ଦୁଇ ଭାଇଙ୍କୁ ଅପହରଣ ନୁହେଁ ଉଠାଇ ନେଇଛି କର୍ଣ୍ଣାଟକ ପୋଲିସ, ତଦନ୍ତ ପରେ ସାମ୍ନାକୁ ଆସିଲା ସତ

ଗଞ୍ଜାମରୁ ଦୁଇ ଭାଇଙ୍କୁ ଉଠାଇ ନେଲା କର୍ଣ୍ଣାଟକ ପୋଲିସ । କାରଣ ଅସ୍ପଷ୍ଟ । ଅଧିକ ପଢନ୍ତୁ

ବ୍ରହ୍ମପୁର:ଗଞ୍ଜାମ ଥାନା ଅଞ୍ଚଳରୁ ଦୁଇ ଭାଇଙ୍କୁ ଉଠାଇ ନେଲା କର୍ଣ୍ଣାଟକ ପୋଲିସ । କିନ୍ତୁ ବନ୍ଧୁକ ମୁନରେ ଦୁଇ ଭାଇଙ୍କୁ ଅପହରଣ କରାଯାଇଥିବା ଅଭିଯୋଗ ଆଣି ରାସ୍ତା ଅବରୋଧ କରିଥିଲେ ସ୍ଥାନୀୟ ଲୋକ । ଗତ ଶୁକ୍ରବାର ବିଳମ୍ୱିତ ରାତିରେ ଏଭଳି ଘଟଣା ପରେ ପୋଲିସ ତଦନ୍ତ କରି ଦୁଇ ଭାଇଙ୍କୁ ଉଠାଇ ନେଇଥିବା ସ୍ପଷ୍ଟ କରିଛନ୍ତି ।

ଶୁକ୍ରବାର ରାତିରେ ପୁଇଁତୋଳା ଛକରେ ଦୋକାନ କରିଥିବା ଦୁଇ ଭାଇଙ୍କୁ ବନ୍ଧୁକ ଦେଖାଇ ପାଞ୍ଚ ଜଣ କାରରେ ଆସି ଫିଲ୍ମ ଷ୍ଟାଇଲରେ ଅପହରଣ କରି ବ୍ରହ୍ମପୁର ଅଭିମୁଖେ ନେଇଯାଇଥିଲେ । ସ୍ଥାନୀୟ ଏହା ଦେଖି ଅପହରଣ ହୋଇଥିବା ଅଭିଯୋଗ ଆଣି ତଦନ୍ତ ଦାବିରେ ପ୍ରାୟ ଘଣ୍ଟା ଧରି ଜାତୀୟ ରାଜପଥ ଅବରୋଧ କରିଥିଲେ । ପରେ ଘଟଣାସ୍ଥଳରେ ଜିଲ୍ଲାର ବରିଷ୍ଠ ପୋଲିସ ଅଧିକାରୀ ମାନେ ପହଞ୍ଚି ତଦନ୍ତ କରାଯିବା ବୋଲି ପ୍ରତିଶୃତି ଦେଇଥିଲେ ।

ପ୍ରାଥମିକ ତଦନ୍ତ ପରେ ପୁରା ଘଟଣା ସାମ୍ନାକୁ ଆସିଥିଲା । ଗଞ୍ଜାମ ସହରରୁ ଦୁଇ ଭାଇଙ୍କୁ କୌଣସି ଏକ ମାମଲାରେ କର୍ଣ୍ଣାଟକ ପୋଲିସ ଉଠାଇ ନେଇ ବିଶାଖାପାଟଣା ଠାରେ ରଖିଥିଲା । ଏହାପରେ ଗଞ୍ଜାମ ପୋଲିସର ଏକ ଟିମ୍ ବିଶାଖାପାଟଣାରେ ପହଞ୍ଚି କେଉଁ ମାମଲାରେ ଦୁଇ ଜଣଙ୍କୁ କର୍ଣ୍ଣାଟକ ପୋଲିସ ଉଠାଇ ନେଲେ ସେନେଇ ସମସ୍ତ ପ୍ରକାର କାଗଜପତ୍ର ତନଖି କରିଥିଲେ।

ଗୋଟିଏ ପଟେ ଅନ୍ୟ ରାଜ୍ୟର ପୋଲିସ ଆସି ଗଞ୍ଜାମ ଜିଲ୍ଲାରରୁ ଦୁଇ ଯୁବକଙ୍କୁ ଉଠାଇ ନେଇଥିବା ବେଳେ ଏନେଇ କିନ୍ତୁ ସ୍ଥାନୀୟ ପୋଲିସକୁ ଅବଗତ କରାଯାଇନଥିଲା । ଯଦି ଦୁଇ ଭାଇଙ୍କ ବିରୋଧରେ ମାମଲା ରହିଥିଲା ତାହା ହେଲେ ସ୍ଥାନୀୟ କୋର୍ଟରେ ହାଜର ନକରାଇ ବିଶାଖାପାଟଣା ନେଇଯିବା ଘଟଣାକୁ ବୁଦ୍ଧିଜୀବୀ ମହଲରେ ନିନ୍ଦା କରାଯାଇଛି । ତେବେ କେଉଁ କାରଣରୁ ଦୁଇ ଯୁବକଙ୍କୁ କର୍ଣ୍ଣାଟକ ପୋଲିସ ଉଠାଇ ନେଇଛି ତାହା ବର୍ତ୍ତମାନ ଅସ୍ପଷ୍ଟ ରହିଛି । ପୋଲିସର ତଦନ୍ତ ଶେଷ ପରେ ହିଁ ଘଟଣାର ପ୍ରକୃତ କାରଣ ସ୍ପଷ୍ଟ ହେବ । ଦୁଇ ଦଇ ଭାଇଙ୍କ ପରିବାର ଲୋକଙ୍କ ପକ୍ଷରୁ ମଧ୍ୟ କୌଣସି ସୂଚନା ହସ୍ତଗତ ହୋଇନାହିଁ । ଏନେଇ ଗଞ୍ଚାମ ପୋଲିସ କଣ ପଦକ୍ଷେପ ଗ୍ରହଣ କରୁଛି ତାହା ଦେଖିବାକୁ ଅପେକ୍ଷା ।

ଇଟିଭି ଭାରତ, ବ୍ରହ୍ମପୁର