Ganja Cultivation: ଗଞ୍ଜାମରେ ୨୮ କୋଟିରୁ ଊର୍ଦ୍ଧ୍ବ ଗଞ୍ଜେଇ ଚାଷ ପୋଡିଲା ଅବକାରୀ ବିଭାଗ

ଗଞ୍ଜାମ ଜିଲ୍ଲାର ବିଭିନ୍ନ ଗଞ୍ଜେଇ ଚାଷ(GANJA CULTIVATION) ଜମିରେ ଅବକାରୀ ବିଭାଗର ଚଢାଉ । ୨୮ କୋଟିରୁ ଊର୍ଦ୍ଧ୍ବ ଗଞ୍ଜେଇ ଚାଷ ନଷ୍ଟ । ଅଧିକ ପଢନ୍ତୁ

ବ୍ରହ୍ମପୁର: ଗଞ୍ଜାମ ଜିଲ୍ଲାର ବିଭିନ୍ନ ସ୍ଥାନରୁ ଗଞ୍ଜେଇ ଚାଷ(GANJA CULTIVATION) ନଷ୍ଟ କରିଛି ଅବକାରୀ ବିଭାଗ ଓ ପୋଲିସ । ବନବିଭାଗ ଓ ମାଜିଷ୍ଟ୍ରେଟ, ରେଭେନ୍ୟୁ ଓ ବିଦ୍ୟୁତ ବିଭାଗର ମିଳିତ ଉଦ୍ୟମରେ ୨୮ କୋଟିରୁ ଊର୍ଦ୍ଧ୍ବ ଗଞ୍ଜେଇ ଚାଷ ନଷ୍ଟ କରାଯାଇଛି ।

ରାଜ୍ୟ ଅବକାରୀ କମିଶନର, ଗଞ୍ଜାମ ଜିଲ୍ଲାପାଳ ଏବଂ ଆରକ୍ଷୀ ଅଧୀକ୍ଷକଙ୍କ ନେତୃତ୍ୱରେ ବଡଗଡ ଥାନାଅନ୍ତର୍ଗତ ଅର୍ଜୁନପଲ୍ଲୀ, ପାଟଶାଳା, ଭାଲିଆଗୁଡା, କଳବାଡ ଓ ଅନ୍ଧାରୀ ଗାଁ ଅଞ୍ଚଳର ୧୨୨ ଏକର ଜଙ୍ଗଲ ଜମିରେ ଚାଷ ହୋଇଥିବା ଏକ ଲକ୍ଷ ୮୩ ହଜାର ଗଞ୍ଜେଇ ଗଛ ନଷ୍ଟ କରାଯାଇଛି । ନଷ୍ଟ ହୋଇଥିବା ଗଞ୍ଜେଇ ଗଛର ଆନୁମାନିକ ମୂଲ୍ୟ ୧୮ କୋଟି ୩୦ ଲକ୍ଷରୁ ଅଧିକ ହେବ ।ଏଥିରେ ପ୍ରାୟ ତିନି ଶହ କର୍ମଚାରୀ ମୁତୟନ ହୋଇ ଚାଷ ନଷ୍ଟ କରିଛନ୍ତି । ଏଥିରେ ପାଞ୍ଚୋଟି ମାମଲା ରୁଜୁ ହୋଇଥିବା ଜଣାପଡିଛି ।

ସେହିପରି ବଡଗଡ ଥାନା ଅନ୍ତର୍ଗତ ଗଜରାକୁମ୍ପା, ତଳଘାଇ ଭଳି ଜଙ୍ଗଲ ଜମି ଅଞ୍ଚଳରେ ଲାଗିଥିବା ୬୫ ଏକର ଜଙ୍ଗଲ ଜମିରେ ୯୭ ହଜାର ୫୦୦ ଗଞ୍ଜେଇ ଗଛକୁ ନଷ୍ଟ କରାଯାଇଛି । ଏଠାରେ ତିନୋଟି ମାମଲା ରୁଜୁ ହୋଇଛି । ତେବେ ଏହି ଅଞ୍ଚଳରେ ନଷ୍ଟ ହୋଇଥିବା ଗଞ୍ଜେଇର ଆନୁମାନିକ ମୂଲ୍ୟ ୯ କୋଟି ୭୫ ଲକ୍ଷରୁ ଊର୍ଦ୍ଧ୍ବ ହେବ । ଗତ ଦୁଇ ଦିନର ଚଢାଉରେ ମୋଟ ୧୮୭ ଏକର ଜଙ୍ଗଲ ଜମିରୁ ୨ ଲକ୍ଷ ୮୦ ହଜାର ୫୦୦ ଗଞ୍ଜେଇ ଗଛ ନଷ୍ଟ କରାଯାଇ ଥିବାବେଳେ ଏହାର ଆନୁମାନିକ ମୂଲ୍ୟ ୨୮ କୋଟିରୁ ଉର୍ଦ୍ଧ୍ବ ହେବ ବୋଲି ଅବକାରୀ ବିଭାଗର ଜିଲ୍ଲା ଅଧୀକ୍ଷକ ରାଜେନ୍ଦ୍ର କୁମାର ଭତ୍ତ୍ରା ସୂଚନା ଦେଇଛନ୍ତି ।

ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ