ତ୍ରିକୋଣୀୟ ପ୍ରେମର କରୁଣ ପରିଣତି, ଜଣଙ୍କୁ ହତ୍ୟା କଲା ଅନ୍ୟ ପ୍ରେମିକ

ତ୍ରିକୋଣୀୟ ପ୍ରେମରେ ବଳି ପଡିଛି ଗୋଟିଏ ଜୀବନ । ହତ୍ୟା ପରେ ପଥରରେ ଛେଚି ପୋଖରୀରେ ଫିଙ୍ଗି ଦେଇଛି ଦୃର୍ବୃତ୍ତ ।

ଜଗତସିଂହପୁର: ତ୍ରିକୋଣୀୟ ପ୍ରେମରେ ବଳି ପଡିଛି ଗୋଟିଏ ଜୀବନ । ହତ୍ୟା ପରେ ପଥରରେ ଛେଚି ପୋଖରୀରେ ଫିଙ୍ଗି ଦେଇଛି ଦୃର୍ବୃତ୍ତ । ଏହି ଲୋମ ଟାଙ୍କୁରା ହତ୍ୟାକାଣ୍ଡଟି ହେଉଛି ପାରାଦୀପ ଆଦର୍ଶ ଥାନା ଅଞ୍ଚଳର। ଯେଉଁଠାରେ ଜଣେ ଯୁବତୀଙ୍କ ପ୍ରେମରେ ପଡି ଜଣେ ପ୍ରେମିକକୁ ହତ୍ୟା କରିଛି ଅନ୍ୟ ପ୍ରେମିକ ।

ସୂଚନା ଅନୁଯାୟୀ ପାରାଦୀପ ନୂଆ ବଜାରର ଇନୋଭା ଚାଳକ ଶରତ ଜେନା ଗତ 18 ତାରିଖ ବିଳମ୍ବିତ ରାତିରୁ ନିଖୋଜ ରହିଥିଲେ । ଯାହାଙ୍କ ମୃତଦେହ କଟକ ଜିଲ୍ଲା ଚୌଦ୍ବାର ଅଞ୍ଚଳରୁ ମିଳିବା ପରେ ପୋଲିସ ଛାନଭିନ ଆରମ୍ଭ କରିଥିଲା। ଏହି ଘଟଣାକୁ ନେଇ ଅଭିଯୁକ୍ତ ଇମାମ ଉର୍ଦ୍ଧିନକୁ ପୋଲିସ ଗିରଫ କରିଛି।

ସେପଟେ ଜଣେ ମହିଳାଙ୍କ ସହ ତ୍ରିକୋଣୀୟ ପ୍ରେମକୁ ନେଇ ଏହି ହତ୍ୟାକାଣ୍ଡ ହୋଇଥିବା ପୋଲିସ ସୂଚନା ଦେଇଛି। ଜଣେ ମହିଳାଙ୍କ ସହ ଶରତ ଓ ଇମାମର ପ୍ରେମ ସମ୍ପର୍କ ରହିଥିଲା। ତେଣୁ ଶରତକୁ ରାସ୍ତାରୁ ସଫା କରିବା ପାଇଁ ଘଟଣା ଦିନ ପ୍ରଚୁର ମଦ୍ୟପାନ କରି ଶରତର ମୁଣ୍ଡକୁ ପଥରରେ ଛେଚି ହତ୍ୟା କରିଥିବା ଅଭିଯୁକ୍ତ ଇମାମ ସ୍ବୀକାର କରିଛି।

ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ