ଜଗତସିଂହପୁର: ଆଗକୁ ଆସୁଛି ଉପନିର୍ବାଚନ । ଏଥିଲାଗି ହେଭିୱେଟ ନେତାଙ୍କ ପ୍ରଚାର ଜୋରସୋର ଚାଲିଛି । ଜଗତସିଂହପୁର ଜିଲ୍ଲାର ତିର୍ତ୍ତୋଲ ଉପନିର୍ବାଚନ ପାଇଁ ଆଜି (ଗୁରୁବାର) ବିଜେପି ନେତ୍ରୀ ତଥା ଭୁବନେଶ୍ୱର ସାଂସଦ ଅପରାଜିତ ଷଡ଼ଙ୍ଗୀ ବିରିଡି ବ୍ଲକର ବିଭିନ୍ନ ପଞ୍ଚାୟତ ବୁଲି ରୋଡ଼ ସୋ କରିବା ସହ ବିଜେପି ପ୍ରାର୍ଥୀ ରାଜକିଶୋର ବେହେରାଙ୍କ ପାଇଁ ପ୍ରଚାର କରିଛନ୍ତି । ଆଜି ଦିନ ଗୋଟାଏ ସୁଦ୍ଧା ଅପରାଜିତା ବାଲିଆ ଷ୍ଟୋର ନିକଟରେ ପହଞ୍ଚିଥିଲେ ।
ବିଜେପିକର୍ମୀମାନେ ତାଙ୍କୁ ପାଛୋଟି ନେବା ସହ ସେଠାରୁ ଏକ ରୋଡ଼ ସୋ ଆରମ୍ଭ କରାଯାଇଥିଲା । ବିଭିନ୍ନ ସ୍ଥାନରେ ବିଜେପି କର୍ମୀମାନେ ଅପରାଜିତାଙ୍କୁ ଭେଟିବା ପାଇଁ ପ୍ରବଳ ଭିଡ ଲଗାଇଥିଲେ । ବିଶେଷ କରି ମହିଳାମାନଙ୍କ ସହ ଭୁବନେଶ୍ୱର ସାଂସଦ କଥା ହେବା ସହ ବିଜେପିକୁ ଭୋଟ ଦେବା ପାଇଁ ନିବେଦନ କରିଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବାର୍ତ୍ତାକୁ ପ୍ରଚାର କରିବାକୁ ଆସିଥିବା ସେ କହିଛନ୍ତି । ଆଗାମୀ ଦିନରେ ତିର୍ତ୍ତୋଲ ନିର୍ବାଚନ ମଣ୍ଡଳୀରେ ବିଜେପି ନିଶ୍ଚିନ୍ତ ବିଜୟ ହେବ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
