ଅନିଶ୍ଚିତତା ମଧ୍ୟରେ ବର୍ଜ୍ୟବସ୍ତୁ ପରିଚାଳନା କେନ୍ଦ୍ର, ସହରବାସୀ ହନ୍ତସନ୍ତ

ଜଗତସିଂହପୁର ସହରରେ ଡମ୍ପୟାର୍ଡ ନିର୍ମାଣକୁ ନେଇ ସମସ୍ୟା ଲାଗି ରହିଛି। ଏହା ମଧ୍ୟରେ ପାଞ୍ଚ ବର୍ଷ ବିତିଯାଇଥିଲେ ମଧ୍ୟ ଡମ୍ପୟାର୍ଡ ନିର୍ମାଣ ପରିକଳ୍ପନା ଭିତରେ ରହିଯାଇଛି।

ଜଗତସିଂହପୁର: ଜଗତସିଂହପୁର ସହରରେ ଡମ୍ପୟାର୍ଡ ନିର୍ମାଣକୁ ନେଇ ସମସ୍ୟା ଲାଗି ରହିଛି। ଏହା ମଧ୍ୟରେ ପାଞ୍ଚ ବର୍ଷ ବିତିଯାଇଥିଲେ ମଧ୍ୟ ଡମ୍ପୟାର୍ଡ ନିର୍ମାଣ ପରିକଳ୍ପନା ଭିତରେ ରହିଯାଇଛି।

ଜିଲ୍ଲା ପ୍ରଶାସନ ଓ ପୌର ପ୍ରଶାସନ ମିଳିତ ଭାବରେ ସହର ଉପକଣ୍ଠ କଣ୍ଟା ବଲଭପୁରରେ ଜାଗା ଚିହ୍ନଟ କରିଥିଲେ । ସେଥିପାଇଁ ଟେଣ୍ଡର କରାଯାଇ 9 ଲକ୍ଷ ଟଙ୍କାର ଟେଣ୍ଡର ଆହ୍ବାନ ମଧ୍ୟ କରାଯାଇଥିଲା। ଟେଣ୍ଡର ପକାଇଥିବା ଠିକାଦାରଙ୍କୁ କାର୍ଯ୍ୟାଦେଶ ପ୍ରଦାନ କରାଗଲା । କିନ୍ତୁ ଦୀର୍ଘ ଦିନ ବିତିଯାଇଥିଲେ ମଧ୍ୟ ଏପର୍ଯ୍ୟନ୍ତ କାର୍ଯ୍ୟ ଆରମ୍ଭ ହୋଇନାହିଁ ।

ଏହାପରେ ପ୍ରଶାସନ କଣ୍ଟାବଲଭପୁର ନିର୍ମାଣକୁ ସ୍ଥଗିତ ରଖି ଯୋଗଧାରୀ ନିକଟରେ ବର୍ଯ୍ୟବସ୍ତୁ ପରିଚାଳନା କେନ୍ଦ୍ର ନିର୍ମାଣ ପାଇଁ ଜାଗା ଚିହ୍ନଟ କରିଥିଲା । ପ୍ରଶାସନ ପରିକଳ୍ପନା କରିଥିଲା ଯେ ସହରରୁ ପ୍ରତ୍ୟେକ ଦିନ ବାହାରୁ ଥିବା ଟ୍ରକ ଟ୍ରକ କଠିନ ଓ ତରଳ ବର୍ଜ୍ୟବସ୍ତୁକୁ ପୃଥକୀକରଣ କରାଯାଇ କଠିନ ଜାତୀୟ ଦ୍ରବ୍ୟକୁ ବରଗଡ ସିମେଣ୍ଟ କାରଖାନାକୁ ପଠାଇଥାନ୍ତା। ସେହିପରି ତରଳ ପଦାର୍ଥକୁ ଖତ ପ୍ରକ୍ରିୟାକରଣ କରାଯାଇ ଚାଷ କାର୍ଯ୍ୟରେ ବିନିଯୋଗ କରିଥାନ୍ତେ । କିନ୍ତୁ ପ୍ରଶାସନର ପରିକଳ୍ପନା ଖାଲି କାଗଜପତ୍ରରେ ରହି ଯାଇଛି।

ବର୍ତ୍ତମାନ କିନ୍ତୁ ପ୍ରଶାସନ ସହରର ପ୍ରବେଶ ଦ୍ବାର କଲେଜ ଛକ ନିକଟରେ କୁଢ଼ କୁଢ଼ ଆବର୍ଜନା ଗଦା କରୁଛି। ଯାହାକୁ ନେଇ ସ୍ଥାନୀୟ ଅଞ୍ଚଳରେ ଉଦବେଗ ପ୍ରକାଶ ପାଇଛି। ସ୍ଥାନୀୟ ଅଞ୍ଚଳରେ କଲେଜ, ମନ୍ଦିର ଓ ହଷ୍ଟେଲ ରହିଛି। ଜନ ବସତି ନିକଟରେ ଆବର୍ଜନା ଜମା କରାଯାଉଥିବାରୁ ମହାମାରୀ ଭଳି ରୋଗ ବ୍ୟାପିବାର ସମ୍ଭାବନା ଥିବାବେଳେ ଏହି ରାସ୍ତା ଦେଇ ରନିଂ ୱାଟର ଯାଇଥିବାରୁ ଜଳ ବାହିତ ରୋଗ ଦ୍ଵାରା ସାରା ସହର ସଂକ୍ରମିତ ହେବାର ମଧ୍ୟ ଆଶଙ୍କା ରହିଛି।

ତେବେ ଏ ସମ୍ପର୍କରେ ଆମ ‘ଇଟିଭି ଭାରତ’ ପ୍ରତିନିଧି ପୌର ନିର୍ବାହୀ ଅଧିକାରୀ ବିମଳ କୁମାର ଲେଙ୍କାଙ୍କୁ ପଚାରିଥିଲେ କିନ୍ତୁ ସେ ନୂଆ ଆସିଛନ୍ତି, ଏବିଷୟରେ କିଛି ଜାଣି ନ ଥିବା କହିଛନ୍ତି। ସେପଟେ ଏନେଇ ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ରଙ୍କୁ ପଚରାଯିବାରୁ ଖୁବଶୀଘ୍ର ସମସ୍ୟାର ସମାଧାନ କରାଯିବ ବୋଲି ସେ କହିଛନ୍ତି।

ତେବେ ଭାରତ ସରକାରଙ୍କ ଜଙ୍ଗଲ ଓ ପରିବେଶ ବିଭାଗ ଦ୍ବାରା 2016 ମାର୍ଚ୍ଚ 29 ତାରିଖରେ ପ୍ରକାଶିତ ବିଜ୍ଞପ୍ତି ଅନୁସାରେ ତୁରନ୍ତ ଜନବସତି ନିକଟରୁ ଆବର୍ଜନା ହଟାଇବାକୁ ଦାବୀ ହୋଇଛି।

ଜଗସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ