ପାରାଦ୍ୱୀପ: ବନ୍ଦର ପୋତାଶ୍ରୟରେ ଅଳ୍ପକେ ବର୍ତ୍ତିଲା ଡ୍ରୋଜର ଓ ଏହା ମଧ୍ୟରେ ଥିବା କର୍ମଚାରୀ । ପାନୀୟ ଜଳ ନେବାକୁ ପାରାଦୀପ ବର୍ଥକୁ ଆସୁଥିବା ବେଳେ ହଠାତ ବର୍ଷା ପବନ ଯୋଗୁଁ ଏକ ବାଲିଚର ଉପରକୁ ଡ୍ରୋଜରଟି ଚଢି ଯାଇଥିଲା । ତେବେ ପାରାଦ୍ୱୀପର ୨ଟି ମେରାଇନ ବୋଟ ସାହାଯ୍ୟରେ ତୁରନ୍ତ ରଶି ପକାଇ ଡ୍ରୋଜରକୁ ସୁରକ୍ଷିତ ଭାବେ ଇକ୍ୟୁବର୍ଥରେ ଲଗାଯାଇଥିବା ସୂଚନା ମିଳିଛି । ଡ୍ରୋଜରରେ ଥିବା ସମସ୍ତ କର୍ମଚାରୀ ସୁରକ୍ଷିତ ।
ସୂଚନା ଅନୁସାରେ, ବୁଧବାର ଦିନ ୧୧ଟା ସମୟରେ ଡିସିଆଇର ଡ୍ରୋଜର ପାନୀୟ ଜଳ ନେବାକୁ ପାରାଦ୍ୱୀପ ବର୍ଥକୁ ଆସିଥିଲା । ଏହି ସମୟରେ ହଠାତ୍ ବର୍ଷା ଓ ପବନ ହେବାରୁ ଭାରସାମ୍ୟ ହରାଇ ଡ୍ରୋଜରଟି ବନ୍ଦର ମଧ୍ୟରେ ଥିବା ଏକ ବାଲିଚର ଉପରକୁ ଚଢି ଯାଇଥିଲା । ଏହାପରେ ସଙ୍ଗେସଙ୍ଗେ ୨ଟି ମେରାଇନ ବୋଟ ସାହାଯ୍ୟରେ ରଶି ପକାଇ ଡ୍ରୋଜରକୁ ସୁରକ୍ଷିତ ଭାବେ ଇକ୍ୟୁବର୍ଥରେ ଲଗାଯାଇଛି । ତେବେ ଡ୍ରୋଜରରେ ଥିବା ସମସ୍ତ କର୍ମଚାରୀମାନେ ସୁରକ୍ଷିତ ଥିବାବେଳେ ଡ୍ରୋଜରର ମଧ୍ୟ କୌଣସି କ୍ଷତି ହୋଇନଥିବା ଜଣାପଡିଛି । ପ୍ରକାଶ ଥାଉକି ଏହି ଡ୍ରୋଜର ପାରାଦ୍ୱୀପ ସମୁଦ୍ରରେ ବାଲି ଖନନ କାର୍ଯ୍ୟରେ ନିୟୋଜିତ ହୋଇଛି । ଜାହାଜ ଗୁଡିକ ବନ୍ଦର ଭିତରକୁ ଯାଆ ଆସ କରିବା ପାଇଁ ଏହି ଖନନ ସହାୟକ ହୋଇଥାଏ ।
ଇଟିଭି ଭାରତ, ଜଗତସିଂହପୁର
