ଜଗତସିଂହପୁର:ନାଳ ଭିତରୁ ହୋମଗାର୍ଡଙ୍କ ମୃତଦେହ ଉଦ୍ଧାର । ଜଗତସିଂହପୁର ଥାନା ଅନ୍ତର୍ଗତ ଉରାଳୀ ପଞ୍ଚାୟତର ଟିଟିଗାଁ କଡ଼ନାଳ ଭିତରେ ହୋମଗାର୍ଡଙ୍କ ମୃତଦେହ ପଡ଼ିଥିବା ଦେଖି ଗ୍ରାମବାସୀ ଥାନାକୁ ଖବର ଦେଇଥିଲେ । ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ଜିଲ୍ଲା ମୁଖ୍ୟଚିକିତ୍ସାଳୟକୁ ପଠାଇଛି । ମୃତକ ଜଣଙ୍କ ଉକ୍ତ ଗ୍ରାମର ବାବାଜୀ ଚରଣ ବେହେରାଙ୍କ ପୁଅ ସୋମନାଥ ବେହେରା । ସେ ଜଗତସିଂହପୁର ଥାନାରେ ହୋମ ଗାର୍ଡ ଭାବେ କାର୍ଯ୍ୟରତ ଥିଲେ ।
ଗତରାତିରେ ଥାନାକୁ ଡ୍ୟୁଟି କରିବାକୁ ଆସିଥିବା ବେଳେ ଟିଟିଗାଁର ମାଉସୀ ମା ମନ୍ଦୀର ନିକଟରେ ଥିବା ପାଖ ନାଳରେ ପଡିଯାଇଥିଲେ ସୋମନାଥ । ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିବା ଗ୍ରାମବାସୀ କହିଛନ୍ତି । ତେବେ ସୋମନାଥଙ୍କ ମୃତ୍ୟୁର କାରଣ କଣ ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇନାହିଁ । ସୋମନାଥ ଘରର ଏକ ମାତ୍ର ରୋଦଗାରିଆ ପୁଅ ହୋଇଥିବା ବେଳେ ପୁଅକୁ ହରାଇ ଏବେ ଦୁଃଖରେ ଭାଙ୍ଗି ପଡିଛନ୍ତି ବାପା ମା । ତେବେ ନାଳରେ ପଡି ହୋମଗାର୍ଡଙ୍କର ମୃତ୍ୟୁ ହୋଇଛି ନା କେହି ହତ୍ୟା କରି ତାଙ୍କୁ ଏମିତି ଫୋପାଡି ଦେଇଛି ସେନେଇ ପୋଲିସ ତଦନ୍ତ ଆରମ୍ଭ କରିଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ