ଜଗତସିଂହପୁର: ଜିଲ୍ଲାର ଶିଶୁ ମଙ୍ଗଳ ଅଧିକାରୀ ଦ୍ବାରା ପରିଚାଳିତ ଚାଟରାସ୍ଥିତ ଶିଶୁ ଆଶ୍ରମକୁ ନେଇ ସନ୍ଦେହ ସୃଷ୍ଟି ହୋଇଛି । ଏହି ଆଶ୍ରମରୁ ବାରମ୍ବାର ଅନ୍ତେବାସୀ ନାବାଳକ କିପରି ନିଖୋଜ ହୋଇ ଯାଉଛନ୍ତି ଓ ଏହାର ପରିଚାଳକ କିମ୍ବା ସୁରକ୍ଷା ଦାୟିତ୍ବରେ ଥିବା କର୍ମଚାରୀ କିପରି ଜାଣି ପାରୁନାହାଁନ୍ତି ଏହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
ପିଲା ନିଖୋଜ ହୋଇଗଲା ପରେ ଶିଶୁ ଆଶ୍ରମ ପରିଚାଳକ ଥାନାରେ ଏତଲା ଦେଇ ଦାୟିତ୍ବ ଖସାଇ ଦେଉଥିବା ବେଳେ ପୋଲିସ ମଧ୍ୟ ଏଦିଗରେ ବିଶେଷ ଆଗ୍ରହ ପ୍ରକାଶ କରୁନାହିଁ । ଯାହାକୁ ନେଇ ଅନାଥ ଶିଶୁମାନଙ୍କୁ ଭଗବାନଙ୍କ ଭରସା ଛଡା ଆଉ ଅନ୍ୟଗତି ନାହିଁ ।
ଶିଶୁ ଆଶ୍ରମରୁ ଏକ ମାସରେ 2 ପିଲା ଗାଏବ ଗତ 1 ତାରିଖରେ ସଦରଥାନା ଅନ୍ତର୍ଗତ କେନ୍ଦାଳ ଗ୍ରାମର କାର୍ତ୍ତିକ ପାତ୍ର ନାମକ ଜଣେ ନାବାଳକ ନିଖୋଜ ହୋଇ ଯାଇଥିଲେ । ଏଯାବତ ତାର ସନ୍ଧାନ ପାଇପାରିନି ପୋଲିସ କି ଶିଶୁ ମଙ୍ଗଳ ଅଧିକାରୀ । ସେହିପରି ଅନୁରୂପ ଜଗତସିଂହପୁର ସହରର ସୋମନାଥ ହାଟରେ ବାଲେଶ୍ବର ଅଞ୍ଚଳର ଜୈନକ ନାବାଳକ ଭିକ୍ଷାବୃତ୍ତି କରିବା ସମୟରେ ଧରା ପଡିଥିଲା । ପୋଲିସ ତାକୁ CWCରେ ହାଜର କରିବା ପରେ ଶିଶୁ ଆଶ୍ରମକୁ ପଠାଇ ଦେଇଥିଲା । କିନ୍ତୁ ଶିଶୁ ଆଶ୍ରମରେ 2 ଦିନ ରହିବା ପରେ ସେ ପୁଣି କେଉଁଆଡେ ନିଖୋଜ ହୋଇଯାଇଥିଲା ।
ଏହିଭଳି ଘଟଣା ବାରମ୍ବାର ଘଟୁଥିଲେ ମଧ୍ୟ କିଛି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ । ଏସମ୍ପର୍କରେ ଆମ ଇଟିଭି ଭାରତ ପ୍ରତିନିଧି ପୋଲିସର ପ୍ରତିକ୍ରିୟା ନେବାକୁ ଚାହିଁଥିଲେ ବି ସେ କ୍ୟାମେରା ଆଗରେ କିଛି କହିବାକୁ ସଫା ସଫା ମନା କରିଦେଇଛନ୍ତି ।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
