ସାମାଜିକ ଦୂରତା ସହ ଉତ୍କଳ ସଙ୍ଗୀତ ଗାଇଲେ ଗଜପତିବାସୀ

କୋରୋନା ଲଢେଇରେ ରାଜ୍ୟର ସଫଳତା ସହ ଏହି ସଫଳତା ପଛରେ ଥିବା କୋରୋନା ଯୋଦ୍ଧାଙ୍କୁ ଉତ୍ସାହିତ କରିବା ଉଦ୍ଦେଶ୍ୟରେ ଶନିବାର ସନ୍ଧ୍ୟା 5ଟା 30ରେ ବନ୍ଦେ ଉତ୍କଳ ଜନନୀ ଗାନ ପାଇଁ ଆହ୍ବାନ ଦେଇଥିଲେ ମୁଖ୍ୟମନ୍ତ୍ରୀ । ଏନେଇ ଶନିବାର ସାରା ରାଜ୍ୟରେ ଉତ୍କଳ ସଙ୍ଗୀତ ‘ବନ୍ଦେ ଉତ୍କଳ ଜନନୀ’ ଗାନ କରିଥିବା ଦେଖିବାକୁ ମିଳିଥିଲା ।

ଗଜପତି: କୋରୋନା ଲଢେଇରେ ରାଜ୍ୟର ସଫଳତା ସହ ଏହି ସଫଳତା ପଛରେ ଥିବା କୋରୋନା ଯୋଦ୍ଧାଙ୍କୁ ଉତ୍ସାହିତ କରିବା ଉଦ୍ଦେଶ୍ୟରେ ଶନିବାର ସନ୍ଧ୍ୟା 5ଟା 30ରେ ବନ୍ଦେ ଉତ୍କଳ ଜନନୀ ଗାନ ପାଇଁ ଆହ୍ବାନ ଦେଇଥିଲେ ମୁଖ୍ୟମନ୍ତ୍ରୀ । ଏନେଇ ଶନିବାର ସାରା ରାଜ୍ୟରେ ଉତ୍କଳ ସଙ୍ଗୀତ ‘ବନ୍ଦେ ଉତ୍କଳ ଜନନୀ’ ଗାନ କରିଥିବା ଦେଖିବାକୁ ମିଳିଥିଲା । ଏହି କ୍ରମରେ ଉଭୟ ଗଜପତି ଜିଲ୍ଲା ପ୍ରଶାସନ ଏବଂ ପୋଲିସ ପକ୍ଷରୁ ଏହି କାର୍ଯ୍ୟକ୍ରମ ଜିଲ୍ଲାର ବିଭିନ୍ନ ସ୍ଥାନରେ ଅନୁଷ୍ଠିତ ହୋଇଥିଲା ।

ପାରଳାଖେମୁଣ୍ଡି ପୌର ପରିଷଦ ପକ୍ଷରୁ ସ୍ଥାନୀୟ ରାଜଦାଣ୍ଡରେ ‘ବନ୍ଦେ ଉତ୍କଳ ଜନନୀ’ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ପୌରପରିଷଦର ନିର୍ବାହୀ ଅଧିକାରୀ ଅଶୋକ କୁମାର ରାଉତଙ୍କ ନେତୃତ୍ବରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସମସ୍ତ ପୌର କର୍ମଚାରୀ ସାମିଲ ହୋଇଥିଲେ । ଏହି ସମୟରେ ରାଜଦାଣ୍ଡକୁ ଅତି ଆକର୍ଷଣୀୟ ଭାବେ ସଜା ଯାଇଥିବା ବେଳେ ସାମାଜିକ ଦୂରତା କିଭଳି ରହିବ ତାହା ଉପରେ ମଧ୍ୟ ଯଥେଷ୍ଟ ଗୁରୁତ୍ବ ଦିଆଯାଇଥିଲା ।

ଏଥିରେ ସହରର ବହୁ ଲୋକେ ବି ସାମିଲ ହୋଇ ଉତ୍କଳ ସଙ୍ଗୀତ ଗାନ କରିଥିଲେ । ସ୍ଥାନୀୟ ଥାନା ପରିସରରେ ପୋଲିସ ପକ୍ଷରୁ ଆୟୋଜିତ କାର୍ଯ୍ୟକ୍ରମରେ ଜିଲ୍ଲାପାଳ ଅନୁପମ ଶାହା ଏବଂ ଏସପି ସାରା ଶର୍ମା ମଧ୍ୟ ସାମିଲ ହୋଇଥିଲେ । ସଙ୍ଗୀତ ନିର୍ଦ୍ଦେଶକ ଗୁରୁ ରଘୁନାଥ ପାତ୍ର ଏବଂ ତାଙ୍କ ଛାତ୍ରଛାତ୍ରୀମାନ ଏଥିରେ ସହାୟତା କରିଥିଲେ । ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ପାରଳାଖେମୁଣ୍ଡି ଏସଡିପିଓ ପ୍ରକାଶ ଚନ୍ଦ୍ର ଜେନା, ଥାନା ଅଧିକାରୀ ବିବେକାନନ୍ଦ ସ୍ବାଇଁଙ୍କ ସମେତ ବହୁ ବରିଷ୍ଠ ପୋଲିସ ଅଧିକାରୀ ସାମିଲ ହୋଇଥିଲେ ।

ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ