ପଦାରେ ପଡିଲା ବିଜେପି ଗୋଷ୍ଠୀ କନ୍ଦଳ, ଜିଲ୍ଲା ସଭାପତିଙ୍କୁ କାଳିମାଡ କଲେ ଦଳୀୟ କର୍ମୀ

ରାଜ୍ୟ ବିଜେପି ସଭାପତିଙ୍କ ଗ୍ରସ୍ତ ସମୟରେ ଦଳୀୟ ଜିଲ୍ଲା ସଭାପତିଙ୍କୁ କାଳିମାଡ କଲେ ନିଜ ଦଳର କର୍ମୀ । ପଦାରେ ପଡିଲା ଦଳୀୟ କନ୍ଦଳ । ଅଧିକ ପଢନ୍ତୁ

ବ୍ରହ୍ମପୁର: ପଦାରେ ପଡିଲା ବିଜେପିର ଗୋଷ୍ଠୀ କନ୍ଦଳ । ଜିଲ୍ଲା ବିଜେପି ସଭାପତି ବିଭୂତି ଭୂଷଣ ଜେନାଙ୍କୁ କାଳିମାଡ କଲେ ଦଳୀୟ କର୍ମୀ । ଭାରତୀୟ ଜନତା ପାର୍ଟିର ରାଜ୍ୟ ସଭାପତିଙ୍କ ଜିଲ୍ଲା ଗ୍ରସ୍ତ ସମୟରେ ନେତା ଓ କର୍ମୀଙ୍କ ଉପସ୍ଥିତିରେ ବିଭୂତି ଭୂଷଣଙ୍କୁ କାଳିମାଡ ହୋଇଛି । ବ୍ରହ୍ମପୁର ସହର ମଧ୍ୟରେ ନିଜ ଦଳୀୟ କର୍ମୀ ମାନେ ବିଭୂତି ଭୂଷଣଙ୍କୁ କାଳିମାଡ କରିବା ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି ।

ରାଜ୍ୟ ବିଜେପି ସଭାପତି ଭାବରେ ମନମୋହନ ସାମଲ ଦାୟିତ୍ୱ ନେବା ପରେ ପ୍ରଥମଥର ପାଇଁ ରବିବାର ଗଞ୍ଜାମ ଜିଲ୍ଲା ଏବଂ ବ୍ରହ୍ମପୁର ଗ୍ରସ୍ତରେ ଆସିଥିଲେ । ଆଉ ଏହି ସମୟରେ ଦଳର ଗୋଷ୍ଠୀ କନ୍ଦଳ ସାମ୍ନାକୁ ଆସିଥିଲା । ଗୋଟିଏ ପଟେ ଦଳୀୟ କର୍ମୀ ଜିଲ୍ଲା ସଭାପତି ବିଭୂତି ଭୂଷଣ ଜେନାଙ୍କ ଉପରେ କାଳିମାଡ କରି ତାଙ୍କ ବିରୁଦ୍ଧରେ ସ୍ଲୋଗାନ ଦେବା ପରେ ସେଠାରେ ଉପସ୍ଥିତ କର୍ମୀଙ୍କ ଆକ୍ରୋଶର ଶିକାର ହୋଇଥିଲେ ବିଭୂତି ଭୂଷଣ । ଯାହାର ଭିଡିଓ ଏବେ ଭାଇରାଲ ହେଉଛି ।

ରାଜ୍ୟ ବିଜେପି ସଭାପତି ବ୍ରହ୍ମପୁରର ବିଭିନ୍ନ କାର୍ଯ୍ୟକ୍ରମରେ ଯୋଗ ଦେଇ ଗତ(ରବିବାର) ସନ୍ଧ୍ୟାରେ ସହରର ଗୋଷାଣି ନୂଆଗାଁ ଠାରେ ରହିଥିବା କାଳୁଆ ମନ୍ଦିର ଦର୍ଶନ କରିବାକୁ ଯାଉଥିଲେ । ଏହି ସମୟରେ ହଠାତ୍ ଦଳୀୟ କର୍ମୀ ହୋହଲ୍ଲା କରିବା ସହିତ ଜିଲ୍ଲା ସଭାପତିଙ୍କ ଉପରକୁ କାଳିମାଡ କରି ତାଙ୍କ ବିରୋଧରେ ନାରାବାଜି କରିଥିଲେ । ଘଟଣାସ୍ଥଳରେ ଉପସ୍ଥିତ ଦଳର ଅନ୍ୟକର୍ମୀ ମାନେ କାଳିମାଡ କରିଥିବା ସଂପୃକ୍ତ କର୍ମୀଙ୍କୁ ଧରି ମାଡ ମାରିଥିଲେ ।

ଏହି ଘଟଣା ସ୍ଥାନୀୟ ଦଳୀୟ କର୍ପୋରେଟରଙ୍କ ଇଙ୍ଗିତରେ ହୋଇଥିବା ନେଇ ଅନ୍ୟ କେତେକ ବିଜେପି କର୍ପୋରେଟରଙ୍କୁ ପେଲାଠେଲା କରାଯାଇଥିଲା । ଏହି ଘଟଣା ପରେ ଦଳୀୟ କର୍ମକର୍ତ୍ତା କିମ୍ୱା ଜିଲ୍ଲା ବିଜେପି ସଭାପତିଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ । ଦଳୀୟ ଜିଲ୍ଲା ସଭାପତିଙ୍କୁ କେଉଁ କାରଣ ପାଇଁ ଦଳୀୟ କର୍ମୀ ଏପରି ବିରୋଧ କଲେ ତାହାର ପ୍ରକୃତ କାରଣ ସ୍ପଷ୍ଟ ହୋଇନାହିଁ । ସେପଟେ ଦଳୀୟ ବିଶୃଙ୍ଖଳା କାର୍ଯ୍ୟ କରିଥିବା କର୍ମୀଙ୍କ ବିରୋଧରେ କଣ କାର୍ଯ୍ୟାନୁଷ୍ଠାନ ନିଆଯାଉଛି ସେ ନେଇ ମଧ୍ୟ ଦଳ ପକ୍ଷରୁ କିଛି ସ୍ପଷ୍ଟ କରାଯାଇନାହିଁ ।

ଇଟିଭି ଭାରତ, ବ୍ରହ୍ମପୁର