ବ୍ରହ୍ମପୁର: ସ୍ବାଧୀନତାକୁ ୭୫ ବର୍ଷ ପୂର୍ତ୍ତି ଅବସରରେ ଦେଶରେ 'ଆଜାଦି କା ଅମୃତ ମହୋତ୍ସବ' ପାଳନ କରାଯାଉଛି । ଏଥିପାଇଁ ଅନେକ କାର୍ଯ୍ୟକ୍ରମ ଆୟୋଜିତ ହେଉଛି । ଏଥି ମଧ୍ୟରେ ଗଞ୍ଜାମ ଜିଲ୍ଲାର ଜଣେ ଯୁବ ଶିଳ୍ପୀ ଅଦରକାରୀ କାଠରେ ପ୍ରସ୍ତୁତ କରିଛନ୍ତି ଭାରତ ମାନଚିତ୍ର । ହର ଘର ତ୍ରିରଙ୍ଗାର ଆହ୍ବାନ ସମୟରେ ଗତ 10 ଦିନରୁ ଊର୍ଦ୍ଧ୍ବ ସମୟ ଧରି ଅରୁଣ କୁମାର ସାହୁ ଅଦରକାରୀ କାଠରେ ଚିତାକର୍ଷକ ଭାରତ ମାନଚିତ୍ର ପ୍ରସ୍ତୁତ କରିଛନ୍ତି ।
ସୂଚନା ଅନୁସାରେ, ଅରୁଣ ଆମ୍ବ, ପିଆଶାଳ,ଶାଗୁଆନ୍, ଗମ୍ଭାରୀ, କାକପୋଇ ଭଳି ବିଭିନ୍ନ ପ୍ରକାର ଅଦରକାରୀ ରଦି କାଠ ବ୍ୟବହାର କରି ଏଭଳି ନିଜର କଳାକୃତି ମାଧ୍ୟମରେ ଭାରତ ମାନଚିତ୍ର ପ୍ରସ୍ତୁତ କରିଛନ୍ତି । ଏଥିସହ ସେଥିରେ ପଛପଟେ ତ୍ରିରଙ୍ଗାର ତିନୋଟି ରଙ୍ଗ ରହିଥିବା ବେଳେ ରାଷ୍ଟ୍ରୀୟ ଭାଷା ହିନ୍ଦୀରେ ଜାତୀୟ ସଙ୍ଗୀତ ଜନ-ଗଣ-ମନ ରଖିଥିବା ଦେଖାଯାଇଛି । ତେବେ ଅରୁଣ ପ୍ରସ୍ତୁତ କରିଥିବା ଭାରତ ମାନଚିତ୍ରର ଉଚ୍ଚତା 48 ଇଞ୍ଚ ରହିଥିବା ବେଳେ ଓସାର ରହିଛି 44 ଇଞ୍ଚ । ସେହିପରି ଆଜାଦି କା ଅମୃତ ମହୋତ୍ସବର ଏକ ଲୋଗୋକୁ ମଧ୍ୟ ସେ ପ୍ରସ୍ତୁତ କରିଥିବା ବେଳେ ଏହାର ଲମ୍ବା 13 ଇଞ୍ଚ ଓ ଉଚ୍ଚତା 15 ଇଞ୍ଚ ରହିଛି ।
ଇଟିଭି ଭାରତ, ବ୍ରହ୍ମପୁର