ଗଜପତି: ଶିକ୍ଷାର ଉନ୍ନତି ପାଇଁ ସରକାର କୋଟିକୋଟି ଟଙ୍କା ଖର୍ଚ୍ଚ କରିଛନ୍ତି । ଶିକ୍ଷାକୁ ସବୁଠାରୁ ବେଶି ଅନୁଦାନ ମିଳୁଥିବା ସରକାର ଡିଣ୍ଡିମ ପିଟୁଛନ୍ତି । ହେଲେ ଏହାର ପ୍ରକୃତ ଚିତ୍ର ଅତ୍ୟନ୍ତ ବିକଳ । ସ୍କୁଲରେ ଶିକ୍ଷକ ଅଭାବକୁ ନେଇ ସ୍କୁଲ ତାଲା ପାକାଇବା ସହ ଧାରଣାରେ ବସିଛନ୍ତି ଛାତ୍ରଛାତ୍ର ଓ ଅଭିଭାବକ । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ଗଜପତି ଜିଲ୍ଲା ରାୟଗଡ ବ୍ଲକ ପୁତାର ଗ୍ରାମରେ । ସ୍କୁଲରେ ସଂସ୍କୃତ ଶିକ୍ଷକ ନାହାନ୍ତି । ବାରମ୍ବାର ଦାବି ପରେ ମଧ୍ୟ ସଂସ୍କୃତ ଶିକ୍ଷକ ନିଯୁକ୍ତ ନହେବାରୁ ଛାତ୍ରଛାତ୍ରୀ ଏବଂ ଗ୍ରାମବାସୀ ମିଳିତ ଭାବେ ସ୍କୁଲରେ ତାଲା ପକାଇ ପ୍ରତିବାଦ କରିଛନ୍ତି । ସଂସ୍କୃତ ଶିକ୍ଷକ ନଆସିବା ଯାଏଁ ଏଭଳି ଆନ୍ଦୋଳନ ଜାରି ରହିବ ବୋଲି ଗ୍ରାମବାସୀମାନେ ଚେତାବନୀ ଦେଇଛନ୍ତି ।
ଆଦିବାସୀ ଅଧ୍ୟୁଷିତ ଗଜପତି ଜିଲ୍ଲା ରାୟଗଡ ବ୍ଲକ ପୁତାର ଗ୍ରାମର ହାଇସ୍କୁଲରେ ଶିକ୍ଷକ ଅଭାବକୁ ନେଇ ଆନ୍ଦୋଳନ କରାଯିବା ଏପରିକି ସ୍କୁଲରେ ତାଲା ପକାଇବା ଘଟଣା ଏବେ ଚର୍ଚ୍ଚାର ବିଷୟ ହୋଇଛି । ଏହି ସ୍କୁଲରେ ପ୍ରଥମରୁ 10ମ ଶ୍ରେଣୀ ଯାଏଁ ରହିଛି । ସ୍କୁଲ୍ରେ ପ୍ରାୟ 2ଶହ ଜଣ ଛାତ୍ରଛାତ୍ରୀ ଶିକ୍ଷା ଲାଭ କରୁଛନ୍ତି । ହାଇସ୍କୁଲସ୍ତରରେ ପ୍ରତି ବିଷୟ ପାଇଁ ଜଣେ ଲେଖାଏଁ ଶିକ୍ଷକ ରହିବା କଥା । କିନ୍ତୁ ଦୀର୍ଘ ଦିନ ହେବ ସ୍କୁଲ୍ରେ ସାହିତ୍ୟ କି ସଂସ୍କୃତ ଶିକ୍ଷକ ନିଥିବାରୁ ବୋର୍ଡ ପରୀକ୍ଷା ଦେବାକୁ ଥିବା 10ମ ଶ୍ରେଣୀର ଛାତ୍ରଛାତ୍ରୀ ବିଭିନ୍ନ ସମସ୍ୟାର ସମ୍ମୁଖୀନ ହେଉଥିବା ଅଭିଯୋଗ କରିଛନ୍ତି ।
ଛାତ୍ରଛାତ୍ରୀ କହିଛନ୍ତି,"3ମାସ ହେବ ସ୍କୁଲରେ ସଂସ୍କୃତ ଶିକ୍ଷକଙ୍କ ଅଭାବ ରହିଛି । ଫଳରେ ଏଫ୍-1 ପରୀକ୍ଷାରେ ସବୁ ପିଲାଙ୍କୁ ବିଭିନ୍ନ ସମସ୍ୟାର ସମ୍ମୁଖୀନ ହେବାକୁ ପଡ଼ିଥିଲା । ଅନ୍ୟ ବିଷୟକୁ ସ୍କୁଲର ଶିକ୍ଷକମାନେ ପଢ଼ାଇ ଦେଉଥିବା ବେଳେ ସଂସ୍କୃତ ବିଷୟ ପଢାଇବା ପାଇଁ କୌଣସି ଶିକ୍ଷକ ନାହାନ୍ତି । ଚଳିତ ବର୍ଷ ସ୍କୁଲ୍ ଖୋଲିବା ଦିନଠାରୁ ସଂସ୍କୃତ ଶିକ୍ଷକ ଅଭାବ ରହିଛି । ତେଣୁ ସେମାନେ ବାଧ୍ୟ ହୋଇ ସ୍କୁଲରେ ତାଲା ପକାଇଛନ୍ତି ।"