ଶ୍ରମିକଙ୍କ ଦାବି ଆଗରେ ମୁଣ୍ତ ନୁଆଁଇଲେ IOCL କର୍ତ୍ତୃପକ୍ଷ, ଧାରଣା ପ୍ରତ୍ୟାହୃତ

ଶ୍ରମିକଙ୍କ ଦାବି ଆଗରେ ମୁଣ୍ତ ନୁଆଁଇଲେ IOCL କର୍ତ୍ତୃପକ୍ଷ । ପାରାଦୀପ ଆଇଓସିଏଲ୍ ମୁଖ୍ୟ ଫାଟକ ନିକଟରେ ୪ ଦିନ ପରେ ଧାରଣାରୁ ଉଠିଛନ୍ତି ଆଇଓସିଏଲର ଠିକା ଶ୍ରମିକ । ଅଧିକ ପଢନ୍ତୁ

ଜଗତସିଂହପୁର: ଶ୍ରମିକଙ୍କ ଦାବି ଆଗରେ ମୁଣ୍ତ ନୁଆଁଇଲେ IOCL କର୍ତ୍ତୃପକ୍ଷ । ପାରାଦୀପ ଆଇଓସିଏଲ୍ ମୁଖ୍ୟ ଫାଟକ ନିକଟରେ ୧୭ଦଫା ଦାବି ନେଇ ଶ୍ରମିକଙ୍କ ଧାରଣା ପ୍ରତ୍ୟାହୃତ ହୋଇଛି । ୪ ଦିନ ପରେ ଧାରଣାରୁ ଉଠିଛନ୍ତି ଆଇଓସିଏଲର ଠିକା ଶ୍ରମିକ । ଆଇଓସିଏଲ ଭଳି ଏକ କେନ୍ଦ୍ରୀୟ ଶିଳ୍ପ ସଂସ୍ଥାରେ କରାଯାଉଥିବା ଶ୍ରମିକ ଶୋଷଣ ବିରୋଧରେ ଧାରଣା ଦେଇଥିଲେ ଠିକା ଶ୍ରମିକ । ଶୀତ କାକରରେ ପଡ଼ି ଆନ୍ଦୋଳନ କରୁଥିବା ସାଢେ଼ ତିନି ହଜାର ଶ୍ରମିକଙ୍କ ଦାବିକୁ ମାନି ନେଇଛନ୍ତି ଆଇଓସିଏଲ କତ୍ତୃପକ୍ଷ । କାରଖାନା ପରିସରରେ ଶ୍ରମିକମାନଙ୍କୁ ଶୁଦ୍ଧ ପିଇବା ପାଣି, ଆଇଓସିଏଲର ମେଡିକାଲ ଚିକିତ୍ସା ଓ ସ୍କୁଲରେ ଶ୍ରମିକ ପିଲାଙ୍କ ପାଠପଢା ଭଳି ଦାବି ପୂରଣ ହୋଇଛି ।

ସେହିପରି ମାସର ନିର୍ଦ୍ଧିଷ୍ଟ ତାରିଖରେ ଦରମା ଆଦି ୧୭ ଦଫା ଦାବିକୁ ନେଇ ଗତ ୪ ଦିନ ହେଲା ଧାରଣା ଦେଇଥିଲେ ଶ୍ରମିକ । ଶେଷରେ ଆଇଓସିଏଲ କର୍ତ୍ତୃପକ୍ଷ ଶ୍ରମିକଙ୍କ ସବୁ ଦାବିକୁ ପୂରଣ କରିବା ପାଇଁ ପ୍ରତିଶୃତି ଦେଇଛନ୍ତି । ଗତବର୍ଷ ଫେବୃଆରୀ ମାସଠାରୁ ଶ୍ରମିକମାନେ ବର୍ଦ୍ଧିତ ୨୭୦୦ ରୁ ୩୧୦୦ ଟଙ୍କାର ଦରମା ପାଇବା ସହିତ ବର୍ଷକୁ ୧୨ଟି ଛୁଟି ମଧ୍ୟ ପାଇବେ । ଗତ ତିନି ଦିନ ହେଲା ତିନୋଟି ପର୍ଯ୍ୟାୟରେ ଆଲୋଚନା ପରେ ଶ୍ରମିକଙ୍କ ସମସ୍ତ ଦାବିକୁ ମାନିବା ପାଇଁ କମ୍ପାନୀ ରାଜି ହୋଇଥିବା ଶ୍ରମିକ ନେତା ବାପି ସାର୍ଖେଲ ପ୍ରକାଶ କରିଛନ୍ତି ।

ଇଟିଭି ଭାରତ, ଜଗତସିଂହପୁର