ଭଞ୍ଜନଗର: ଆଦିବାସୀଙ୍କ ବିକାଶ ପାଇଁ ରାଜ୍ୟ ସରକାରଙ୍କ ବିଭିନ୍ନ ଯୋଜନା ରହିଛି । ହେଲେ ଜିଲ୍ଲା ପ୍ରଶାସନ ପକ୍ଷରୁ ପଦକ୍ଷେପ ଗ୍ରହଣ କରାଯାଉଲ ନଥିବାରୁ ଏହି ଆଦିବାସୀ ଗ୍ରାମ ଗୁଡିକ ସ୍ବାସ୍ଥ୍ୟ, ଶିକ୍ଷା, ଗମନାଗମନ ଭଳି ମୌଳିକ ସୁବିଧାରୁ ବଞ୍ଚିତ ହେଉଛନ୍ତି । ଗମନାଗମନ ପାଇଁ ଏକମାତ୍ର ଭରସା ସାଜିଛି ଅସ୍ଥାୟୀ ବାଉଁଶ ପୋଲ।
ଆଦିବାସୀଙ୍କ ବିକାଶକୁ ଅଣଦେଖା, ଭରସା ଅସ୍ଥାୟୀ ବାଉଁଶ ପୋଲ ଏହି ଘଟଣା ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ପୋଲସରା ବ୍ଲକ ମାଳତେନ୍ତୁଳିଆ ପଞ୍ଚାୟତର ଆମ୍ବଖାଲ ଗୋପିଆପଲ୍ଲୀ ଗ୍ରାମରେ । ଏହି ଦୁଇଟି ଗ୍ରାମରେ 80 ଆଦିବାସୀ ପରିବାର ବସବାସ କରୁଥିବାବେଳେ ଏଯାଏଁ ଗାଁ କୁ ଭଲରାସ୍ତା ଖଣ୍ଡେ ନାହିଁ ।
ଗ୍ରାମଟି ଯେପରି ବାହ୍ୟ ଜଗତରୁ ସମ୍ପୂର୍ଣ୍ଣ ବିଛିନ୍ନ ହୋଇରହିଛି । ମେଡିକାଲର ସୁବିଧା ନଥିବାରୁ ଗର୍ଭବତୀ ମହିଳା ଖଟିଆରେ ବୁହା ହେବା ଘଟଣା ନିତିଦିନିଆ ପାଲଟିଛି । ବର୍ଷା ହେଲେ ନଦୀର ଅକାତ ପାଣିକୁ ଦେଖି ପିଲାମାନେ ଭୟରେ ସ୍କୁଲ ଯାଉ ନାହାଁନ୍ତି । ଏନେଇ ସରପଞ୍ଚଙ୍କ ଠାରୁ ବିଧାୟକଙ୍କ ପର୍ଯ୍ୟନ୍ତ ସମସ୍ତଙ୍କୁ ଗୁହାରି କଲେ କେହିବି ଶୁଣୁନଥିବା ଗ୍ରାମବାସୀ ଅଭିଯୋଗ କରିଛନ୍ତି ।
ଶେଷରେ କୌଣସି ଉପାୟ ନପାଇ ନିଜସ୍ବ ଉଦ୍ୟମରେ ଏକ ବାଉଁଶ ପୋଲ ନିର୍ମାଣ କରି ଯିବାଆସିବା କରୁଛନ୍ତି ଗ୍ରାମବାସୀ । ତୁରନ୍ତ ନଦୀ ଉପରେ ଏକ ପୋଲ ନିର୍ମାଣ ପାଇଁ ଗ୍ରାମବାସୀ ଦାବି କରିଛନ୍ତି । ଅନ୍ୟପଟେ ଏହି ଆମ୍ବଖାଲ ଗ୍ରାମର ସମସ୍ୟା ନେଇ ଜିଲ୍ଲା ପ୍ରକଳ୍ପ ନିର୍ଦେଶକଙ୍କୁ ଯୋଗାଯୋଗ କରିବାରୁ ସେ କହିଛନ୍ତି ଆଦିବାସୀଙ୍କ ବିକାଶ ପାଇଁ ସରକାର ପଦକ୍ଷେପ ନେଉଛନ୍ତି । ଏହି ପୋଲ ନିର୍ମାଣ ପାଇଁ ଟେଣ୍ଡର ସରିଛି। 4 କୋଟି ଟଙ୍କା ବ୍ୟୟବରାଦ କରାଯାଇଛି ବର୍ଷା ସରିଲେ ଅତିଶୀଘ୍ର କାମ ଆରମ୍ଭ ହେବ ବୋଲି ପ୍ରତିଶୃତି ଦେଇଛନ୍ତି ପ୍ରକଳ୍ପ ନିର୍ଦେଶକ ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
