ଜଗତସିଂହପୁର : ମୋବାଇଲରେ ଅନଲାଇନ୍ ଗେମ୍ ନେଲା ଯୁବକଙ୍କ ଜୀବନ । ଏଭଳି ଏକ ଅଭାବନୀୟ ଘଟଣା ଘଟିଛି ଜଗତସିଂହପୁରରେ । ମୃତ ଯୁବକ ଜଣକ ହେଲେ ଜଗତସିଂହପୁର ଭୁଆଶୁଣି ଗାଁର ଭଗବାନ ପରିଡାଙ୍କ ପୁଅ ଦେବେନ୍ଦ୍ର ପରିଡା । ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
ମୋବାଇଲ ଗେମ୍ ସାଜିଲା କାଳ, ସନ୍ଦେହ ଘେରରେ ଯୁବକଙ୍କ ଆତ୍ମହତ୍ୟା !
ପରିବାର ଲୋକଙ୍କ ସୂଚନା ଅନୁଯାୟୀ ଆଜି ସକାଳେ ଦେବେନ୍ଦ୍ରର ଶବ ଝୁଲନ୍ତା ଅବସ୍ଥାରେ ଉଦ୍ଧାର ହୋଇଥିଲା । ଏହାପରେ ପରିବାର ଲୋକେ ପୋଲିସକୁ ନଜଣାଇ ଦେବେନ୍ଦ୍ରଙ୍କ ଅନ୍ତିମ ସଂସ୍କାର ପାଇଁ ଗାଁ ଶ୍ମଶାନକୁ ନେଇଥିଲେ । ତେବେ କୌଣସି ସୁତ୍ରରୁ ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ଖୋଳତାଡ କରିଥିଲା । ପରେ ଶ୍ମଶାନରୁ ମୃତଦେହ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇ ଶବ ବ୍ୟବଚ୍ଛେଦ କରା ଯାଇଛି । ଦେବେନ୍ଦ୍ରର ମୃତ୍ୟୁ କିପରି ଓ କେଉଁ କାରଣ ଯୋଗୁଁ ହେଲା, ଏହା ଏକ ହତ୍ୟାକାଣ୍ଡ ନା ଆତ୍ମହତ୍ୟା ଏବଂ ପରିବାର ଲୋକେ କାହିଁକି ଦେବେନ୍ଦ୍ରର ମୃତ୍ଯୁ ଖବର ପୋଲିସକୁ ଲୁଚାଇଥିଲେ ସେନେଇ ଛାନଭିନ ଆରମ୍ଭ କରିଛି ପୋଲିସ ।