ଗଞ୍ଜାମରେ ଭୟାବହ ଅଗ୍ନିକାଣ୍ଡ: 30 ବଖରା ସମ୍ପୂର୍ଣ୍ଣ ନଷ୍ଟ

ଗଞ୍ଜାମ ଜିଲ୍ଲା ନୂଆଁଦୁରିଙ୍ଗି ଗାଁରେ ଭୟାବହ ଅଗ୍ନିକାଣ୍ଡ । ଜଳି ପୋଡି ପାଉଁଶ ହୋଇଗଲା 30 ବଖରା ଘର । ଅଧିକ ପଢନ୍ତୁ...

ଭଞ୍ଜନଗର: ଚାହୁଁ ଚାହୁଁ ଜଳିଗଲା ପ୍ରାୟ ୧୫ରୁ ଊର୍ଦ୍ଧ୍ବ ପରିବାରର ୩୦ ବଖରାରୁ ଅଧିକ ଘର । ଏପରି ଏକ ଅଭାବନୀୟ ଘଟଣା ଘଟିଛି ଗଞ୍ଜାମ ଜିଲ୍ଲା ଜଗନ୍ନାଥପ୍ରସାଦ ବ୍ଳକ ଅନ୍ତର୍ଗତ ଗାୟାଗଣ୍ଡା ପଞ୍ଚାୟତର ନୂଆଁଦୁରିଙ୍ଗି ଗାଁରେ ।

ଆଜି(ବୁଧବାର) ମଧ୍ୟାହ୍ନ ସମୟରେ ହଠାତ ନିଆଁ ଲାଗିଯାଇଥିଲା ଗାଁରେ । ନିଆଁର ପ୍ରକୋପ ଏତେ ଭୟାବହ ଥିଲା ଯେ ସ୍ଥାନୀୟ ଲୋକଙ୍କ ପାଇଁ ନିଆଁ ଲିଭାଇବା ଅତି କଷ୍ଟକର ହୋଇପଡିଥିଲା । ଏହି ଗାଁଟି ବଣ ପାହାଡ ଘେରା ଅଞ୍ଚଳରେ ଥିବାରୁ ବିଳମ୍ବରେ ଗାଁରେ ପହଞ୍ଚିଥିଲା ଅଗ୍ନିଶମ ବାହିନୀ । ତେବେ ଅଗ୍ନିଶମ କର୍ମଚାରୀ ଗାଁରେ ପହଞ୍ଚି ନିଆଁକୁ ଆୟତ୍ତ କରିବା ପୂର୍ବରୁ 30 ବଖରାରୁ ଅଧିକ ଘର ସମ୍ପୂର୍ଣ୍ଣ ପୋଡି ପାଉଁଶ ହୋଇଯାଇଛି ।

ଅନ୍ୟପଟେ ଅଗ୍ନିକାଣ୍ଡର ପ୍ରକୃତ କାରଣ ସ୍ପଷ୍ଟ ହୋଇ ନ ଥିବାବେଳେ ସମସ୍ତ କ୍ଷତିଗ୍ରସ୍ତ ଗରିବ ଶ୍ରେଣୀର । ସେମାନଙ୍କ ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ସମ୍ପୂର୍ଣ୍ଣ ପୋଡି ପାଉଁଶ ହୋଇଯାଇଥିବାରୁ ସାହାର୍ଯ୍ୟ ପାଇଁ ସାଧାରଣରେ ନିବେଦନ କରାଯାଇଛି ।

ଭଞ୍ଜନଗରରୁ ରଞ୍ଜନ ସ୍ୱାଇଁ, ଇଟିଭି ଭାରତ