ବ୍ରହ୍ମପୁର: ରିଲ୍ସ ନିଶାରେ ପାଗଳ ଯୁବପିଢ଼ି । ରାତାରାତି ଭାଇରାଲ ହେବା ନିଶାରେ କରୁଛନ୍ତି ବିପଦଜନକ ଭିଡ଼ିଓ ସୁଟିଂ । ବ୍ରହ୍ମପୁର ସହରର ଶଶିଭୂଷଣ ରଥ ସରକାରୀ ସ୍ୱୟଂଶାସିତ ମହିଳା ମହାବିଦ୍ଯାଳୟରୁ ଏଭଳି କିଛି ଭିଡ଼ିଓ ସାମ୍ନାକୁ ଆସିଛି । କଲେଜ ଛାତ ଉପରେ ଠିଆ ହୋଇ ବିପଦଜନକ ଭାବେ ଭିଡ଼ିଓ ଉତ୍ତୋଳନ କରୁଛନ୍ତି ଦୁଇ ଛାତ୍ରୀ । ଯାହାର ଭିଡ଼ିଓ ଭାଇରାଲ ହୋଇଛି । ତେବେ ଭାଇରାଲ ଭିଡ଼ିଓ ଉପରେ ସଫେଇ ଏହା ପୁରୁଣା ଭିଡ଼ିଓ ବୋଲି କହିଛନ୍ତି କଲେଜ ଅଧ୍ୟକ୍ଷ ।
ଭିଡ଼ିଓରେ ଦେଖିବାକୁ ମିଳିଛି ଯେ, ଶଶିଭୂଷଣ ରଥ ସରକାରୀ ସ୍ୱୟଂଶାସିତ ମହିଳା ମହାବିଦ୍ଯାଳୟର ଚାରି ମହଲା ଛାତ ଉପରେ ତିନି ରୁ ଚାରି ଜଣ ଛାତ୍ରୀ ଅସାବଧାନତା ଭାବେ ଠିଆ ହୋଇ ରିଲ୍ସ ଏବଂ ଭିଡିଓ ପ୍ରସ୍ତୁତ କରୁଛନ୍ତି । ବେଫିକର ଭାବେ ଚାଲୁଥିବାର ଦୃଶ୍ୟ ମଧ୍ୟ ଦେଖିବାକୁ ମିଳିଛି । ଛାତ୍ରୀମାନେ ଭିଡ଼ିଓ କରୁଥିବା ବେଳେ ସେହି ରାସ୍ତାରେ ଯାଉଥିବା କିଛି ବ୍ଯକ୍ତି ବିଶେଷ ଏହି ଭିଡିଓକୁ ସୁଟିଂ କରିଥିବା ଅନୁମାନ କରାଯାଉଛି । ସୋସିଆଲ ମିଡ଼ିଆରେ ଭିଡ଼ିଓଟି ଆସିବା ପରେ ସହରରେ ଚର୍ଚ୍ଚାର ବିଷୟ ପାଲଟିଛି । ୟୁନିଫର୍ମରୁ ଛାତ୍ରୀମାନେ ଯୁକ୍ତ ଦୁଇର ହୋଇଥିବା ଜଣାପଡୁଛି । କିନ୍ତୁ ଛାତ୍ରୀମାନେ ମହାବିଦ୍ୟାଳୟର ଚାରି ମହଲା କୋଠା ଉପରକୁ କିପରି ଗଲେ ତାକୁ ନେଇ ଏବେ ପ୍ରଶ୍ନ ଉଠିଛି ।