ଜଗତସିଂହପୁର: ବନ୍ୟା ଯୋଗୁଁ ଜୀବିକା ହରାଇଛନ୍ତି ଜିଲ୍ଲାର ଚାଷୀକୂଳ । ପନିପରିବା ଚାଷ ବିଶେଷ ଭାବେ କ୍ଷତିଗ୍ରସ୍ତ ହୋଇଛି । ଜିଲ୍ଲାର ବିରିଡି, ନାଉଗାଁ ଓ ଏରସମା ବ୍ଲକ ଦେଇ ପ୍ରବାହିତ ଦେବୀ ନଦୀ ଓ ରଘୁନାଥପୁର, ତିର୍ତ୍ତୋଲ କୁଜଙ୍ଗ ଦେଇ ପ୍ରବାହିତ ମହାନଦୀ ପଠାରେ ସ୍ଥାନୀୟ ଚାଷୀ ହଜାର ହଜାର ହେକ୍ଟର ଚାଷ ଜମିରେ ବିଭିନ୍ନ ପ୍ରକାରର ପନିପରିବା ଚାଷ କରିଥାନ୍ତି।
ଚଳିତ ବର୍ଷ ମଧ୍ୟ ସାରୁ, ଝୁଡଙ୍ଗ, ବାଇଗଣ, ଛଚିନ୍ଦ୍ରା, କଖାରୁ, ଲଙ୍କା, ପୋଟଳ, ବିନସ, ଆଦି ଫସଲ ସମ୍ପୂର୍ଣ୍ଣ ନଷ୍ଟ ହୋଇଛି। ଋଣ କରି ଜମିରେ ଫସଲ ଫଳାଇଥିବା ଚାଷୀ ସବୁ କିଛି ନଷ୍ଟ ହେଇଯିବା ଦେଖି ମୁଣ୍ଡ କୋଡୁ ଛନ୍ତି । ଘରେ ଖାଇବାକୁ ଦାନା ନଥିବା ବେଳେ ପାଖରେ ଟଙ୍କା ମଧ୍ୟ ନାହିଁ । କିପରି ପରିବାର ପ୍ରତିପୋଷଣ କରିବେ ସେ ନେଇ ଚିନ୍ତାରେ ଚାଷୀ ।
ଅନ୍ୟପଟେ ଜିଲ୍ଲା କୃଷି ବିଭାଗ ବନ୍ୟା ଜନିତ କ୍ଷୟକ୍ଷତିର ପ୍ରାଥମିକ ରିପୋର୍ଟ ପ୍ରଦାନ କରିଛି । କୃଷି ବିଭାଗର ରିପୋର୍ଟ ଅନୁଯାୟୀ, ବନ୍ୟାରେ 2,6184 ହେକ୍ଟର ଚାଷଜମି କ୍ଷତିଗ୍ରସ୍ତ ହୋଇଛି । କିନ୍ତୁ ବାସ୍ତବରେ ସରକାରୀ ରିପୋର୍ଟ ଠାରୁ ବହୁ ମାତ୍ରାରେ ପରିବା ଚାଷ ଓ ଖରିପ ଧାନ ଚାଷ ନଷ୍ଟ ହୋଇଥିବା କୁହାଯାଉଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ