ଜଗତସିଂହପୁର: ନବକୃଷ୍ଣ ଚୌଧୁରୀ ଷ୍ଟାଡିୟମର ହେବ ନବକଳେବର । ଏ ନେଇ ରାଜ୍ୟ ସରକାରଙ୍କ କ୍ରୀଡା ଓ ଯୁବ ସେବା ବିଭାଗ ପକ୍ଷରୁ 64 ଲକ୍ଷ, 4ହଜାର 932 ଟଙ୍କାର ଅନୁଦାନ ମଞ୍ଜୁର ହୋଇଛି ।
ଏପଟେ ଜିଲ୍ଲାପାଳ ପୂର୍ତ୍ତବିଭାଗକୁ ହାତକୁ ନିର୍ମାଣ କାର୍ଯ୍ୟ ଟେକି ଦେଇଛନ୍ତି । ଏହାକୁ ନେଇ ଆପତ୍ତି ଉଠାଇଛନ୍ତି କିଛି ସ୍ଥାନୀୟ କ୍ରୀଡାବିତ ।
ଷ୍ଟାଡିୟମ ନିର୍ମାଣ ଦାୟିତ୍ବ ନେଇଥିବା ଠିକାଦାରଙ୍କ କଥା ନ କହିଲେ ଭଲ । ପୂର୍ବରୁ ପୂର୍ତ୍ତ ବିଭାଗ ଅଧୀନରେ ଥିବା ଅବକାରୀ ବିଭାଗ କୋଠା, ଜିଲା ସଂସ୍କୃତି ଭବନ, ଆଦି କାମ ବର୍ଷ ବର୍ଷ ଧରି ପଡିରହିବା ସହିତ ଏକାଧିକ ଥର ଟେଣ୍ଡର ଡକାଯାଉଛି ।
କାମ ଅତ୍ୟନ୍ତ ନିମ୍ନ ମାନର ହେଉଥିବା ବିଭିନ୍ନ ସମୟରେ ଅଭିଯୋଗ ହୋଇ ଆସୁଛି । ଏପରି ସ୍ଥଳେ ଠିକାଦାରଙ୍କ ପାରିବାପଣିଆ ଓ ଷ୍ଟାଡିୟମ ନିର୍ମାଣ କାର୍ଯ୍ୟ ଶେଷକୁ ନେଇ ପ୍ରଶ୍ନ ଉଠିଛି । ଜିଲ୍ଲାପାଳଙ୍କ ପ୍ରତ୍ୟକ୍ଷ ତତ୍ବାବଧାନରେ ରାଜ୍ୟ କ୍ରୀଡା ଓ ଯୁବ ବ୍ୟାପାର ବିଭାଗ ତରଫରୁ ଆସିଥିବା ଅନୁଦାନକୁ ବିନିଯୋଗ କରାଯିବାକୁ କ୍ରୀଡାବିତ ଦାବି କରିଛନ୍ତି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ