ଜଗତସିଂହପୁରରେ ଓଲଟିଲା ବସ, 20 ଯାତ୍ରୀ ଆହତ

ଜଗତସିଂହପୁର ଜିଲ୍ଲା ବିରିଡିଥାନ ଅନ୍ତର୍ଗତ ହଜିପୁର ନିକଟରେ ବସ ଦୁର୍ଘଟଣା । ଦୁର୍ଘଟଣାରେ 20 ଯାତ୍ରୀ ଆହତ ହୋଇଥିବା ସୂଚନା ମିଳିଛି ।

ଜଗତସିଂହପୁର: ଜିଲ୍ଲା ବିରିଡିଥାନ ଅନ୍ତର୍ଗତ ହଜିପୁର ନିକଟରେ ବସ ଦୁର୍ଘଟଣା । ଏଠାରେ ଅଭିରାମ ନାମକ ଏକ ଘରୋଇ ବସ ଓଲଟି ପଡିବା ଫଳରେ 20 ଜଣ ଯାତ୍ରୀ ଆହତ ହୋଇଛନ୍ତି । ଜଣଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ କଟକ ବଡ଼ ମେଡିକାଲରେ ଭର୍ତ୍ତି କରାଯାଇଛି ।

ସୂଚନା ଅନୁସାରେ ଘରୋଇ ବସ ଅଭିରାମ କଟକରୁ ଜଗତସିଂହପୁର ଅଭିମୁଖେ ଆସୁଥିବା ସମୟରେ ହଜିପୁର ନିକଟରେ ଭାରସାମ୍ୟ ହରାଇ ରାସ୍ତା ବିଲକୁ ଖସି ପଡ଼ିଥିଲା । ଫଳରେ 20ରୁ ଅଧିକ ଲୋକେ ଆହତ ହୋଇଥିଲେ । ସେମାନଙ୍କୁ ସ୍ଥାନୀୟ ଲୋକେ ଉଦ୍ଧାର କରି ପ୍ରଥମେ ଜଗତସିଂହପୁର ମେଡିକାଲ ରେ ଭର୍ତ୍ତି କରିଥିଲେ । ଜଣକ ଅବସ୍ଥା ଗୁରୁତର ହେବାରୁ ତାଙ୍କୁ କଟକ ସ୍ଥାନାନ୍ତରିତ କରାଯାଇଛି । ଖବର ପାଇ ବିରିଡି ଥାନ ପୋଲିସ ଘଟଣାସ୍ଥଳରେ ପହଞ୍ଚି ବସକୁ ଜବତ କରିବା ସହ ତଦନ୍ତ ଆରମ୍ଭ କରିଛି ।

ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ