Mo mati mo desha: ଶହୀଦ ଶ୍ରୀନିବାସଙ୍କ ଗାଁରୁ ମାଟି ସଂଗ୍ରହ କଲେ ରାଜ୍ୟ ବିଜେପି ସଭାପତି

ବ୍ରହ୍ମପୁର ସହରରେ ଆରମ୍ଭ ହେଲା ମୋ ମାଟି ମୋ ଦେଶ ଅଭିଯାନ । ମାଟି ସଂଗ୍ରହ କଲେ ରାଜ୍ୟ ବିଜେପି ସଭାପତି ମନମୋହନ ସାମଲ। ଅଧିକ ପଢ଼ନ୍ତୁ

ବ୍ରହ୍ମପୁର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆହ୍ବାନରେ ଆରମ୍ଭ ହୋଇଥିବା 'ମୋ ମାଟି ମୋ ଦେଶ' ଅଭିଯାନ ବ୍ରହ୍ମପୁରରେ ଆରମ୍ଭ ହୋଇଯାଇଛି । କାରଗିଲ ଯୁଦ୍ଧ ସମୟରେ ଗଞ୍ଜାମ ଜିଲ୍ଲାର ପ୍ରଥମ ଓଡିଆ ଶହୀଦ ଏସ୍. ଶ୍ରୀନିବାସ ପାତ୍ରଙ୍କ ପୈତୃକ ଗ୍ରାମରେ ‘ମୋ ମାଟି ମୋ ଦେଶ’ କାର୍ଯ୍ୟକ୍ରମ ବିଜେପି ପକ୍ଷରୁ ଆୟୋଜିତ ଦୋଇଥିଲା । ବ୍ରହ୍ମପୁର ସହର ଉପକଣ୍ଠ ଜଗଦଳପୁର ଗ୍ରାମରେ ଆୟୋଜିତ କାର୍ଯ୍ୟକ୍ରମରେ ଯୋଗ ଦେଇଥିଲେ ରାଜ୍ୟ ବିଜେପି ସଭାପତି ମନମୋହନ ସାମଲ । ରାଜ୍ୟ ସଭାପତି କୁକୁଡାଖଣ୍ଡି ବ୍ଲକର ଜଗଦଳପୁର ଗ୍ରାମରେ ପହଞ୍ଚି ପ୍ରଥମେ ଶହୀଦ ଏସ୍.ଶ୍ରୀନିବାସ ପାତ୍ରଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିବା ପରେ ସେଠାରୁ ଏକ କଳସରେ ଶହୀଦଙ୍କ ଗ୍ରାମରୁ ସଂଗୃହୀତ ମାଟିକୁ ନେଇ ପୂଜାର୍ଚ୍ଚନା କରିଥିଲେ । ପରେ ଶହୀଦ ଶ୍ରୀନିବାସଙ୍କ ପରିବାର ବର୍ଗଙ୍କୁ ଭେଟିଥିଲେ ବିଜେପିର ରାଜ୍ୟ ସଭାପତିଙ୍କ ସମେତ ଦଳର ନେତୃବୃନ୍ଦ ।

ବ୍ରହ୍ମପୁରର ପ୍ରତ୍ୟକ ନିର୍ବାଚନ ମଣ୍ଡଳୀରେ ଏହି ଅଭିଯାନ ଆରମ୍ଭ କରିଛି ଜିଲ୍ଲା ବିଜେପି । ଗାଁରୁ ଗାଁ ବୁଲି ବୀର ଶହୀଦଙ୍କ ବାସସ୍ଥାନରୁ ସଂଗ୍ରହ ହେଉଛି ମାଟି । ‘‘ମାଟିକୁ ନମନ ଓ ବୀରଙ୍କୁ ବନ୍ଦନ” ଏହି ଅଭିଯାନରେ ମାଟି ସଂଗ୍ରହ କରାଯାଇ ଦିଲ୍ଲୀର ଅମୃତ ବାଟିକାରେ ସଂଗୃହିତ କରି ରଖାଯିବ । ସଂଗୃହିତ ମାଟିକୁ ପ୍ରଥମେ ବ୍ଲକରେ ରଖାଯାଇ ଭୁବନେଶ୍ବରକୁ ପଠାଯିବ । ଏହାପରେ ଦିଲ୍ଲୀର ଅମୃତ ବାଟିକାକୁ ନିଆଯିବ ଏବଂ ସେଠାରେ ଶହୀଦଙ୍କ ନାମରେ ସମର୍ପିତ କରାଯିବ ।

ରାଜ୍ୟ ବିଜେପି ସଭାପତି ମନମୋହନ ସାମଲ କହିଛନ୍ତି, ‘‘ପ୍ରଧାନମନ୍ତ୍ରୀଙ୍କ ଆହ୍ବାନ କ୍ରମେ 'ମୋ ମାଟି ମୋ ଦେଶ ଅଭିଯାନ' ମାଧ୍ୟମରେ ଘରୁ ଘରୁ ମାଟି ସଂଗ୍ରହ କରାଯାଉଛି । ଅମୃତ କଳସରେ ମାଟି ସଂଗ୍ରହ କରିବା ପରେ କର୍ତ୍ତବ୍ୟ ପଥରେ ତିଆରି ହେବାକୁ ଥିବା ଅମୃତ ବାଟିକାରେ ଦିଆଯିବ । ଗ୍ରାମ ଗୁଡ଼ିକରେ 6 ତାରିଖରୁ ଆରମ୍ଭ ହୋଇଥିବା ବେଳେ ଏହା ଆସନ୍ତା 16 ତାରିଖ ପର୍ଯ୍ୟନ୍ତ ଜାରି ରହିବ । 16 ସେପ୍ଟେମ୍ବରରୁ 23 ତାରିଖ ଭିତରେ ବ୍ଲକରେ ମାଟି ଜମା ହେବ । ଏହାପରେ ସଂଗ୍ରୁହିତ ମାଟିକୁ ଭୁବନେଶ୍ବର ନିଆଯାଇ ଟ୍ରେନ ଯୋଗେ ଦିଲ୍ଲୀକୁ ପଠାଯିବାର ବ୍ୟବସ୍ଥା କରାଯିବ । ବିଭିନ୍ନ ବର୍ଗର ଲୋକେ ଏଥିରେ ସାମିଲ ହୋଇଛନ୍ତି । 75 ବର୍ଷ ପୂର୍ବେ ଯେଉଁ ସଂଗ୍ରାମୀମାନେ ଶହୀଦ ହୋଇ ଦେଶକୁ ସ୍ବାଧୀନତାର ସ୍ବାଦ ଚଖାଇଥିଲେ, ସେତେବେଳେ ତାଙ୍କର ଯେଉଁ ରାଷ୍ଟ୍ର ଭକ୍ତି ଥିଲା ତାହା ଧୀରେ ଧୀରେ କମିଯିବା ପରି ମନେ ହେଉଛି । ସେଥିପାଇଁ ଏହି ଅଭିଯାନ ଆରମ୍ଭ ହୋଇଛି ।’’

ଇଟିଭି ଭାରତ ବ୍ରହ୍ମପୁର