଚଳାଉଥିବା ବେଳେ ସପ୍ତାହ ତଳେ ମୁଣ୍ଡ ବିନ୍ଧା ସହିତ ପ୍ରବଳ ବାନ୍ତି ହେବାରୁ ଯାଜପୁର ମୁଖ୍ୟ ଚିକିତ୍ସାଳୟରେ ଦେଖାଇବା ପରେ ଡ଼ାକ୍ତର ତାଙ୍କର ଦୁଇଟି ଯାକ କିଡ଼ନୀ ଶତକଡ଼ା 90 ଭାଗ ନଷ୍ଟ ହୋଇଯାଇଥିବା କହି ତୁରନ୍ତ କଟକ ବଡ଼ ଡାକ୍ତରଖାନାରେ ଆଡ଼ମିଶନ ନେବା ଲାଗି ପରାମର୍ଶ ଦେଇଥିଲେ। ପରେ ରାଜୀବଙ୍କ ବାପା ତାଙ୍କୁ ଭୁବନେଶ୍ବରର ଏମ୍ସ ନେବା ପାଇଁ ସହଯୋଗର ନିବେଦନ କରିଥିବା ରାଜୀବଙ୍କର ସାଙ୍ଗ କହିଛନ୍ତି।