ଜଗତସିଂହପୁର: ସମ୍ପର୍କରେ ଲାଗିଲା ଛିଟା । ଦଶମାସ ଦଶଦିନ ଯନ୍ତ୍ରଣା ସହି ଜନ୍ମ ଦେଇଥିବା ମାଆକୁ ଧାରୁଆ କଟୁରୀରେ ହାଣି ହତ୍ୟାକଲା ନୃସଂଶ ପୁଅ । ଜଗତସିଂହପୁର ଜିଲ୍ଲା ପାରାଦ୍ବୀପ ଉପକଣ୍ଠ ଭୂତ ମୁଣ୍ଡେଇ ଗ୍ରାମ ବେହେରା ସାହିରେ ଏଭଳି ଏକ ଜଘନ୍ୟ ହତ୍ୟାକାଣ୍ଡ ଘଟିଛି । ମୃତ ମହିଳା ଜଣକ ହେଉଛନ୍ତି ଭୂତ ମୁଣ୍ଡେଇ ଗ୍ରାମର ସୁଲୋଚନା ଦେଇ ।
ସୂଚନା ଅନୁଯାୟୀ, ସୁଲୋଚନା ଦେଇ ସ୍ଥାନୀୟ ଶ୍ରୀମା ସରକାରୀ ଉଚ୍ଚ ବିଦ୍ୟାଳୟରେ ଶିକ୍ଷୟତ୍ରୀ ଭାବରେ କାର୍ଯ୍ୟ କରୁଥିଲେ । ଗତ ସୋମବାର ତାଙ୍କ ଘରେ ଶ୍ରାଦ୍ଧ ଥିବାରୁ ସମ୍ପର୍କୀୟ ଓ ସାହି ଭାଇଙ୍କୁ ନିମନ୍ତ୍ରଣ କରି ଭୋଜିର ଆୟୋଜନ କରିଥିଲେ । ଶ୍ରାଦ୍ଧ ସରିବା ପରେ ବିଳମ୍ବିତ ରାତ୍ରୀ ପର୍ଯ୍ୟନ୍ତ ଅତିଥିମାନେ ଆସି ଭୋଜି ଖାଇଥିଲେ। ଆଜି ସକାଳୁ କିଛି ସମ୍ପର୍କୀୟ ଘରେ ଥିବାବେଳେ ସୁଲୋଚନାଙ୍କ ସାନପୁଅ ଅଂଶୁମାନ ତାଙ୍କୁ ପାଣି ମାଗିଥିଲା। ସୁଲୋଚନା ଘରର ବାରଣ୍ଡାରେ ମୁଣ୍ଡ କୁଣ୍ଡଉଥିବା ହେତୁ ପୁଅକୁ ପାଣି ଦେବାରେ ବିଳମ୍ବ ହୋଇଥିଲା । ଏହି କାରଣରୁ ପୁଅ ଅଂଶୁମାନ ରାଗିଯାଇ ପାଟିତୁଣ୍ଡ କରିଥିଲା । ଏହା ଦେଖି ସମ୍ପକୀୟ ଲୋକେ ଅଂଶୁମାନକୁ ବୁଝାଇବାକୁ ଚେଷ୍ଟା କରିଥିଲେ ମଧ୍ୟ ବିଫଳ ହୋଇଥିଲେ । ସୁଲୋଚନା ପାଣିନେଇ ଆସିବା ସମୟରେ ଅଂଶୁମାନ ଘରେ ଥିବା ଏକ ଧାରୁଆ କଟୁରୀରେ ତାଙ୍କ ବେକକୁ ହାଣିବାରେ ଲାଗିଥିଲା । ଜୀବନ ବିକଳରେ ସେ ଘରୁ ବାହାରକୁ ଦୌଡ଼ି ପଳେଇବାକୁ ଚେଷ୍ଟା କରିଥିଲେ ମଧ୍ୟ ଯାଇ ନପାରି ଦାଣ୍ଡରେ ପଡି ଯାଇଥିଲେ। ତେବେ ଏତିକିରେ ସରିନଥିଲା ପୁଅର ନୃଶଂସତା । ଦାନବ ରୂପୀ ଅଂଶୁମାନ ବାରମ୍ବାର ମାଆକୁ ହାଣିବାକୁ ଲାଗିଥିଲା । ଫଳରେ ଘଟଣାସ୍ଥଳରେ ହିଁ ସୁଲୋଚନାଙ୍କ ମୃତ୍ୟୁ ଘଟିଥିଲା ।