ବ୍ରହ୍ମପୁର:ଘରେ ପଶି ବିଧବା ବୃଦ୍ଧାଙ୍କୁ ହତ୍ୟା । ଏ ଭଳି ଅଭାବନୀୟ ଘଟଣା ଗଞ୍ଜାମ ଜିଲ୍ଲାର ଜରଡା ଥାନା ଅନ୍ତର୍ଗତ ପାତ୍ରପୁର ବ୍ଲକର ଆମ୍ବପୁର ପଞ୍ଚାୟତ ମହାଦେଇପୁର ଗ୍ରାମରେ ଘଟିଛି । ସେପଟେ ହତ୍ୟାକାଣ୍ଡର ନିର୍ଦ୍ଧିଷ୍ଟ କାରଣ ସ୍ପଷ୍ଟ ହୋଇନଥିବା ବେଳେ ଲୁଟ ଉଦ୍ଦେଶ୍ୟରେ ଏଭଳି ନିର୍ମମ ଭାବେ ହତ୍ୟା କରାଯାଇଥିବା ପୋଲିସର ପ୍ରାଥମିକ ତଦନ୍ତରୁ ଜଣାପଡିଛି ।
ସୂଚନାନୁଯାୟୀ ମହାଦେଇପୁର ଗ୍ରାମରେ ରହିଆସୁଥିବା ୬୫ ବର୍ଷୀୟ ମୁକ୍ତା ପ୍ରଧାନ ନାମକ ବୃଦ୍ଧାଙ୍କୁ କେହି ଦୁର୍ବୃତ୍ତ ହତ୍ୟା କରି ସୁନା ଗହଣା ଲୁଟ୍ କରି ନେଇଛନ୍ତି। ମୃତ ବୃଦ୍ଧାଙ୍କ ମୁଣ୍ଡ ସମେତ ଶରୀରର କେତେକ ସ୍ଥାନରେ କ୍ଷତ ଚିହ୍ନ ରହିଛି । ହତ୍ୟାର ଶିକାର ହୋଇଥିବା ମହିଳାଙ୍କ ସ୍ୱାମୀ ଦୀର୍ଘ ବର୍ଷ ହେଲା ମୃତ୍ୟୁ ଘଟିଥିବା ବେଳେ ବଡ଼ପୁଅ ଗ୍ରାମର ଅନ୍ୟ ଜଣକ ଘରେ ପୌଷ୍ୟପୁତ୍ର ଭାବେ ରହି ଆସୁଛି । ସେହିପରି ସାନ ପୁଅ କୃଷ୍ଣଚନ୍ଦ୍ର ଜଣେ ଗାଡ଼ି ଚାଳକ ଭାବରେ ସମ୍ବଲପୁରରେ କାର୍ଯ୍ୟରତ ରହିଛନ୍ତି। ହେଲେ ପାଖରେ ରହୁଥିବା ବୋହୂ ଚାରି ଦିନ ହେବ ନିଜ ବାପା ଘର ଦିଗପହଣ୍ଡି ଚାଲି ଯାଇଥିବା ବେଳେ କେହି ଘରେ ନଥିବାର ସୁଯୋଗ ନେଇ ଦୁର୍ବୃତ୍ତ ତାଙ୍କୁ ହତ୍ୟା କରି କିଛି ଲୁଟ୍ କରିନେଇଥିବା ଅନୁମାନ କରାଯାଉଛି ।