ଜଗତସିଂହପୁର: ଜିଲ୍ଲାରେ ହୁ ହୁ ହୋଇ ବଢିବାରେ ଲାଗିଛି କୋରୋନା ସଂକ୍ରମଣର ମାତ୍ରା । ସୋମବାର ଚିହ୍ନଟ ହୋଇଥିବା 86 ନୂଆ ଆକ୍ରାନ୍ତଙ୍କ ସହ ଜିଲ୍ଲାରେ ମୋଟ ଆକ୍ରାନ୍ତ ସଂଖ୍ୟା 5139ରେ ପହଞ୍ଚିଛି । ସଦ୍ୟ ଚିହ୍ନଟ ଆକ୍ରାନ୍ତଙ୍କ ମଧ୍ୟରେ ବାଲିକୁଦାରୁ 15, ବିରିଡିରୁ 2, ଏରସମାରୁ 2, କୁଜଙ୍ଗରୁ 8, ନାଉଗାଁରୁ 3, ତିର୍ତ୍ତୋଲରୁ 9, ରଘୁନାଥପୁରରୁ 4, ଜଗତସିଂହପୁରରୁ 16, ଜଗତସିଂହପୁର ସହରରୁ 17 ଓ ପାରାଦ୍ବୀପରୁ 10 ଜଣ ଚିହ୍ନଟ ହୋଇଛନ୍ତି ।
ତେବେ ଜିଲ୍ଲାର 8ଟି ବ୍ଲକ ଓ 2ଟି ପୌରାଞ୍ଚଳ ମଧ୍ୟରୁ ଜଗତସିଂହପୁର ସହର ଓ ଗ୍ରାମାଞ୍ଚଳରୁ ସର୍ବାଧିକ 1240 ଜଣ ଆକ୍ରାନ୍ତ ଚିହ୍ନଟ ହୋଇ ସାରିଲେଣି । ଜିଲ୍ଲାରେ ବଢୁଥିବା ଆକ୍ରାନ୍ତ ସଂଖ୍ୟା ଏବେ ଜିଲ୍ଲା ପ୍ରଶାସନ ପାଇଁ ମୁଣ୍ଡବ୍ୟଥାର ମୁଖ୍ୟ କାରଣ ପାଲଟିଛି । ସେପଟେ ସୋମବାର ଜିଲ୍ଲାରେ ମୋଟ ଆକ୍ରାନ୍ତଙ୍କ ସଂଖ୍ୟା 5139ରେ ପହଞ୍ଚିଛି । ସେମାନଙ୍କ ମଧ୍ୟରୁ 3610 ଜଣ ସୁସ୍ଥ ହୋଇ ସାରିଥିବା ବେଳେ ବର୍ତ୍ତମାନ ସୁଦ୍ଧା 1522ଟି ସକ୍ରିୟ ମାମଲା ରହିଛି । ସମସ୍ତ ସକ୍ରିୟ ମାମଲାଗୁଡିକର କୋଭିଡ ହସ୍ପିଟାଲରେ ଚିକିତ୍ସା ଜାରି ରହିଛି । ଏଥିସହ ଜିଲ୍ଲାରେ କୋରୋନା ଜନିତ ମୃତ୍ୟୁ ସଂଖ୍ୟା 8କୁ ବୃଦ୍ଧି ପାଇଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ