ବ୍ରହ୍ମପୁର: ଫାଇନାନ୍ସ କମ୍ପାନୀ ନାମରେ ଲୁଟ୍ । ଋଣ ଦେବାକୁ ପ୍ରତିଶୃତି ଦେଇ ଅନଲାଇନରେ ଠକି ନେଉଥିଲେ ଲକ୍ଷ ଲକ୍ଷ ଟଙ୍କା । ଏଭଳି ଏକ ଠକ ଗ୍ୟାଙ୍ଗକୁ ଗିରଫ କରିବାରେ ସଫଳ ହୋଇଛି ବ୍ରହ୍ମପୁର ସାଇବର ପୋଲିସ । ଶୁକ୍ରବାର ଗ୍ୟାଙ୍ଗର 6ଜଣଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି । ଏହି ଗ୍ୟାଙ୍ଗରେ 5ଜଣ ଯୁବତୀଙ୍କ ସମେତ ଜଣେ ଯୁବକ ମଧ୍ୟ ରହିଛନ୍ତି ।
ଅଭିଯୁକ୍ତ ମାନଙ୍କ ଜାମିନ ନାଞ୍ଜୁର ହେବା ପରେ ସେମାନଙ୍କୁ ବିଚାର ବିଭାଗୀୟ ହେପାଜତକୁ ପଠାଇ ଦିଆଯାଇଛି । ଅଭିଯୁକ୍ତ ମାନେ ହେଲେ, ଭୁବନେଶ୍ବର ସୁନ୍ଦରପଦା ଅଞ୍ଚଳର ଦମୟନ୍ତୀ ମାର୍ଥା, କେନ୍ଦ୍ରାପଡାର ମଧୁସ୍ମିତା ଦାସ, ଦେବସ୍ମିତା ଦାସ, ବିଷ୍ଣୁପ୍ରିୟା ଶତପଥୀ, ପୁରୀର ସରୋଜିନୀ ସ୍ବାଇଁ ଏବଂ ସମ୍ବଲପୁରର ଆଶିଷ୍ ପୋଢ ।
ସୂଚନାଅନୁଯାୟୀ, ଗତ ୨୦୧୮ ମସିହା ଜୁନ୍ ମାସରେ ୫ଲକ୍ଷ ଟଙ୍କା ଋଣ ଦିଆଯିବାର ପ୍ରଲୋଭନ ଦେଖାଇ ତିନୋଟି ପର୍ଯ୍ୟାୟରେ ସମୁଦାୟ ୭୦ ହଜାର ଟଙ୍କା ଠକି ନେଇଥିଲେ ଏମାନେ । ଏହା ଜଣାପଡିବା ପରେ ସାଇବର୍ ଥାନାରେ ମାମଲା ରୁଜୁ ହୋଇଥିଲା ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ