ଗଞ୍ଜାମରେ ଏନକାଉଣ୍ଟର: ଦୁର୍ଦ୍ଦାନ୍ତ ଅପରାଧୀ କୋକ ଗୁରୁତର

ଗଞ୍ଜାମ ଜୟଶ୍ରୀ କେମିକାଲ ଛକ ନିକଟରେ ଏନକାଉଣ୍ଟର। ଏଥିରେ ଦୁର୍ଦ୍ଦାନ୍ତ ଅପରାଧୀ କୋକ ଓରଫ ସୁଶାନ୍ତ ବେହେରା ଗୁରୁତର ହୋଇଥିବା ଖବର ମିଳିଛି । ତା' ନିକଟରୁ ଗୋଟିଏ ୟାମହା ବାଇକ, ଗୋଟିଏ ମାଉଜର, 2ଟି ଜୀବନ୍ତ ଗୁଳି ଜବତ କରିଛି ପୋଲିସ।

ବ୍ରହ୍ମପୁର: ପୁଣି ଗଞ୍ଜାମରେ ପୋଲିସର ଏନକାଉଣ୍ଟର । ଜୟଶ୍ରୀ କେମିକାଲ ଛକ ନିକଟରେ ହୋଇଛି ଏହି ଏନକାଉଣ୍ଟର। ଏଥିରେ ଦୁର୍ଦ୍ଦାନ୍ତ ଅପରାଧୀ କୋକ ଓରଫ ସୁଶାନ୍ତ ବେହେରା ଗୁରୁତର ହୋଇଛି। ସୁଶାନ୍ତର ବାମ ଗୋଡରେ ଗୁଳି ବାଜିଛି । ତା' ନିକଟରୁ ଗୋଟିଏ ୟାମହା ବାଇକ, ଗୋଟିଏ ମାଉଜର ଏବଂ 2ଟି ଜୀବନ୍ତ ଗୁଳି ଜବତ କରିଛି ପୋଲିସ।

ଗୁରୁତର ସୁଶାନ୍ତକୁ ଚିକିତ୍ସା ପାଇଁ ପ୍ରଥମେ ଛତ୍ରପୁର ଉପଖଣ୍ଡ ଚିକିତ୍ସାଳୟ ପରେ ବ୍ରହ୍ମପୁର ଏମକେସିଜିରେ ଭର୍ତ୍ତି କରାଯାଇଥିଲା । ତା' ଘର ବ୍ରହ୍ମପୁର ସହରର ଗୋଷାଣୀ ନୂଆଗାଁ ରାଜୀବ ନଗରରେ। ଉଭୟ ପକ୍ଷରୁ ହୋଇଥିବା ଗୁଳି ବିନିମୟରେ ଦୁଇ ଜଣ ପୋଲିସ କର୍ମଚାରୀ ଆହତ ହୋଇଛନ୍ତି।

ଗତ କିଛି ଦିନ ତଳେ ଗଞ୍ଜାମରେ ବିଜେଡି ନେତା ସୁଧୀର ପାଢ଼ୀଙ୍କ ଉପରକୁ ବୋମାମାଡ ହୋଇଥିଲା। ଉକ୍ତ ଘଟଣାରେ ସୁଶାନ୍ତର ସମ୍ପୃକ୍ତି ରହିଥିଲା। ପୂର୍ବରୁ ତା' ବିରୋଧରେ ଉଭୟ ଗଞ୍ଜାମ ଏବଂ ବ୍ରହ୍ମପୁର ଥାନାରେ ଏକାଧିକ ମାମଲା ରୁଜୁ ହୋଇଥିବା ପୋଲିସ କହିଛି।

ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ