ବ୍ରହ୍ମପୁର: କୋରୋନା ମୁକାବିଲା ପାଇଁ ତତ୍ପର ହୋଇଛି ଗଞ୍ଜାମ ଜିଲ୍ଲା ପ୍ରଶାସନ । ଅତ୍ୟାବଶ୍ୟକ ସାମଗ୍ରୀ ଆବଶ୍ୟକ କରୁଥିବା ଗରିବ ପରିବାର ନିକଟରେ ପହଞ୍ଚିବ ସ୍ବତନ୍ତ୍ର ଗାଡି । ଗଞ୍ଜାମ ଜିଲ୍ଲା ସଦର ମହକୁମାର ଛତ୍ରପୁରଠାରେ ଏହି ବଣ୍ଟନ ବ୍ୟବସ୍ଥାର ଶୁଭାରମ୍ଭ ହୋଇଛି ।
ଗରିବ ଲୋକଙ୍କ ଘରେ ରାସନ ବାଣ୍ଟିବ ପ୍ରଶାସନର ସ୍ବତନ୍ତ୍ର ଗାଡି
ସ୍ଥାନୀୟ ବିଧାୟକ ସୁବାସ ଚନ୍ଦ୍ର ବେହେରା ଏବଂ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ସିଦ୍ଧାର୍ଥ ଶଙ୍କର ସ୍ବାଇଁ ଏହାର ନେତୃତ୍ବ ନେଇଛନ୍ତି । ଛତ୍ରପୁର ଏନ୍ଏସି ୧୪ ନମ୍ବର ୱାର୍ଡରେ ଘରକୁ ଘର ଯାଇ ରାସନ ସାମଗ୍ରୀ ବାଣ୍ଟିଛନ୍ତି । ଲୋକଙ୍କୁ ଚାଉଳ, ମସଲା, ଡାଲି, ତେଲ, ସୋୟାବିନ, ଲୁଣ ଭଳି ଅତ୍ୟାବଶ୍ୟକୀୟ ସାମଗ୍ରୀ ବଣ୍ଟନ କରାଯାଇଥିଲା । ଏହି ସ୍ବତନ୍ତ୍ର ଗାଡି ବିଭିନ୍ନ ଗରିବ ପରିବାରଙ୍କୁ ସହାୟତା ପ୍ରଦାନ କରିବ ।