ବର୍ଷା ଧୋଇନେଲା ବାଟ, ବେଲଗୁଣ୍ଠା-ବାଲିପଦର ଯୋଗାଯୋଗ ବିଛିନ୍ନ

ଗଞ୍ଜାମ ଜିଲ୍ଲାର ଚଢ଼େୟାପଲ୍ଲୀ ବୋଡା ନଦୀର ଡାଇଭର୍ସନ ରାସ୍ତା ବର୍ଷାରେ ଧୋଇଯାଇଛି । ପ୍ରଥମରୁ ବୋଡା ନଦୀ ପୋଲ କାମ ଚାଲୁଥିବା ବେଳେ ଡାଇଭର୍ସନ ରାସ୍ତାଟି ଧୋଇଯିବା ପରେ ବେଲଗୁଣ୍ଠା-ବାଲିପଦର ଯୋଗାଯୋଗ ବିଛିନ୍ନ ହୋଇଯାଇଛି।

ଭଞ୍ଜନଗର: ଲଗାଣ ବର୍ଷାରେ ଗଞ୍ଜାମ ଜିଲ୍ଲା ବେଲଗୁଣ୍ଠା ଅନ୍ତର୍ଗତ ଚଢ଼େୟାପଲ୍ଲୀ ବୋଡା ନଦୀର ଡାଇଭର୍ସନ ରାସ୍ତା ଭାସିଯାଇଛି । ଯାହାଦ୍ବାରା ଯାତାୟାତ ସମ୍ପୁର୍ଣ୍ଣ ଠପ ହେବା ସହ ବେଲଗୁଣ୍ଠା ବାଲିପଦର ଯୋଗାଯୋଗ ବିଛିନ୍ନ ହୋଇଛି ।

ଚଳିତ ବର୍ଷ ବୋଡା ନଦୀର ପୁରୁଣା ବ୍ରିଜକୁ ଭଙ୍ଗାଯାଇ ନୂତନ ବ୍ରିଜ କାମ ଚାଲୁ ଥିବାରୁ ଉକ୍ତ ଡାଇଭର୍ସନ ରାସ୍ତା ଦେଇ ଲୋକେ ଚଳପ୍ରଚଳ କରିବା ସହିତ ଗାଡି ଚଳାଚଳ କରୁଥିଲେ । ଲଗାଣ ବର୍ଷାରେ ଗୁରୁବାର ସକାଳେ ପ୍ରବଳ ପାଣି ଆସିବାରୁ ଡାଇଭର୍ସନଟି ଭାସି ଯାଇଛି। ତେବେ ପୋଲ କାମ ଚାଲୁଥିବା ସହ ଡାଇଭର୍ସନ ରାସ୍ତାଟି ଭାଙ୍ଗି ଯିବା ପରେ ସାଧାରଣ ଜୀବନଯାତ୍ରା ବହୁମାତ୍ରାରେ ପ୍ରଭାବିତ ହୋଇଛି।

ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ