ଜଗତସିଂହପୁର: ଧରାବତରଣ କରିଛନ୍ତି ମା' ମହାମାୟା । ବହୁ ଆଡ଼ମ୍ବରରେ ଚାଲିଛି ମାଙ୍କ ପୂଜାର୍ଚ୍ଚନା । ଆଜି ମା' ଦୁର୍ଗାଙ୍କ ମହାନବମୀ ପୂଜା । ଯାହାକୁ ନେଇ ଚଳଚଞ୍ଚଳ ହୋଇ ଉଠିଛି ଜଗତସିଂହପୁର ସହର । ମା'ଙ୍କ ଦର୍ଶନ କରିବା ପାଇଁ ପୂଜା ମଣ୍ଡପ ନିକଟରେ ଭକ୍ତଙ୍କ ପ୍ରବଳ ଭିଡ ପରିଲକ୍ଷିତ ହୋଇଛି । ହଜାର ହଜାର ଶ୍ରଦ୍ଧାଳୁ ବିଭିନ୍ନ ପୂଜା ମଣ୍ଡପରେ ମା'ଙ୍କ ଦର୍ଶନ କରୁଛନ୍ତି । ସେପଟେ ହିନ୍ଦୁ ଓ ମୁସଲମାନ ମିଶି ପୂଜା ପରିଚାଳନା କରୁଥିବା ବେଳେ ଭାଇଚାରାର ଉଦାହରଣ ସାଜିଛନ୍ତି ।
ଜଗତସିଂହପୁର ଜିଲ୍ଲାର ବିଭିନ୍ନ ପୂଜା ମଣ୍ଡପରେ ଆଜି ସନ୍ଧ୍ୟାରେ ମହାନବମୀ ପୂଜା ଅନୁଷ୍ଠିତ ହୋଇଛି । ଆଜି ୩ ଦିନାତ୍ମକ ପୂଜାର ଶେଷ ଦିନ ହୋଇଥିବାରୁ ଚରୁ ଓ ଚଣ୍ଡୀ ଆହୂତି ହୋଇଥିଲା । ସକାଳୁ ଷୋଡ଼ଶ ଉପଚାର ପୂଜା ପରେ ମହାନବମୀ ବିହିତ ପୂଜା ଅନୁଷ୍ଠିତ ହୋଇଥିଲା । ଆଜି ସନ୍ଧ୍ୟାରେ ବର୍ଷା ସ୍ୱତେ ସହରରେ ଶ୍ରଦ୍ଧାଳୁଙ୍କ ଭିଡ଼ ଜମିଛି । ଆସନ୍ତାକାଲି (ମଙ୍ଗଳବାର) ଜଗତସିଂହପୁର ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ରାବଣ ପୋଡି଼ ହେବାର କାର୍ଯ୍ୟକ୍ରମ ରହିଛି । ତେବେ ବୁଧବାର ଦିନ ଦେବୀଙ୍କ ଭସାଣ କାର୍ଯ୍ୟ ଅନୁଷ୍ଠିତ ହେବ । ଆସନ୍ତାକାଲି ଦଶହରା ଥିବାରୁ ଅପରାଜିତା ପୂଜା ପରେ ମୁଣ୍ମୟୀ ମୃର୍ତ୍ତିଙ୍କୁ ବିସର୍ଜନ କରାଯିବ ।
ଏହା ମଧ୍ୟ ପଢ଼ନ୍ତୁ....ଶାରଦୀୟ ଦୁର୍ଗାପୂଜାରେ ଚଳଚଞ୍ଚଳ ମାଆ ଶାରଳା ପୀଠ, ଶାକ୍ତ ଓ ବୈଷ୍ଣବ ଧର୍ମର ସମନ୍ୱୟ ଶକ୍ତି ପୀଠ