ମଝି ସମୁଦ୍ରରେ 5 ମତ୍ସ୍ୟଜୀବୀଙ୍କୁ ଉଠାଇ ନେଲେ ଆନ୍ଧ୍ର ମାଫିଆ, ଥାନାରେ ଅଭିଯୋଗ

ସମୁଦ୍ର ମଧ୍ୟକୁ ମାଛ ଧରିବାକୁ ଯାଇଥିବା ବେଳେ ପାଞ୍ଚ ମତ୍ସ୍ୟଜୀବୀ ନିଖୋଜ । ମତ୍ସ୍ୟଜୀବୀଙ୍କୁ ଅପହରଣ କରାଯାଇଥିବା ଅଭିଯୋଗ । ଅଧିକ ପଢନ୍ତୁ

ବ୍ରହ୍ମପୁର: ସମୁଦ୍ର ମଧ୍ୟରୁ ମତ୍ସ୍ୟଜୀବୀଙ୍କୁ ଅପହରଣ ଅଭିଯୋଗ । ବେଆଇନ ମାଛମରାକୁ ବିରୋଧ କରିବାରୁ ଆର୍ଯ୍ୟପଲ୍ଲୀର ପାଞ୍ଚ ଜଣ ମତ୍ସଜୀବିଙ୍କୁ ସମୁଦ୍ର ମଧ୍ୟରୁ ଉଠାଇ ନେଲେ ଆନ୍ଧ୍ରର ମାଫିଆ । ପାଞ୍ଚ ଜଣ ମତ୍ସ୍ୟଜୀବୀଙ୍କୁ ଅପହରଣ କରାଯାଇଥିବା ଅଭିଯୋଗ କରିଛନ୍ତି ସମୁଦ୍ର ମଧ୍ୟକୁ ମାଛ ମାରିବାକୁ ଯାଇଥିବା ମତ୍ସ୍ୟଜୀବୀ । ବର୍ତ୍ତମାନ ସୁଦ୍ଧା ସେମାନଙ୍କର କୌଣସି ପତ୍ତା ମିଳିପାରି ନଥିବା ବେଳେ ମେରାଇନ ଥାନାରେ ଏତଲା ଦେଇଛନ୍ତି ନିଖୋଜ ବ୍ୟକ୍ତିଙ୍କ ସମ୍ପର୍କୀୟ ।

ମିଳିଥିବା ସୂଚନା ଅନୁଯାୟୀ, ଗଞ୍ଜାମ ଜିଲ୍ଲାର ଆର୍ଯ୍ୟପଲ୍ଲୀ ଅଞ୍ଚଳର ୧୯ ଜଣ ମତ୍ସ୍ୟଜୀବୀ ଦୁଇଟି ଡଙ୍ଗା ଧରି ଶୁକ୍ରବାର ମାଛ ମାରିବାକୁ ସମୁଦ୍ର ଭିତରକୁ ଯାଇଥିଲେ । ସମୁଦ୍ର ମଧ୍ୟକୁ ଆନ୍ଧ୍ରର ଟ୍ରଲରେ ମାଛ ମାରିବାକୁ କିଛି ବ୍ୟକ୍ତି ଆସିଥିଲେ । କିନ୍ତୁ ବେଆଇନ ମାଛମରାକୁ ନେଇ ଆନ୍ଧ୍ର ଟ୍ରଲରରେ ଆସିଥିବା ବ୍ୟକ୍ତି ଓ ଆଜ୍ଜିପଲ୍ଲୀର ମତ୍ସ୍ୟଜୀବୀଙ୍କ ମଧ୍ୟରେ ବଚସା ହୋଇଥିଲା । ଛୋଟ ଛୋଟ ଦେଶୀ ଡଙ୍ଗାରେ ମାଛ ଧରୁଥିବା ସ୍ଥାନରେ କାହିଁକି ଟ୍ରଲର ନେଇ ମାଛ ଧରିବାକୁ ଆସିଛ ବୋଲି ଆନ୍ଧ୍ରରୁ ମାଛ ମାରିବାକୁ ଆସିଥିବା ବ୍ୟକ୍ତିଙ୍କୁ କହିଥିଲେ । ଏହାପରେ ଟ୍ରଲରେ ଆସିଥିବା ବ୍ୟକ୍ତି ଆର୍ଯ୍ୟପଲ୍ଲୀ ଅଞ୍ଚଳର ପାଞ୍ଚ ଜଣ ମତ୍ସ୍ୟଜୀବୀଙ୍କୁ ଅପହରଣ କରିନେଇଥିବା କହିଛନ୍ତି ପ୍ରତ୍ୟକ୍ଷଦର୍ଶୀ ।

ବର୍ତ୍ତମାନ ସୁଦ୍ଧା ମତ୍ସ୍ୟଜୀବୀଙ୍କ ପତ୍ତା ମିଳିନଥିବା ସ୍ଥାନୀୟ ଗ୍ରାମବାସୀ ଏବଂ ସେମାନଙ୍କ ପରିବାର ବର୍ଗଙ୍କ ପକ୍ଷରୁ ଆଜ୍ଜିପଲ୍ଲୀର ମେରାଇନ ଥାନାରେ ଅଭିଯୋଗ କରାଯାଇଛି । ମାଛ ମାଫିଆଙ୍କ ସହ ବଚସା ହେବାରୁ ଅପହରଣ ହୋଇଥିବା ଜଣାଯାଇଛି । ଅପହରଣ ପରେ ତୁରନ୍ତ ଏହି ବ୍ୟକ୍ତିବିଶେଷଙ୍କୁ ଫେରାଇ ଆଣିବା ପାଇଁ ଜିଲ୍ଲା ପ୍ରଶାସନ ଏବଂ ତଟରକ୍ଷୀ ବାହିନୀକୁ ଅବଗତ କରାଯାଇଛି ।

ଜଣେ ମତ୍ସ୍ୟଜୀବୀ କହିଛନ୍ତି ଯେ, ଆମେ ରାତି 3ଟା ବେଳେ ମାଛ ମାରିବାକୁ ଯାଇଥିଲୁ। କିନ୍ତୁ ସମୁଦ୍ର ମଧ୍ୟରେ ଆନ୍ଧ୍ରରୁ ମାଛ ମାରିବାକୁ ଆସିଥିବା କିଛି ବ୍ୟକ୍ତିଙ୍କ ସହ ଆମର ବଚସା ହୋଇଥିଲେ। ସେମାନେ ଆମର 5 ଜଣ ମତ୍ସ୍ୟଜୀବୀଙ୍କୁ ନେଇଯାଇଛନ୍ତି । ଆମେ 2ଟି ଡଙ୍ଗାରେ 19 ଜଣ ଯାଇଥିଲୁ ।

ନିକଟରେ ଭଦ୍ରକ ଜିଲ୍ଲାରେ ମାଛ ମାରିବାକୁ ଯାଇ ଫେରୁଥିବା ବେଳେ ଜଣେ ମତ୍ସ୍ୟଜୀବୀ ନିଖୋଜ ହୋଇଯାଇଥିବା ଖବର ସାମ୍ନାକୁ ଆସିଥିଲା । ବୋଟରୁ ମନ୍ତେଇ ନଦୀ ମଧ୍ୟକୁ ଖସି ପଡି ନିଖୋଜ ହୋଇଯାଇଥିଲେ ମତ୍ସ୍ୟଜୀବୀ । ଭଦ୍ରକ ଜିଲ୍ଲା ଧାମରା ମାଛ ଧରା ବନ୍ଦରରେ ଏପରି ଘଟଣା ଘଟିଥିଲା । ନିଖୋଜ ମତ୍ସ୍ୟଜୀବୀ ହେଉଛନ୍ତି କରଣପଲି ପଞ୍ଚାୟତ କୁଆମରା ଗ୍ରାମର ବିଜୟ ନାୟକ ।

ଇଟିଭି ଭାରତ, ବ୍ରହ୍ମପୁର