ବ୍ରହ୍ମପୁର: ବାରାହା ଆକ୍ରମଣରେ ସାତଜଣ ଆହତ । ଗଞ୍ଜାମ ଜିଲ୍ଲା ଶେରଗଡ ବ୍ଲକ ଅନ୍ତର୍ଗତ ଚନ୍ଦ୍ରମଣିପୁର ଗ୍ରାମରେ ଘଟିଛି ଏପରି ଘଟଣା । ଆହତ ସାତଜଣଙ୍କ ମଧ୍ୟରୁ ତିନିଜଣଙ୍କ ଅବସ୍ଥା ଗୁରୁତର ରହିଛି ।
ସୂଚନାଅନୁସାରେ, ସକାଳୁ ଗାଁର କିଛି ଲୋକ ନିଜ ନିଜ ଚାଷ ଜମିକୁ ମୁଗ ଆଣିବା ପାଇଁ ଯାଇଥିଲେ । ଏହି ସମୟରେ କିଛି ବାରାହା ସେମାନଙ୍କ ଉପରକୁ ଆକ୍ରମଣ କରିଥିଲା । ବାରାହା ଆକ୍ରମଣ ଫଳରେ ଜମିକୁ ଯାଇଥିଲା ସାତ ଜଣ ଲୋକ ଆହତ ହୋଇଛନ୍ତି ।
ଆହତ ହୋଇଥିବା ସମସ୍ତ ସାତଜଣ ହେଲେ,ଜୀବନ ଗୌଡ,ସୂର୍ଯ୍ୟ ଗୌଡ,ଶନ୍ତ ବାରିକ,ସୁସୁଲା ଗୌଡ, ସୁଶିଳା ସ୍ବାଇଁ ,ଜୟନ୍ତୀ ଜେନା,ପ୍ରିୟଙ୍କା ବିଷୋୟୀ । ସେମାନଙ୍କୁ ଉଦ୍ଧାର କରାଯାଇ ପ୍ରଥମେ ହିଞ୍ଜିଳିକାଟୁ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା ।
ସେମାନଙ୍କ ମଧ୍ୟରୁ ଗୁରୁତର ହୋଇଥିବା ତିନିଜଣଙ୍କୁ ବ୍ରହ୍ମପୁର ବଡ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି । ଗତ କିଛି ଦିନ ହେବ ବାରାହା ଫସଲ ନଷ୍ଟ କରୁଥିବା ନେଇ ଲୋକ ଚିନ୍ତାରେ ଥିବା ବେଳେ ଲୋକଙ୍କ ଉପରେ ଏପରି ବାରାହା ଆକ୍ରମଣରେ ସ୍ଥାନୀୟ ଲୋକ ଏକ ପ୍ରକାର ଭୟଭୀତ ହୋଇ ପଡିଥିବା କହିଛନ୍ତି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ