ବରଯାତ୍ରୀଙ୍କୁ ସାଙ୍ଗରେ ନେଇ ବିବାହ କଲେ ମହାଦେବ

ଜଗତସିଂହପୁରରେ ଶିବ ବିବାହକୁ ନେଇ ଚଳଚଞ୍ଚଳ ସୋମନାଥ ମୁଚୁକୁନ୍ଦ ମହାଦେବଙ୍କ ମନ୍ଦିର । ବରବେଶରେ ମାତା ପାର୍ବତୀଙ୍କ ଘରେ ପହଞ୍ଚି ବିବାହ କରିଛନ୍ତି ପ୍ରଭୁ ମହାଦେବ ।

ଜଗତସିଂହପୁର: ସହରର ସୋମନାଥ ମୁଚୁକୁନ୍ଦ ମହାଦେବଙ୍କ ମନ୍ଦିରରେ ଶୀତଳ ଷଷ୍ଠୀ ଓ ଶିବ ବିବାହ ମହୋତ୍ସବ ମହାଡ଼ମ୍ବରରେ ପାଳିତ ହେଉଛି । ଦେବ ବିବାହ ପାଇଁ ନିର୍ବନ୍ଧ ଦେବବନ୍ଦାପନା ସହ ବରାନୁଗମ କରି ବିରାଟ ପଟୁଆରରେ ବିବାହ ପାଇଁ ବାହାରିଛନ୍ତି ମହାଦେବ।

ସାଥିରେ ବରଯାତ୍ରୀଙ୍କୁ ସାଙ୍ଗରେ ଧରି କନ୍ୟା ଘରେ 8ଟା 40 ସମୟରେ ପହଞ୍ଚିଛନ୍ତି । ସେଠାରେ ବୈଦିକ ରୀତିନୀତିରେ ବିବାହ କାର୍ଯ୍ୟ ଅନୁଷ୍ଠିତ ହୋଇଛି । ଶିବ ବିବାହକୁ ନେଇ ଜଗତସିଂହପୁର ଚଳଚଞ୍ଚଳ ହୋଇ ଉଠିଥିବା ବେଳେ ରଙ୍ଗ ବେରଙ୍ଗର ଆଲୋକସଜ୍ଜା ସାଙ୍ଗକୁ ଆତସବାଜିରେ ସହର ପ୍ରକମ୍ପିତ ହେଉଛି।

ଅପରାହ୍ନ 4 ଟାରୁ ମହାଦେବ ଶିବ ସହର ପରିକ୍ରମା କରିଥିଲେ ଯାହାକୁ ନେଇ ସାରା ଅଞ୍ଚଳରେ ଏକ ଆଧ୍ୟତ୍ମିକ ପରିବେଶ ସୃଷ୍ଟି ହୋଇଥିଲା । ଶୈବପୀଠରେ ଶହସ୍ରାଧିକ ଶ୍ରଦ୍ଧାଳୁଙ୍କ ଭିଡ଼ ହେଉଥିବାବେଳେ ଆଜି ଦୁଇ ହଜାର ଭକ୍ତଙ୍କ ପାଇଁ ପ୍ରସାଦ ସେବନର ବ୍ୟବସ୍ଥା ହୋଇଛି ।

ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ