ପାରାଦ୍ଵୀପ: ଜଗତସିଂହପୁର ଜିଲ୍ଲା ପାରାଦ୍ଵୀପ ଲକ୍ ଥାନା ଅନ୍ତର୍ଗତ ଝିମାଣୀ ଗ୍ରାମରେ ବନ୍ଧୁକ ମୁନରେ ଲୁଟ୍ । ଗତକାଲି(ବୁଧବାର) ବିଳମ୍ବିତ ରାତିରେ ଝିମାଣୀ ଗ୍ରାମର ଶଶିକାନ୍ତ ତରାଇଙ୍କ ଘରେ ୧୦ ରୁ ୧୨ ଜଣ ବ୍ୟକ୍ତି ପଶି ୩ ଲକ୍ଷରୁ ଊର୍ଦ୍ଧ୍ବ ଟଙ୍କାର ସୁନା ଗହଣା ଓ ନଗଦ ୨୦ ହଜାର ଟଙ୍କା ଲୁଟି ନେଇଛନ୍ତି ।
ସୂଚନା ଅନୁଯାୟୀ ରାତିରେ ଶଶିକାନ୍ତ ତରାଇଙ୍କ ଘରେ ସମସ୍ତେ ଶୋଇ ଥିବାବେଳେ ଛାତ ଡେଇଁ କିଛି ଦୂର୍ବୁତ୍ତ ଘରେ ପଶି ପ୍ରଥମେ ସଫଳା ତରାଇ ଓ ତାଙ୍କ ପୁତୁରା ମୁନା ମାଝୀଙ୍କ ମୁଣ୍ଡରେ ବନ୍ଧୁକ ଓ ଭୁଜାଲି ଲଗାଇ ପୁଅ ବୋହୂ ଶୋଇଥିବା ଘର କବାଟ ବାଡେଇ ସେମାନଙ୍କୁ ଉଠାଇଥିଲେ । ସେମାନେ ଉଠିବା ପରେ ସମସ୍ତଙ୍କୁ ବନ୍ଧୁକ ମୁନରେ ଚୁପ୍ କରାଇବା ସହିତ ଘରେ ଥିବା ସୁନା ରୂପା ଅଳଙ୍କାର ଓ ନଗଦ ଟଙ୍କା ଲୁଟି ନେଇଛନ୍ତି । ପରେ ସେମାନଙ୍କୁ ବାଧ୍ୟକରି ପାଣି ପିଇବାକୁ ଦେଇଥିଲେ । ପାଣି ପିଇବା ପରେ ସମସ୍ତେ ବେହୋସ୍ ହୋଇ ପଡିଥିଲେ । ସକାଳୁ ସଫଳାଙ୍କ ସ୍ବାମୀ ଘରେ ପହଞ୍ଚି ସମସ୍ତ ୪ ଜଣଙ୍କୁ ବେହୋସ୍ ଅବସ୍ଥାରେ ଉଦ୍ଧାର କରି ଅଠରବାଙ୍କି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଛନ୍ତି ।