ସରିଲା ନାମାଙ୍କନ, ବିଦ୍ରୋହୀଙ୍କ ଉପରେ ସମସ୍ତଙ୍କ ନଜର

ମୋହନା ଏବଂ ପାରଳାଖେମୁଣ୍ଡି ଆସନର ପ୍ରମୁଖ ରାଜନୈତିକ ଦଳଙ୍କ ମଧ୍ୟରେ କଡା ମୁକାବିଲା ହେବ। ଏହାରି ଭିତରେ ବିଭିନ୍ନ ଦଳର ବିଦ୍ରୋହୀ ପ୍ରାର୍ଥୀ ଦଳୀୟ ପ୍ରାର୍ଥୀଙ୍କ ବିଜୟରେ କିଭଳି ବାଧକ ହେଉଛନ୍ତି ଏବଂ ଏହା ଦ୍ବାରା କାହାର ଲାଭ ଏବଂ କାହାର କ୍ଷତି ହେବ ତାହା ଉପରେ ରହିଛି ସମସ୍ତଙ୍କ ନଜର।

ଗଜପତି: ନିର୍ବାଚନ ପାଖେଇ ଆସୁଥିବା ବେଳେ ପ୍ରାର୍ଥିପତ୍ର ଦାଖଲ ମଧ୍ୟ ଜାରି ରହିଛି। ଦ୍ବିତୀୟ ପର୍ଯ୍ୟାୟରେ ଅନୁଷ୍ଠିତନିର୍ବାଚନ ପାଇଁ ନାମାଙ୍କନ ଦାଖଲର ଆଜି ଥିଲା ଶେଷ ତାରିଖ । ଏହି ଅବସରରେ ଗଜପତି ଜିଲ୍ଲାର ଦୁଇଟି ବିଧାନସଭା ଆସନପାଇଁ ପ୍ରାର୍ଥିପତ୍ର ଦାଖଲ ଶେଷ ହୋଇଛି । ବିଭିନ୍ନ ଦଳର ଆଶାୟୀଙ୍କ ସମେତ ସ୍ବାଧିନ ପ୍ରାର୍ଥୀ ମଧ୍ୟ ନାମାଙ୍କନ ଦାଖଲ କରିଛନ୍ତି।

ଗଜପତି ଜିଲ୍ଲାରେ ରହିଛି ମୋଟ ଦୁଇଟି ବିଧାନସଭା ଆସନ । ପାରଳାଖେମୁଣ୍ଡି ଆସନ ଅଣସଂରକ୍ଷିତ ଥିବା ବେଳେ ମୋହନା ନିର୍ବାଚନମଣ୍ଡଳୀ ଆଦିବାସୀଙ୍କ ପାଇଁ ସଂରକ୍ଷିତ ରହିଛି । ଉଭୟ ଆସନରୁ ବିଭିନ୍ନ ଦଳର ଆଶାୟୀ ପ୍ରାର୍ଥିପତ୍ର ଦାଖଲ କରିଥିବା ବେଳେ ବିଭିନ୍ନ ଦଳର ବିଦ୍ରୋହୀ ମଧ୍ୟ ନାମାଙ୍କନ ଦାଖଲ କରିଛନ୍ତି।

ପାରଳାଖେମୁଣ୍ଡି ନିର୍ବାଚନ ମଣ୍ଡଳି ପାଇଁ 9ଜଣ ପ୍ରାର୍ଥୀ ନିଜ ନାମାଙ୍କନ ପତ୍ର ଦାଖଲ କରିଛନ୍ତି । ସେମାନେ ହେଉଛନ୍ତି ବିଜେପିରୁ କେ ନାରାୟମ ରାଓ, ବିଜେଡିରୁ କଲ୍ୟାଣୀ ଗଜପତି ଏବଂ କଂଗ୍ରେସରୁ ଗତଥର ନିର୍ବାଚିତ ହୋଇଥିବା କେ ସୂରିୟା ରାଓ । ସେହିପରି ମୋହନା ନିର୍ବାଚନ ମଣ୍ଡଳିରୁ 3 ପ୍ରମୁଖ ଦଳର ପ୍ରାର୍ଥୀ ନିଜ ନିଜର ନାମାଙ୍କନ ପତ୍ର ଦାଖଲ କରିଛନ୍ତି । ଏମାନଙ୍କ ବ୍ୟତୀତ ଆଉ 5ଜଣ ପ୍ରାର୍ଥୀ ସ୍ବାଧୀନ ଓ ଅନ୍ୟାନ୍ୟ ଦଳରୁ ନିଜର ନାମାଙ୍କନ ପତ୍ର ଦାଖଲ କରିଛନ୍ତି । କଂଗ୍ରେସ ଦଳରୁ ଦାଶରଥୀ ଗମାଙ୍ଗ, ବିଜେଡିରୁ ପୂର୍ଣ୍ଣବାସୀ ନାୟକ ଏବଂ ବିଜେପି ତରଫରୁ ପ୍ରଶାନ୍ତ ମଲ୍ଲିକ ନିଜର ନାମାଙ୍କନ ପତ୍ର ଦାଖଲ କରିଛନ୍ତି।

ଯଦିଓ ନିର୍ବାଚନ ପାଇଁ ଟିକେଟ ବଣ୍ଟାସରିଛି ତେବେ କେତେକ ଦଳର ବିଦ୍ରୋହୀ ପ୍ରାର୍ଥୀ ମଧ୍ୟ ନିର୍ବାଚନରେ ଅବତୀର୍ଣ୍ଣ ହୋଇଛନ୍ତି । ଏଥିପାଇଁ ସେମାନେ ଦଳୀୟ ପ୍ରାର୍ଥୀ ବଦଳରେ ସ୍ବାଧିନ ଭାବେ ନାମାଙ୍କନ ପତ୍ର ଦାଖଲ କରିଛନ୍ତି। ବିଭିନ୍ନ ଦଳ ସହ ଜଡିତ ଥିଲେ ବିଦ୍ରୋହୀ । ମାତ୍ର ନିର୍ବାଚନରେ ଦଳ ତାଙ୍କୁ ଅଣଦେଖା କରିଥିବାର ଅଭିଯୋଗ ଆଣିଛନ୍ତି । ପ୍ରମୁଖ ବିଦ୍ରୋହୀ ପ୍ରାର୍ଥୀଙ୍କ ତାଲିକାରେ ରହିଛନ୍ତି ପାରଳାଖେମୁଣ୍ଡିର କଂଗ୍ରେସର ତିରୁପତି ପାଣିଗ୍ରାହୀ ଏବଂ ମୋହନାରୁ ବିଜେପିର ଭରତ ପାଇକ।

ଚଳିତଥର ନିର୍ବାଚନରେ ଉଭୟ ମୋହନା ଏବଂ ପାରଳାଖେମୁଣ୍ଡି ଆସନର ପ୍ରମୁଖ ରାଜନୈତିକ ଦଳଙ୍କ ମଧ୍ୟରେ କଡା ମୁକାବିଲା ହେବ । ଏହାରି ଭିତରେ ବିଭିନ୍ନ ଦଳର ବିଦ୍ରୋହୀ ପ୍ରାର୍ଥୀ ଦଳୀୟ ପ୍ରାର୍ଥୀଙ୍କ ବିଜୟରେ କିଭଳି ବାଧକ ହେଉଛନ୍ତି ଏବଂ ଏହା ଦ୍ବାରା କାହାର ଲାଭ ଏବଂ କାହାର କ୍ଷତି ହେବ ତାହା ଉପରେ ରହିଛି ସମସ୍ତଙ୍କ ନଜର।

ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ