ବ୍ରହ୍ମପୁର: ଲୁଟେରାଙ୍କ କବଜାରେ ରାଜ୍ୟବାସୀ । ଆଖି ପିଛୁଳାକେ ଲୁଟି ନେଲେ ଦୁଇ ଲକ୍ଷ ଟଙ୍କା । ବ୍ରହ୍ମପୁର ସହର ଉପକଣ୍ଠ ଗୋଳନ୍ଥରା ଥାନା ୧୬ ନଂ ଜାତୀୟ ରାଜପଥରେ ଦୁଇ ବ୍ୟବସାୟୀଙ୍କ ଠାରୁ ଦୁଇ ଲକ୍ଷ ଟଙ୍କା ଲୁଟି ନେଇଛନ୍ତି ଦୁର୍ବୃତ୍ତ ।
ସୂଚନାଅନୁସାରେ, ବୁଧବାର ରାତ୍ର ସମୟରେ ଆନ୍ଧ୍ରପ୍ରଦେଶର ପାଲାସାର ଦୁଇ ବ୍ୟବସାୟୀ ଶ୍ରୀନିବାସ ରାଓ(୪୨) ଓ ପି.ସୁରେଶ(୫୦) ମୋଟରସାଇକେଲ (ଏପି ୩୯ ସିଏସ ୩୨୦୪)ରେ ବ୍ରହ୍ମପୁରରୁ ବ୍ୟବସାୟ କାମ ଶେଷ କରି ଫେରୁଥିଲେ । ଗୋଳନ୍ଥରା ଥାନା 16 ନମ୍ବର ଜାତୀୟ ରାଜପଥରେ ପଛ ପଟୁ ଏକ କଳା ରଙ୍ଗର ପଲସରରେ ଦୁଇଜଣ ଯୁବକ ଅଚାନକ ପହଞ୍ଚି ଥିଲେ । ଦୁଇ ବ୍ୟବସାୟୀ ଧରିଥିବା ବ୍ୟାଗ ଯେଉଁଥିରେ ୨ ଲକ୍ଷ ଟଙ୍କା ରହିଥିଲା, ତାହାକୁ ଝାମ୍ପି ନେଇଥିଲେ। ଫଳରେ ମୋଟର ସାଇକେଲରେ ବସିଥିବା ଶ୍ରୀନିବାସ ଏବଂ ସୁରେଶ ରାସ୍ତାରେ କଚାଡି ହୋଇ ପଡ଼ିଯାଇଥିଲେ । ଫଳରେ ଉଭୟ ଗୁରୁତର ଆହତ ହୋଇଛନ୍ତି ।